မြစ်ကြီးနား၊ ဇန်နဝါရီ ၁
၂၀၂၂ ခုနှစ်၊ ဖေဖော်ဝါရီ ၁၂ ရက်နေ့တွင် ကျရောက်မည့် (၇၅)နှစ်မြောက် စိန်ရတု ပြည်ထောင်စုနေ့ အခမ်းအနား အောင်မြင်စွာ ကျင်းပနိုင်ရေးအတွက် ကချင်ပြည်နယ် အစိုးရအဖွဲ့နှင့် ဌာနဆိုင်ရာများ၏ လုပ်ငန်းညှိနှိုင်းအစည်းအဝေး ယမန်နေ့ မွန်းလွဲပိုင်း ၁ နာရီခွဲတွင် ပြည်နယ်အစိုးရအဖွဲ့ရုံး အစည်းအဝေး ခန်းမ၌ ကျင်းပပြုလုပ်ခဲ့ကြသည်။
လုပ်ငန်းညှိနှိုင်းအစည်းအဝေးတွင် ပြည်နယ်ဝန်ကြီးချုပ် ဦးခက်ထိန်နန်က လာမည့် ပြည်ထောင်စုနေ့သည် (၇၅)နှစ်မြောက် စိန်ရတုပြည်ထောင်စုနေ့ ဖြစ်သည့်အတွက် နိုင်ငံတော်အနေဖြင့် နိုင်ငံတော်နှင့် ပြည်ထောင်စု၏ ပုံရိပ်ကို ပေါ်လွင်အောင် နေပြည်တော်၌ ခမ်းခမ်းနားနား ကျင်းပပြုလုပ်သွားမည် ဖြစ်ပါကြောင်း၊ ပြည်နယ်အနေဖြင့် ပြည်နယ်၏ အထင်ကရနေရာများ၊ ထွက်ကုန်ပစ္စည်းများ၊ ရိုးရာယဉ်ကျေးမှု ဓလေ့ထုံးစံများကို ပေါ်လွင်အောင် ဖော်ထုတ်ပြသနိုင်သည့် အလှပြယာဉ်များ၊ အကအဖွဲ့များ စေလွှတ်နိုင်ရေး ညှိနှိုင်းပေါင်းစပ် ဆွေးနွေးသွားရမည်ဖြစ်ပါကြောင်း မှာကြားသည်။
ထို့နောက် ညှိနှိုင်းအစည်းအဝေးသို့ တက်ရောက်လာကြသည့် ပြည်နယ်ဝန်ကြီးများ၊ ဌာန ဆိုင်ရာများနှင့် နေပြည်တော်တွင် ကျင်းပပြုလုပ်သွားမည့် (၇၅)နှစ်မြောက် စိန်ရတုပြည်ထောင်စု နေ့အခမ်းအနားအတွက် ပြည်နယ်မှ ဆင်ယင်ပြသ ဆောင်ရွက်သွားရမည့် အလှပြယာဉ်များ၏ နမူနာဒီဇိုင်းများ ရေးဆွဲ၍ အလှပြယာဉ်များ ပြင်ဆင်ဆောင်ရွက် သွားမည့်အစီအမံများ၊ ရိုးရာအက အဖွဲ့များအတွက် တိုင်းရင်းသား စာပေနှင့် ယဉ်ကျေးမှုအဖွဲ့များနှင့် ပူးပေါင်းညှိနှိုင်းချိတ်ဆက် ဆောင်ရွက်သွားရေးစသည့် အုပ်ချုပ်/ထောက်ပံ့ဆိုင်ရာ လုပ်ငန်းကိစ္စရပ်များနှင့် ညှိနှိုင်းဆွေးနွေး ဆောင်ရွက်ခဲ့ကြပြီး လိုအပ်သည်များ ကို ပေါင်းစပ်ညှိနှိုင်း ဆောင်ရွက်ပေးခဲ့သည်။
https://t.me/MyanmarNationalPost
www.mnpnewsagency.com
No comments:
Post a Comment