နေပြည်တော်၊ နိုဝင်ဘာ ၁၁
မြန်မာနိုင်ငံအတွင်းသို့ ထိုင်းနိုင်ငံအပါအဝင် အိမ်နီးချင်းနိုင်ငံအချို့ကို တစ်ဆင့်ခံဖြတ်သန်း၍ နယ်စပ်လမ်းကြောင်းများမှတစ်ဆင့် တရားမဝင် ဝင်ရောက်လာပြီး ကရင်ပြည်နယ် မြဝတီမြို့ မဲ့ထော်သလေး KK Park နယ်မြေများတွင် အွန်လိုင်းလိမ်လည်မှုများ၊ အွန်လိုင်းလောင်းကစားမှုများနှင့် ဒုစရိုက်မှုများကျူးလွန်ခဲ့ကြသည့် ပြည်ပနိုင်ငံသားများကို စစ်ဆေးဖော်ထုတ်ကာ သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ စနစ်တကျလွှဲပြောင်းပေးအပ်လျက်ရှိသည့်အပြင် ၄င်းတို့ စုဖွဲ့နေထိုင်ခဲ့ကြသည့် KK Park အတွင်း ဇုန်အလိုက် အဆောက်အအုံများ ဖြိုချဖျက်ဆီးရှင်းလင်းလျက်ရှိသည်။
အဆိုပါ KK Park နယ်မြေအတွင်းရှိ ဇုန် (A) အတွင်း၌ အဆောက်အအုံ စုစုပေါင်း ၁၄၈ လုံးရှိပြီး ၎င်းနေရာ၌ အွန်လိုင်းလိမ်လည်မှုများ၊ အွန်လိုင်းလောင်းကစားမှုများနှင့် ဒုစရိုက်မှုများ ထပ်မံပြီး မလုပ်ဆောင်နိုင်ရန်အတွက် အဆောက်အအုံအားလုံးကို ဖြိုချဖျက်ဆီးသွားမည်ဖြစ်ကြောင်း၊ အဆောက်အအုံ ၁၁၀ လုံးအား ဖြိုချဖျက်ဆီးပြီးဖြစ်ကြောင်း၊ ကျန်ရှိသည့် အဆောက်အအုံ ၅၂၅ လုံးကိုလည်း ဆက်လက်ဖြိုချဖျက်ဆီးသွားမည်ဖြစ်ကြောင်း၊ မြဝတီ-မဲ့ထော်သလေး KK Park နယ်မြေအတွင်း အွန်လိုင်းလောင်းကစားမှုများ၊ အွန်လိုင်းလိမ်လည်မှုများနှင့် ဒုစရိုက်မှုများ ပြုလုပ်သည့် ဇုန် ၃ ဇုန်တွင် အဆောက်အအုံ စုစုပေါင်း ၆၃၅ လုံးရှိကြောင်း သိရှိရသည်။
ထို့အပြင် ဇုန် (B) တွင်လည်း တစ်ထပ် လူနေအဆောက်အအုံ ၇ လုံး၊ နှစ်ထပ်လူနေအဆောက်အအုံ ၂၉ လုံး၊ သုံးထပ်လူနေအဆောက်အအုံ ၅ လုံး၊ ဆောက်လုပ်ဆဲလေးထပ်အဆောက်အအုံ ၇ လုံး၊ ဆောက်လုပ်ဆဲ ငါးထပ်အဆောက်အအုံ ၅ လုံးနှင့် ဂိုဒေါင်တစ်ထပ် အလုံး ၂၀ စုစုပေါင်း ၇၃ လုံးရှိကြောင်း သိရှိရသည်။
အလားတူ ဇုန် (C) တွင်လည်း တစ်ထပ်လူနေအိမ် ၃၃ လုံး၊ နှစ်ထပ်လူနေအိမ် ၂၁၆ လုံး၊ သုံးထပ်လူနေအိမ် ၄၂ လုံး၊ လေးထပ်လူနေအိမ် ၃၉ လုံး၊ ငါးထပ်လူနေအိမ် ၁၂ လုံး၊ ခြောက်ထပ်လူနေအိမ် ၄ လုံး၊ ဘတ်စကတ်ဘောကွင်း ၁ ခု၊ ဆေးရုံ ၂ လုံး၊ နှစ်ထပ် SPA အဆောက်အအုံ ၁ လုံး၊ တစ်ထပ် SPA အဆောက်အအုံ ၁ လုံး၊ နှစ်ထပ်ဈေးဆိုင်တန်း ၅ လုံး၊ နှစ်ထပ်စူပါမားကတ် ၁ လုံး၊ တစ်ထပ် စူပါမားကတ် ၁ လုံး၊ ငါးထပ် ဟိုတယ် ၁ လုံး၊ လေးထပ်ဟိုတယ် ၁ လုံး၊ တစ်ထပ် ဂိုဒေါင် ၃၅ လုံး၊ ဆေးခန်း ၂ လုံး၊ ၂ ထပ် မှန်ဆောင် ၁ လုံး၊ နှစ်ထပ် Club ၁ ခု၊ နှစ်ထပ် KTV ၁ လုံး၊ တစ်ထပ်စားဖိုဆောင် ၂ လုံး၊ ရေစုကန် ၁ လုံး၊ တစ်ထပ်ဂိုဒေါင်ကြီး ၆ လုံး၊ တစ်ထပ်လူနေအိမ် တန်းလျား ၅ လုံး စုစုပေါင်း ၄၁၄ လုံးရှိကြောင်း သိရှိရသည်။
