MNP ၊ ဧပြီ ၁၃
ရခိုင်ပြည်နယ် မောင်တောမြို့၌ (ပထမ)အကြိမ်မြောက် ရခိုင်ရိုးရာ နံ့သာသွေးပြိုင်ပွဲကို ခရိုင်စီမံအုပ်ချုပ်ရေးအဖွဲ့ဦးဆောင်ကြီးကြပ်မှုဖြင့် ယနေ့ နံနက်(၉)နာရီက ဗဟိုလ်မဏ္ဍပ်တွင် စည်ကားသိုက်မြိုက်စွာကျင်းပခဲ့သည်။
ရှေးဦးစွာ ခရိုင်စီမံအုပ်ချုပ်ရေးအဖွဲ့ဝင်(၂) ဦးအောင်မြင့်သိန်းက ရခိုင်ရိုးရာနံ့သာသွေးပြိင်ပွဲ ကျင်းပရခြင်း နှင့်ပတ်သက်၍ ပြောကြားခဲ့ပြီး မြို့နယ်စီမံအဖွဲ့ဝင်(၂) ဦးဦးခင်မောင်က ပြိုင်ပွဲစည်းမျဉ်း စည်းကမ်းများအား ရှင်းလင်း ပြောကြားခဲ့သည်။
ထိုနောက်ရခိုင်ရိုးရာနံ့သာသွေးပြိုင်ပွဲကိုကျင်းပရာ ပြိုင်ပွဲဝင်အသင်း ၅ သင်း ပါဝင်ယှဉ်ပြိုင်ကြပြီး ဒိုင်လူကြီး များက အကဲဖြတ်အမှတ်ပေးကြသည်။ဆက်လက်၍ ရခိုင် ရိုးရာသင်္ကြန်ယိမ်းအကများဖြင့် သီဆိုဖျော်ဖြေပေးကြပြီး ခရိုင်/ မြို့နယ်စီမံအုပ်ချုပ်ရေး အဖွဲ့ဥက္ကဌများ နှင့် အဖွဲ့ဝင် များ၊ ဌာနဆိုင်ရာများ၊ ရပ်မိရပ်ဖ များတက်ရောက် ကြည့်ရှု့အားပေး ခဲ့ ကြသည်။
ပြိုင်ပွဲဝင်အသင်းများအနေဖြင့် နံ့သာသွေးပြိုင်ဝင်အသင်း တစ်သင်းလျှင် ပြိုင်ပွဲ ဝင်(၁၂)ဦးစီ ပါဝင် ယှဉ်ပြိုင်ကြပြီး၊ ဝတ်စား ဆင်ယင်မှု နှင့် သပ်ရပ်မှု ၊ အသင်းအဖွဲ့၏ လှုပ်ရှားမှု ၊ ညီညာမှု၊ သပ်ရပ်မှု ၊ နံ့သာသွေးရာတွင် သန့်ရှင်းသပ်ရပ်မှု ၊ စည်းစနစ်ကျမှု ၊ အချိန်ကိုက်လှုပ်ရှားနိုင်မှု ၊ ဟန်ပန်အမှုအရာ စသည့်ဖြင့် အမှတ်ပေး မည်ဖြစ်ကြောင်း နံ့သာသွေးပြိုင်ပွဲ အမှတ်ပေးစည်းမျဉ်းအဖွဲ့ထံမှ သိရသည်။
ပြိုင်ပွဲတွင်ဆုရရှိသည့်အသင်းများကို ဧပြီ ၁၇ ရက်နေ့တွင် ပထမ ၊ ဒုတိယ ၊ တတိယ ၊ နှစ်သိမ့်ဆု စသည့် ဆုများ ရရှိခဲ့သည့် အသင်းများအား ဆုအသီးသီး ချီးမြှင့် ပေးမည်ဖြစ်ကြောင်း သိရသည်။
သတင်း - သက်လွင်စိုး၊ အောင်ကျော်စိန်
https://t.me/MyanmarNationalPost
No comments:
Post a Comment