မွန်ပြည်နယ် ဝန်ကြီးချုပ် ဦးအောင်ကြည်သိန်း အငြိမ်းစား နိုင်ငံ့ဝန်ထမ်းများအား ကျန်းမာရေးစောင့်ရှောက်မှုပေးခြင်းနှင့် ထောက်ပံ့မှုပေးခြင်း အခမ်းအနား တက်ရောက်

မော်လမြိုင်၊ မေ ၃၀

မွန်ပြည်နယ်အစိုးရအဖွဲ့၏ ဦးဆောင်မှုဖြင့် အငြိမ်းစားနိုင်ငံ့ ဝန်ထမ်းများအား ကျန်းမာရေးစောင့်ရှောက်မှုပေးခြင်းနှင့် ထောက်ပံ့မှုပေးခြင်း အခမ်းအနားကို ယနေ့နံနက်ပိုင်းက မော်လမြိုင်မြို့ အထွေထွေရောဂါကု ပြည်သူ့ဆေးရုံကြီး၌ ကျင်းပပြုလုပ်ရာ မွန်ပြည်နယ် ဝန်ကြီးချုပ် ဦးအောင်ကြည်သိန်း၊ ပြည်နယ်တရားလွှတ်​တော်တရားသူကြီးချုပ်၊ ပြည်နယ်အစိုးရ အဖွဲ့ဝင် ဝန်ကြီးများ၊ ဌာနဆိုင်ရာတာဝန်ရှိသူများ အငြိမ်းစားနိုင်ငံ့ဝန်ထမ်းများ တက်ရောက်ခဲ့ကြောင်း သိရသည်။

အခမ်းအနားတွင် ပြည်နယ်ဝန်ကြီးချုပ်က မွန်ပြည်နယ်အတွင်း နိုင်ငံ့တာဝန်ကိုကျေပွန်စွာ ထမ်းဆောင်ခဲ့ကြသော အငြိမ်းစားနိုင်ငံ့ဝန်ထမ်းများအား ငွေကြေးကုန်ကျစိုက်ထုတ်ရမှု လျော့နည်းစေပြီး လက်လှမ်းမှီသော ကျန်းမာရေးစောင့်ရှောက်မှုရရှိစေခြင်းနှင့် အခြေခံ စားသောက်ကုန်များ ထောက်ပံ့ပေးခြင်းတို့ကို  အလေးထား ဆောင်ရွက်ပေးလျက်ရှိပါကြောင်း၊ လစဉ်ပင်စင်လစာထုတ်ရက်နေ့များတွင် အငြိမ်းစားနိုင်ငံ့ ဝန်ထမ်းများအား အလှည့်ကျစနစ်ဖြင့် လစဉ် ကျန်းမာရေး စစ်ဆေးပေးမည့် အစီအစဉ်များနှင့် အငြိမ်းစားနိုင်ငံ့ ဝန်ထမ်းများအတွက် အခြေခံစားသောက်ကုန်များကို ဆက်လက်၍ ပိုမိုထောက်ပံ့ပေးနိုင်ရေးအတွက်လည်း စီစဉ်ဆောင်ရွက် ပေးသွားမည်ဖြစ်ပါကြောင်း ပြောကြားသည်။

ထို့နောက် ပြည်နယ်ဝန်ကြီးချုပ်နှင့် ပြည်နယ်ဝန်ကြီးများက အငြိမ်းစားနိုင်ငံဝန်ထမ်းများအား အခြေခံစားသောက်ကုန်များနှင့် စားသောက်ဖွယ်ရာများကို ထောက်ပံ့ပေးအပ်ခဲ့သည်။

ဆက်လက်၍ ပြည်နယ်ဝန်ကြီးချုပ်က မော်လမြိုင်မြို့၊ အထွေထွေရောဂါကုဆေးရုံကြီး၌ သမားတော်ကြီးများ၊ ကျန်းမာရေးဝန်ထမ်းများက အငြိမ်းစားနိုင်ငံဝန်ထမ်းများအား ကျန်းမာရေး စမ်းသပ်စစ်ဆေး၊ ကုသပေးနေမှုအပေါ် လှည့်လည်ကြည့်ရှုအားပေးခဲ့ပြီး ကျန်းမာရေးစောင့်ရှောက်မှု လာရောက်ခံယူကြသည့် အငြိမ်းစားနိုင်ငံ့ဝန်ထမ်းများအား ရင်းရင်းနှီးနှီး လိုက်လံနှုတ်ဆက်ခဲ့သည်။

မွန်ပြည်နယ်အစိုးရအဖွဲ့၏ ဦးဆောင်မှုဖြင့် မော်လမြိုင်မြို့၊ ဘဏ်ခွဲ(၁)၊ ဘဏ်ခွဲ(၂)တို့တွင် ပင်စင်ထုတ်ယူနေသော အငြိမ်းစားနိုင်ငံ့ဝန်ထမ်း(၃၀၀)ဦးအား အခြေခံစားကုန်ဖြစ်သော ဆန် (၁)ပြည်၊ ကြက်ဥ(၁၀)လုံး၊ တန်ဖိုးငွေအားဖြင့် ငွေကျပ်(၂၇)သိန်းနီးပါး  ကူညီဆောင်ရွက် ပေးခဲ့ကြကြောင်း သိရသည်။

စည်သူ

https://t.me/MyanmarNationalPost