ဒက္ခိဏစက်မှုဇုန် လျင်မြန်စွာဖွံ့ဖြိုးတိုးတက်ရန် အခွင့်အလမ်းရှိ၍ စုပေါင်းဆောင်ရွက်ရမည်ဖြစ်ကြောင်း ပြည်ထောင်စုဝန်ကြီး ဒေါက်တာချာလီသန်း မှာကြား

နေပြည်တော်၊ နိုဝင်ဘာ ၁၆

စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းသည် တာဝန်ရှိသူများနှင့်အတူ ယမန်နေ့က ပြည်ထောင်စုနယ်မြေ နေပြည်တော် ဒက္ခိဏသီရိမြို့နယ်ရှိ စက်မှုဇုန်စီမံခန့်ခွဲမှု ကော်မတီရုံးသို့ ရောက်ရှိပြီး အစည်းအဝေးခန်းမ၌ စက်မှုဇုန်စီမံခန့်ခွဲမှုကော်မတီဥက္ကဋ္ဌနှင့် အဖွဲ့ဝင်များ၊ စက်မှုလုပ်ငန်းရှင်များ၊ ရပ်ကွက်/ ကျေးရွာအုပ်ချုပ် ရေးမှူးများနှင့် တွေ့ဆုံသည်။

ထိုသို့ တွေ့ဆုံစဉ် ပြည်ထောင်စုဝန်ကြီးက စက်မှုဇုန်များ စနစ်တကျ ဖွံ့ဖြိုးတိုးတက်စေရေး အတွက် ဥပဒေ၊ နည်းဥပဒေများကို ထုတ်ပြန်ပြဋ္ဌာန်းထားရှိပြီးဖြစ်၍ ပြဋ္ဌာန်းချက်များနှင့်အညီ ဒေသဆိုင်ရာကော်မတီ၊ စက်မှုဇုန်စီမံ ခန့်ခွဲရေးကော်မတီတို့မှ စက်မှုဇုန်များ ဖွံ့ဖြိုးတိုးတက်အောင် အဓိက ဆောင်ရွက်ရမည် ဖြစ်ကြောင်း၊ ထို့ပြင် စက်မှုလုပ်ငန်းများ ဆောင်ရွက်ခြင်းကြောင့် ပတ်ဝန်းကျင် ထိခိုက်မှုမရှိစေရေးအတွက်လည်း အမြဲမပြတ် စစ်ဆေးဆောင်ရွက်နေရမည်ဖြစ်ကြောင်း၊ ဒက္ခိဏစက်မှုဇုန်အနေဖြင့် အခြေခံအဆောက်အအုံများ ပြည့်စုံကောင်းမွန်သဖြင့် လျင်မြန်စွာ ဖွံ့ဖြိုးတိုးတက်ရန် အခွင့်အလမ်း ရှိ၍ ညီညွတ်စွာဖြင့် စုပေါင်းဆောင်ရွက်ရမည်ဖြစ်ကြောင်း။

စက်မှုဇုန်အတွင်းရှိ စက်ရုံ တစ်ခုချင်းစီ၏ လအလိုက် ကုန်ထုတ်လုပ်မှု၊ ဝန်ထမ်းခန့်အပ်ထား မှု၊ ထုတ်ကုန်အမျိုးအစားတို့ကို ပြုစုထားရှိရမည့်အပြင် စက်မှုဇုန်၏ အားနည်းချက်၊ အားသာချက် များကို ဖော်ထုတ်၍ သုံးသပ်ဆောင်ရွက်ရမည်ဖြစ်ကြောင်း၊ စက်မှုဇုန် စဉ်ဆက်မပြတ် ဖွံ့ဖြိုး တိုးတက်ရေးအတွက် လူ့စွမ်းအားအရင်းအမြစ်များ ဖွံ့ဖြိုးတိုးတက်ရေး အစဉ်အမြဲ စီမံဆောင်ရွက် သွားရန် လိုအပ်ကြောင်း။

