MNP ၊ ဇန်နဝါရီ ၁၂
မြန်မာနိုင်ငံမြောက်ပိုင်းသို့ ကူညီသည့် ကိုဗစ်ကာကွယ်ဆေး ပထမအသုတ် ၇သိန်းကျော်အား (ဇန်နဝါရီ ၁၁ရက်) တွင် ကူမင်းမြို့မှစတင် ပို့ဆောင်ခဲ့ကြောင်း မြန်မာနိုင်ငံဆိုင်ရာ တရုတ်သံရုံးက သတင်းထုတ်ပြန်သည်။
တရုတ်နိုင်ငံမှ ကိုဗစ်ကာကွယ်ဆေး ၇၄၆၈၀၀ အား ယူနန်ပြည်နယ် ကူမင်းမြို့မှ စတင်၍ သီးသန့်ပို့ဆောင်သည့်ယာဉ် ၇ စီးဖြင့် မြန်မာနယ်စပ်တလျှောက်ရှိ ယူနန်ပြည်နယ်၏ နယ်စပ်မြို့များသို့ ပို့ဆောင်ခဲ့ပြီး မနက်ဖြန် ဇန်နဝါရီ ၁၂ ရက်နေ့တွင် တာလော့၊ ရွှေလီ၊ ရင်ကျန်း၊ နမ်စန်၊ ဟိုချောင်၊ မုန့်လျန် စသည့်နယ်စပ်ဂိတ်များမှတစ်ဆင့် မြန်မာနိုင်ငံသို့ လွှဲပြောင်းပေးအပ်မည်ဟု ထုတ်ပြန်ထားသည်။
ဒုတိယအသုတ် ကိုဗစ်ကာကွယ်ဆေး (၂၅၃၂၀၀)အား ဖေဖော်ဝါရီလ ၉ ရက်နေ့တွင် ပေကျင်းမြို့မှ စတင်ပို့ဆောင်မည်ဖြစ်ပြီး မတ်လ ၁၀ ရက်နေ့မတိုင်မီ အသုတ်ခွဲပို့ဆောင်၍ မြန်မာနိုင်ငံသို့ ကာကွယ်ဆေး အားလုံး လွှဲပြောင်းပေးအပ်မည် ဖြစ်သည်။ အဆိုပါ ကာကွယ်ဆေး ၁ သန်းအား တရုတ်နိုင်ငံနှင့် ထိစပ်နေသော မြန်မာနိုင်ငံ ရှမ်းပြည်နယ်၊ ကချင်ပြည်နယ်တို့တွင် အသုံးပြုမည်ဟု တရုတ်သံရုံးက သတင်းထုတ်ပြန်ထားသည်။
ကိုဗစ်-၁၉ ကပ်ရောဂါဖြစ်ပွားပြီးနောက် တရုတ်နိုင်ငံမှ မြန်မာနိုင်ငံသို့ ထောက်ပံ့ပေးသည့် ကိုဗစ်-၁၉ ကာကွယ်ဆေးစုစုပေါင်းအရေအတွက်မှာ သန်း ၄၀ ရှိပြီဖြစ်ပြီး မြန်မာနိုင်ငံ ရရှိထားသည့် ကိုဗစ်ကာကွယ်ဆေးများ၏ ၉၀% ကျော် ရှိကြောင်း တရုတ်သံရုံးက ဆိုသည်။
သတင်း - သီဟ
https://t.me/MyanmarNationalPost
www.mnpnewsagency.com
No comments:
Post a Comment