မအီမြို့တွင် မင်္ဂလမာရ်အောင်စွယ်တော်မြတ်စေတီတော် ထီးတော်တင်မင်္ဂလာအခမ်းအနား ကျင်းပပူဇော်

MNP ၊ မေ ၁၀

ရခိုင်ပြည်နယ်၊ သံတွဲခရိုင်၊ တောင်ကုတ်မြို့နယ်၊ မအီမြို့တွင် အဂ္ဂမဟာသဒ္ဓမ္မဇောတိကဓဇ ဝနဝါသီအရှင်ဝါယာမိန္ဒ(အဂ္ဂမဟာကမ္မဌာနာစရိယ)၊ ရတနာ့မာရ်အောင်တောရဓမ္မရိပ်သာများ၏ နာယကချုပ်ဆရာတော် မြောက်ဦးဆရာတော်ဘုရားကြီးမှ ဦးဆောင်ကြီးမှူးဒါနပြု၍ ၇ ရက်သားသမီးများ၏ ကောင်းမှုအလှူတို့ဖြင့် မအီမြို့၊ လက်ပံကျေးရွာ အဝင်လမ်းဘေး၊ ဆိပ်ဖူးတောင်ကွင်းအရပ်၌ တည်ထားကိုးကွယ်သည့် မာရ်ငါးပါးစေတီတော်များအနက်မှ မင်္ဂလမာရ်အောင်စွယ်တော်မြတ် စေတီတော် ထီးတော်တင်မင်္ဂလာပူဇော်ပွဲအခမ်းအနားကို ယနေ့နံနက်ပိုင်းကကျင်းပပြုလုပ်ခဲ့သည်။

ထိုသို့ ထီးတော်တင်ပူဇော်ပွဲနေ့တိုင်းတွင် မြောက်ဦးအထူးတရားပွဲများကို ညနေ ၇ နာရီအချိန်တိုင်းတွင် မအီမြို့၊ ရတနာ့မာရ်အောင်တောရဓမ္မရိပ်သာကျောင်းရှိ လျောင်းတော်မူဘုရားကြီးရှေ့ ဘုရားရင်ပြင်တွင် ကျင်းပပြုလုပ်လျက်ရှိကြောင်းသိရသည်။  "မြောက်ဦးဆရာတော် အရှင်ဝါယာမိန္ဒ " facebook page နှင့် နီးစပ်ရာမြို့နယ်များတွင်လည်း ဗီနိုင်းကြော်ငြာများစိုက်ထူ၍ ဓမ္မမိတ်ဆွေအသီးသီးသို့ ဤသို့ မာရ်ငါးပါးစေတီတော်များ ထီးတော်တင်ပူဇော်ပွဲနှင့် မြောက်ဦးအထူးတရားပွဲများကို (၈)ညတိုင်တိုင်ကျင်းပမည်ဖြစ်ကြောင်းတို့ကို အသိပေးဖိတ်ခေါ်ထားပြီးဖြစ်ပါကြောင်း၊ ယနေ့ကဆုန်လဆန်း(၁၁)ရက်နေ့တွင် စတုတ္ထနေ့အနေဖြင့် ဉာဏ်တော် ၆၃ ပေအမြင့်ရှိ မင်္ဂလမာရ်အောင်စွယ်တော်မြတ်စေတီတော်ကို ထီးတော်တင်ပူဇော်ခြင်းဖြစ်ပါကြောင်း၊ ထီးတော်တင်ပူဇော်ခြင်းမပြုမီ ဆရာတော်သံဃာတော်များက မင်္ဂလမာရ်အောင်စွယ်တော်မြတ်စေတီတော်အားခြံရံလျက် မေတ္တာသုတ်ပရိတ်တရားတော်အား ရွတ်ဖတ်သရဇ္ဈာယ်ပူဇော်ခဲ့ကြပြီး ထီးတော်တင်မင်္ဂလာကိုစတင်ခဲ့ခြင်းဖြစ်ကြောင်း မအီမြို့၊ ရတနာ့မာရ်အောင်တောရဓမ္မရိပ်သာကျောင်းမှသိရသည်။

အဆိုပါ ထီးတော်တင်မင်္ဂလာအခမ်းအနားသို့  မြောက်ဦးဆရာတော်ဘုရားကြီးကိုယ်တော်တိုင် တက်ရောက်ပူဇော်ခဲ့ပြီး ပင့်ဖိတ်ထားသည့် သံဃာတော်များ၊ မအီမြို့ပေါ်ပြည်သူများနှင့် ပတ်ဝန်းကျင်ကျေးရွာများမှ ရဟန်းရှင်လူပြည်သူများ စည်ကားသိုက်မြိုက်စွာရောက်ရှိခဲ့ကြပြီး မနက်ဖြန် ကဆုန်လဆန်း(၁၂)ရက်၊ (၁၁-၅-၂၀၂၂)ရက်နေ့တွင် မာရ်ငါးပါးစေတီတော်များအနက်မှ လောကမာရ်အောင်စွယ်တော်မြတ်စေတီတော် ထီးတော်တင်မင်္ဂလာအခမ်းအနားကိုပူဇော်ဆောင်ရွက်သွားမည်ဖြစ်ကြောင်းသိရသည်။

သတင်း - မောင်မောင်ဌေး

https://t.me/MyanmarNationalPost