ပဲခူး၊ သြဂုတ် ၁
ပဲခူးတိုင်းဒေသကြီးအစိုးရအဖွဲ့ရုံး၊ တော်ဝင်ဟံသာ အစည်းအဝေးခန်းမ၌ ၃၀-၇-၂၀၂၅ ရက်နေ့က ပဲခူးတိုင်းဒေသကြီးအစိုးရဖွဲ့၊ ဝန်ကြီးချုပ် ဦးမျိုးဆွေဝင်း ဦးဆောင်၍ ၂၀၂၅-၂၀၂၆ ပညာသင်နှစ်၊ တက္ကသိုလ်ဝင်စားမေးပွဲ အောင်ချက်မြင့်မားရေး လုပ်ငန်းညှိနှိုင်းအစည်းအဝေးအား တိုင်းဒေသကြီး/ ခရိုင်/ မြို့နယ် ပညာရေးမှူးများနှင့် ကျင်းပပြုလုပ်ခဲ့သည်။
ရှေးဦးစွာ ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ် ဦးမျိုးဆွေဝင်းက ယခင်နှစ်၏ အားနည်းချက်များကို ပြန်လည်သုံးသပ်၍ ယခုပညာသင်နှစ်တွင် တက္ကသိုလ်ဝင်စားမေးပွဲ အောင်ချက်မြင့်မားရေးကို အမျိုးသားရေးတာဝန်တစ်ရပ်အဖြစ်ခံယူ၍ အားလုံးဝိုင်းဝန်း ကြိုးစားဆောင်ရွက်သွားရမှာဖြစ်ကြောင်း၊ ပညာသင်ကြားရေးနှင့် ပတ်သက်၍ လိုအပ်ချက်များကို ဘက်ပေါင်းစုံမှ ဖြည့်ဆည်းပေးရွက်ပေးသွားမှာဖြစ်ပြီး မြို့နယ်အလိုက် ဖွင့်လှစ်ပေးထားသည့် ကျောင်းပြင်ပ ပညာရေးစခန်းများကိုလည်း အောင်မြင်မှုများ ရရှိစေရေး အလေးထားဆောင်ရွက်သွားရန် ပြောကြားခဲ့သည်။
ထို့နောက် ပဲခူးတိုင်းဒေသကြီးအစိုးရအဖွဲ့၊ လူမှုရေးရာဝန်ကြီး ဦးမျိုးအောင်က တက္ကသိုလ်ဝင်စားမေးပွဲ အောင်ချက်မြင့်မားရေးနှင့် ပတ်သက်၍ ဆောင်ရွက်သွားမည့် လုပ်ငန်းစဉ်များအား ရှင်းလင်းတင်ပြခဲ့ပြီး တက်ရောက်လာသည့် တိုင်းဒေသကြီး ပညာရေးမှူးနှင့် ပဲခူးခရိုင်၊ တောင်ငူခရိုင်၊ ညောင်လေးပင်ခရိုင်၊ ပြည်ခရိုင်၊ သာယာဝတီခရိုင်နှင့် နတ်တလင်းခရိုင်တို့မှ ခရိုင်ပညာရေးမှူးများက မြို့နယ်တစ်ခုချင်းအလိုက် တက္ကသိုလ်ဝင်စာမေးပွဲအောင်မြင်ခဲ့မှု အခြေအနေနှင့် လာမည့် ၂၀၂၅-၂၀၂၆ ပညာသင်နှစ်၊ တက္ကသိုလ်ဝင်စားမေးပွဲ အောင်ချက်မြင့်မားရေးဖြေရှင်းဆောင်ရွက်သွားမည့် အစီအမံများနှင့် လုပ်ငန်းစီမံချက်များအား ရှင်းလင်းတင်ပြခဲ့ရာ တိုင်းဒေသကြီး ဝန်ကြီးချုပ် ဦးမျိုးဆွေဝင်းက မြို့နယ်တစ်ခုချင်းအလိုက် တင်ပြချက်များနှင့်ပတ်သက်၍ အသေးစိတ်ဖြည့်စွက်လမ်းညွှန်မှာကြားခဲ့ကြောင်း သတင်းရရှိသည်။
သက်ဖြိုးကြိုင်
https://t.me/MyanmarNationalPost
No comments:
Post a Comment