 ထို့ပြင် စက်ရုံများအလိုက် ကုန်ထုတ်လုပ်မှုလုပ်ငန်းများ ဆောင်ရွက်စဉ် ကြုံတွေ့နေရ သည့် အခက်အခဲများကို ဖြေရှင်း နိုင်ရန်နှင့် သုတေသနလုပ်ငန်းများကို ဆောင်ရွက်နိုင်ရန်တို့ အတွက် ဒေသတွင်းရှိ တက္ကသိုလ်၊ ဒီဂရီကောလိပ်များနှင့် ချိတ်ဆက်၍ ဆောင်ရွက်ရမည်ဖြစ်ကြောင်း၊ တက္ကသိုလ်၊ ဒီဂရီကောလိပ်များမှ ဆရာ ဆရာမများ၊ ကျောင်းသား ကျောင်းသူများကိုလည်း စက်မှု ဇုန်သို့ ဖိတ်ခေါ်၍ စက်မှုဇုန်၏ လုပ်ငန်းအကောင်အထည်ဖော်ဆောင်ရွက်နေမှု အခြေအနေတို့ ကို ရှင်းလင်းပြသသွားရန် လိုအပ်ကြောင်း၊ စက်မှုဝန်ကြီးဌာနအနေ ဖြင့် စက်မှုဇုန်နှင့် စက်မှုလုပ်ငန်း များ ဖွံ့ဖြိုးတိုးတက်ရေးအတွက် တာဝန်ခံဝန်ကြီးဌာနအနေဖြင့် ဆောင်ရွက်လျက်ရှိသဖြင့် လိုအပ် ချက်များကို ဆက်စပ်ဝန်ကြီးဌာနများ၊ အသင်းအဖွဲ့များနှင့် ချိတ်ဆက်ဖြည့်ဆည်းဆောင်ရွက် ပေးသွားမည်ဖြစ်ကြောင်း မှာကြားသည်။

ထို့နောက် စက်မှုဇုန်စီမံခန့်ခွဲရေးကော်မတီဥက္ကဋ္ဌက စက်မှုဇုန် အတွင်းရှိ စက်မှုဇုန် လုပ်ငန်းများ လည်ပတ်အကောင်အထည်ဖော်ဆောင်ရွက်နေမှု၊ စက်မှုဇုန်ဖွံ့ဖြိုး တိုးတက်ရေးအတွက် ဆောင်ရွက် နေမှု၊ ပြဋ္ဌာန်းထားရှိသည့် စက်မှုဇုန်ဥပဒေ၊ နည်းဥပဒေများနှင့်အညီ လိုက်နာ အကောင်အထည်ဖော် ဆောင်ရွက်နေမှုတို့ကိုလည်းကောင်း၊ နေပြည်တော် စက်မှုကြီးကြပ်ရေးနှင့်စစ်ဆေးရေးဦးစီးဌာန ဦးစီးမှူးက စက်မှုဇုန် အတွက် လိုအပ်သော လူသားအရင်းအမြစ်များ ဖွံ့ဖြိုးတိုးတက်စေရေးအတွက် ဂဟေဆက် ဘာသာရပ်၊ စိုက်ပျိုးရေးလုပ်ငန်းသုံး အင်ဂျင်အမျိုးမျိုး ပြုပြင်ထိန်းသိမ်းခြင်း ဘာသာရပ်၊ လျှပ်စစ်သွယ်တန်းတပ်ဆင်ခြင်း ဘာသာရပ်သင်တန်းများ ဖွင့်လှစ် နိုင်ရေးအတွက် ပြင်ဆင်ဆောင် ရွက်ထားရှိမှုအခြေအနေတို့ကိုလည်းကောင်း တင်ပြကြရာ ပြည်ထောင်စုဝန်ကြီးက ဘာသာ ရပ်အလိုက် တက်ရောက်မည့် သင်တန်းသားများ အချိန်မီစာရင်း ပေးသွင်းနိုင်ရေး ညှိနှိုင်းပေါင်းစပ် ဆောင်ရွက်သွားရန်၊ တက္ကသိုလ်ဝင်တန်းတက်ရောက်ခဲ့ဖူးသည့်သူများအား ဝန်ကြီးဌာနမှ ဖွင့်လှစ်လျက်ရှိသည့် စက်မှု သင်တန်းကျောင်းများတွင် တက်ရောက်လေ့ကျင့်သင်ကြားနိုင်ရေး ကူညီ ဆောင်ရွက်ပေးသွားရန် မှာကြားခဲ့ကြောင်း သတင်းရရှိသည်။

https://t.me/MyanmarNationalPost