အကောင်းဆုံး ကြိုးစားပြီးတော့ ထိုင်းအသင်းကို အနိုင်ရအောင် ကစားသွားမှာပါ ဟု မြန်မာလက်ရွေးစင်အမျိုးသမီးအသင်းခေါင်းဆောင် ခင်မာလာထွန်း ပြော

ရန်ကုန်၊ ဇွန် ၈

မြန်မာနိုင်ငံဘောလုံးအဖွဲ့ချုပ်က ကြီးမှူးကျင်းပသည့် AYA Tri-Nation Cup 2026 ပြိုင်ပွဲ၏ စိတ်လှုပ်ရှားဖွယ် ပွဲစဉ်တစ်ပွဲဖြစ်သော မြန်မာ့လက်ရွေးစင် အမျိုးသမီးအသင်းနှင့် ထိုင်းလက်ရွေးစင် အမျိုးသမီးအသင်းတို့၏ ပွဲကြိုသတင်းစာရှင်းလင်းပွဲ (Pre-Match Press Conference) ကို ဇွန်လ ၈ ရက် နံနက် ၁၁:၀၀ နာရီက ရန်ကုန်မြို့ရှိ သုဝဏ္ဏအားကစားကွင်း သတင်းစာရှင်းလင်းပွဲခန်းမ၌ ကျင်းပခဲ့သည်။ 

အဆိုပါ သတင်းစာရှင်းလင်းပွဲသို့ အသင်းနှစ်သင်းမှ နည်းပြချုပ်များနှင့် အသင်းခေါင်းဆောင်များ တက်ရောက်ကာ ပွဲအတွက် ပြင်ဆင်မှုများနှင့် ရည်မှန်းချက်များကို ထည့်သွင်းပြောကြားခဲ့ကြသည်။ 

မြန်မာအမျိုးသမီးအသင်း နည်းပြချုပ် Mitsuo Kato -

“ထိုင်းအသင်းက မြန်မာအသင်းထက် ကမ္ဘာ့အဆင့်ရပ်တည်မှု မြင့်ပါတယ်။ ဒါကြောင့် ဒီပွဲက ကျွန်တော်တို့အတွက် တကယ့်ကို ခက်ခဲတဲ့ပွဲတစ်ပွဲ ဖြစ်လာမှာပါ။ ဒါပေမဲ့ ကျွန်တော်တို့ ကောင်းကောင်း ပြင်ဆင်ထားပါတယ်။ ကစားသမားတွေလည်း အဆင်သင့်ဖြစ်နေကြပါပြီ။ ဒါကြောင့် နောက်ထပ်ပွဲစဉ်တွေအတွက် အတွေ့အကြုံကောင်းတွေ ရလာဖို့ ဒီပွဲမှာ အကောင်းဆုံး ကြိုးစားကစားသွားမှာ ဖြစ်ပါတယ်။

ကျွန်တော် ထိုင်းနိုင်ငံမှာ ဖြတ်သန်းခဲ့စဉ်ကနဲ့ အခု မြန်မာနိုင်ငံမှာ နည်းပြအဖြစ် ဆောင်ရွက်နေတဲ့ အခြေအနေဟာ ကွာခြားမှု ရှိပါတယ်။ ကျွန်တော့်အနေနဲ့ ကစားသမားတွေရဲ့ အရည်အချင်းကို ပိုပြီး တိုးတက်လာအောင် လုပ်ဆောင်ပေးရမှာ ဖြစ်သလို၊ သူတို့ရဲ့ စွမ်းဆောင်ရည်တွေကိုလည်း မြှင့်တင်ပေးဖို့ လိုအပ်ပါတယ်။ ထိုင်းနိုင်ငံမှာ ရှိစဉ်ကပဲ ဖြစ်ဖြစ်၊ အခု မြန်မာနိုင်ငံမှာပဲ ဖြစ်ဖြစ် ကျွန်တော့်ရဲ့ အဓိက တာဝန်ကတော့ ကစားသမားတွေကို ပိုမို ကောင်းမွန်လာအောင် ပံ့ပိုးပေးဖို့ပဲ ဖြစ်ပါတယ်။"

အသင်းခေါင်းဆောင် ခင်မာလာထွန်း

"ကျွန်တော်တို့ အကောင်းဆုံး ပြင်ဆင်ထားပါတယ်။ အားလုံး အဆင်သင့် ဖြစ်နေပါပြီ။ ပြီးတော့ အဓိကအချက်ကတော့ ဒဏ်ရာရထားတဲ့ ကစားသမားတွေ မရှိဘူး။ ကျွန်တော်တို့ အဆင်သင့် ဖြစ်နေပြီဆိုတော့ အကောင်းဆုံး ကြိုးစားပြီးတော့ အနိုင်ရအောင် ကစားသွားမှာပါ။ 

ထိုင်းအမျိုးသမီးအသင်း နည်းပြချုပ် Natipong Sritong-In -

"ရလဒ်ပိုင်းမှာ ရှုံးတာ နိုင်တာထက် (အသင်းရဲ့ တိုးတက်မှုက) ပိုအရေးကြီးပါတယ်။ နိုင်ပွဲရဖို့ဆိုတာကတော့ တစ်ကဏ္ဍပေါ့။ ဒါပေမဲ့ ကျွန်တော့်အတွက်တော့ အသင်းကို ဘယ်လိုမျိုး ပိုမိုတိုးတက်ကောင်းမွန်လာအောင် လုပ်မလဲဆိုတာက ပထမဆုံး ဦးစားပေး ဖြစ်ပါတယ်။

ကျွန်တော့်အနေနဲ့ ဘယ်အသင်းကိုမဆို လျှော့တွက်တယ်လို့ တစ်ခါမှ မပြောခဲ့ဖူးပါဘူး။ ပြိုင်ဘက်တိုင်းကို အမြဲတမ်း သေချာခွဲခြမ်းစိတ်ဖြာ သုံးသပ်ပါတယ်။ ကျွန်တော်တို့ဟာ ထိုင်းအသင်းရဲ့ ကစားကွက်ပုံစံအတိုင်း ကစားနိုင်ဖို့ကိုပဲ အဓိက အာရုံစိုက်ထားတာပါ။ ဒါကြောင့် လက်ရှိမှာ ကျွန်တော့်အတွက် အရေးကြီးဆုံးနဲ့ အဓိက ဦးစားပေးကတော့ ထိုင်းအသင်းကို ကျွန်တော်တို့ရဲ့ ကိုယ်ပိုင်ကစားဟန်အတိုင်း ဘယ်လိုမျိုး ပိုမိုကောင်းမွန်လာအောင် လုပ်မလဲဆိုတာပါပဲ။ ဒါဟာ ကျွန်တော်တို့ရဲ့ ကြိုတင်ပြင်ဆင်မှုလည်း ဖြစ်ပါတယ်။" 

အသင်းခေါင်းဆောင် Saowalak Pengngam

"ဒီပွဲက ကျွန်တော်တို့အတွက် အတွေ့အကြုံကောင်းတွေ ရစေခဲ့သလို သင်ခန်းစာတွေလည်း အများကြီး ရရှိခဲ့ပါတယ်။ နောက်ထပ်ပွဲစဉ်တွေအတွက် ကျွန်တော်တို့ ပိုပြီး ပြင်ဆင်သွားမှာဖြစ်ပြီး၊ နည်းပြရဲ့ လမ်းညွှန်ချက်တွေအတိုင်း အကောင်းဆုံးဖြစ်အောင် ဆက်လက် ကြိုးစားသွားမှာပါ။"

#MNP #News