ဟူသီတွေရဲ့တိုက်ခိုက်မှုကြောင့် ဆော်ဒီ အကြီးဆုံးရေနံချက်စက်ရုံ ထိခိုက်သွားတယ်လို့ဆို

ဇူလိုင် - ၂၉ ( ဗုဒ္ဓဟူးနေ့ ) 

ဆော်ဒီအာရေးဗီးယားနိုင်ငံရဲ့ အကြီးဆုံး ရေနံစိမ်းပြုပြင်ထုတ်လုပ်ရေး စက်ရုံဟာ တနင်္လာနေ့က ဒရုန်းနဲ့ တိုက်ခိုက်ခံခဲ့ရတာကြောင့် ထိခိုက်ပျက်စီးမှုတွေ ရှိခဲ့တယ်လို့ ဂြိုဟ်တုဓာတ်ပုံတွေကို လေ့လာသုံးသပ်နေတဲ့ သတင်းရင်းမြစ်လေ့လာသူတွေနဲ့  ပင်လယ်ကွေ့ဒေသဆိုင်ရာ တာဝန်ရှိသူတစ်ဦးရဲ့ အဆိုအရ သိရပါတယ်။

အင်တာနက်ပေါ်မှာ ပျံ့နှံ့နေတဲ့ ဓာတ်ပုံတွေထဲမှာတော့ အက်ဘ်ကိခ်  စက်ရုံဝန်းအတွင်းကနေ မီးခိုးလုံးကြီးတွေ အထက်ကို တက်နေတာကို မြင်တွေ့ရပြီး စက်ရုံရဲ့ အစိတ်အပိုင်းအချို့မှာ မီးလောင်မှုတွေနဲ့ ထိခိုက်ပျက်စီးမှုကို အထင်အရှား တွေ့မြင်ရပါတယ်။

ယီမင်နိုင်ငံက ဟူသီလက်နက်ကိုင် အဖွဲ့က ဒီတိုက်ခိုက်မှုကို ၎င်းတို့ လုပ်ဆောင်ခဲ့တာဖြစ်ကြောင်း ဝန်ခံထားပြီး၊ စစ်ရေးပြောရေးဆိုခွင့်ရှိသူ ယာဟီးယား ဆာရီ  က ဆော်ဒီအာရေးဗီးယား အရှေ့ပိုင်းမှ [ယန်ဘူ  ဆိပ်ကမ်း] သို့ ရေနံစိမ်း သယ်ယူပို့ဆောင်ရေးနဲ့ ထောက်ပံ့ရေး လမ်းကြောင်းပေါ်ရှိ "အရေးပါပြီး ထိလွယ်ရှလွယ်တဲ့ စက်ရုံနေရာများကို" တိုက်ခိုက်ခဲ့ခြင်းဖြစ်ကြောင်း အိတ်စ်လူမှုကွန်ယက် စာမျက်နှာပေါ်မှာ ဖော်ပြထားပါတယ်။

ဆော်ဒီအာရေးဗီးယား အရှေ့ပိုင်းခရိုင်မှာရှိတဲ့ အက်ဘ်ကိခ်  စက်ရုံဟာ ကမ္ဘာ့အကြီးဆုံး ရေနံစိမ်း ပြုပြင်ထိန်းသိမ်းရေး စက်ရုံဖြစ်ပြီး ကမ္ဘာ့ရေနံစိမ်း ထောက်ပံ့မှုရဲ့ ၅ ရာခိုင်နှုန်းခန့်ကို တင်ပို့နိုင်ဖို့ စီမံပေးနေတာ ဖြစ်ပါတယ်။ အဲဒီရေနံတွေကို အရှေ့-အနောက် ရေနံပိုက်လိုင်းကတစ်ဆင့် ယန်ဘူ  ဆိပ်ကမ်းဆီ ပို့ဆောင်ပေးပြီး အဲဒီကမှတစ်ဆင့် ယူရိုးဒေသဆီ သူးအေးတူးမြောင်းကနေ လည်းကောင်း၊ အာရှဒေသဆီ ဘားဘ်အယ်လ်မန်ဒက်ဘ် ရေလက်ကြားကနေ လည်းကောင်း သင်္ဘောတွေနဲ့ တင်ပို့တာဖြစ်ပါတယ်။

ပင်လယ်ကွေ့ဒေသ တင်ပို့ရေးလမ်းကြောင်းတွေနဲ့ ပတ်သက်လို့ ရိုက်တာသတင်းဌာနရဲ့ သုံးသပ်ချက်အရ အရှေ့-အနောက် ရေနံပိုက်လိုင်းဟာ ဟောမုဇ်  ရေလက်ကြားရဲ့ အဓိက အစားထိုး လမ်းကြောင်းတစ်ခု ဖြစ်ပါတယ်။ ဒါကြောင့် ဒီလမ်းကြောင်း ထိခိုက်ပြတ်တောက်မှု ဖြစ်ရင် ဆော်ဒီရဲ့ ရေနံတင်ပို့နိုင်စွမ်းကို ပိုမိုကျဉ်းမြောင်း သွားစေမှာ ဖြစ်ပြီး ကမ္ဘာ့ရေနံထောက်ပံ့မှုအပေါ်မှာလည်း ဖိအားတွေ ပိုမိုကြီးမား လာစေနိုင်ပါတယ်လို့ သိရပါတယ်။ 

REF: RT

#MNP #News