KK Park နယ်မြေအတွင်း နယ်စပ်လမ်းကြောင်းများမှတစ်ဆင့် တရားမဝင် ဝင်ရောက်ပြီး အွန်လိုင်းလောင်းကစားမှုများနှင့် ဒုစရိုက်မှုများကျူးလွန်ခဲ့ကြသည့် ပြည်ပနိုင်ငံသား ၉၀ ရာခိုင်နှုန်းသည် ထိုင်းနိုင်ငံမှတစ်ဆင့်ခံ၍ နယ်စပ်ဖြတ်ကျော်ရောက်ရှိလာသည့် ဖြစ်စဉ်များသည် အများစုဖြစ်ပြီး KK Park နယ်မြေအတွင်း အွန်လိုင်းလောင်းကစားမှုများ၊ အွန်လိုင်းလိမ်လည်မှုများနှင့် ဒုစရိုက်မှုများ ပြုလုပ်သည့် ဇုန်သုံးဇုန်တွင် အသုံးပြုနိုင်သော အဆောက်အအုံများအတွက် လိုအပ်သည့် ပစ္စည်းများ၊ မီးစက်များ၊ အင်တာနက် Starlink စက်များ၊ လူသုံးကုန်ပစ္စည်းများနှင့် အခြေခံစားသောက်ကုန်ပစ္စည်းများ၊ စက်သုံးဆီများနှင့် အခြားအသုံးဆောင်ပစ္စည်းများကို ထိုင်းကုန်သည်များက တရားမဝင်လမ်းကြောင်းများမှတဆင့် ထောက်ပံ့ခြင်းနှင့် ရောင်းချခြင်းများပြုလုပ်ခဲ့ခြင်းဖြစ်ကြောင်း သိရသည်။ မြဝတီမြို့ မဲ့ထော်သလေး-KK Park နယ်မြေသို့ တရားမဝင်လမ်းကြောင်းများမှတစ်ဆင့် ဝင်ရောက်ခဲ့သည့် အိန္ဒိယနိုင်ငံသား ၄၀ ၊ နီပေါနိုင်ငံသား ၁၂ ဦးနှင့် တောင်ကိုရီးယားနိုင်ငံသား တစ်ဦး၊ စုစုပေါင်း ပြည်ပနိုင်ငံသား ၅၃ ဦးတို့ကို ယနေ့တွင် ထပ်မံစစ်ဆေးဖော်ထုတ်ထိန်းသိမ်းနိုင်ခဲ့သည်။
သို့ဖြစ်၍ ၂၀၂၅ ခုနှစ်၊ ဇန်နဝါရီ ၃၀ ရက်မှ နိုဝင်ဘာ ၁၁ ရက်အထိ မြန်မာနိုင်ငံအတွင်းသို့ တရားမဝင် ဝင်ရောက်လာသည့် ပြည်ပနိုင်ငံသား စုစုပေါင်း ၁၀၈၁၅ ဦး စစ်ဆေးဖော်ထုတ်ထိန်းသိမ်းနိုင်ခဲ့ပြီး ယင်းတို့အနက်မှ ၉၅၃၆ ဦးကို ထိုင်းနိုင်ငံမှတစ်ဆင့် သက်ဆိုင်ရာနိုင်ငံများသို့ ဥပဒေလုပ်ထုံးလုပ်နည်းများနှင့်အညီ စနစ်တကျပြည်နှင်လွှဲပြောင်းပေးနိုင်ခဲ့ကာ ကျန်ရှိသည့် ပြည်ပနိုင်ငံသား ၁၂၇၉ ဦးကို သက်ဆိုင်ရာနိုင်ငံများသို့ လွှဲပြောင်းပေးရန် အသင့်ဖြစ်နေပြီဖြစ်ကြောင်း သိရသည်။
ယခုအခါ နိုင်ငံတော်အစိုးရအနေဖြင့် အွန်လိုင်းအသုံးပြုလိမ်လည်မှု (Online Scam) နှင့် အွန်လိုင်းလောင်းကစားမှု (Online Gambling) လုပ်ဆောင်နေသူများ၊ ပါဝင်ပတ်သက်သူများအားလုံးကို အိမ်နီးချင်းနိုင်ငံများအပါအဝင် နိုင်ငံတကာမှ အဖွဲ့အစည်းများနှင့် စဉ်ဆက်မပြတ် ပူးပေါင်းဖော်ထုတ်အရေးယူဆောင်ရွက်လျက်ရှိသည်။
https://t.me/MyanmarNationalPost
ليست هناك تعليقات:
إرسال تعليق