ချောင်းဦးမြို့နယ်၊ မိုင်တဲကျေးရွာ၌ မြစိမ်းရောင်စီမံကိန်း သတ္တမအကြိမ်ရန်ပုံငွေထုတ်ပေး

ချောင်းဦး၊ နိုဝင်ဘာ  ၂၂

စစ်ကိုင်းတိုင်းဒေသကြီး၊ မုံရွာခရိုင်၊ ချောင်းဦးမြို့၌ သမဝါယမနှင့်ကျေးလက်ဖွံ့ဖြိုးရေး ဝန်ကြီးဌာန၊ ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနမှ ကျေးလက်နေ ပြည်သူများ လူမှုစီးပွားဘဝ ဖွံ့ဖြိုးတိုးတက်ရေးကို စဉ်ဆက်မပြတ် အကောင်အထည်ဖော် ဆောင်ရွက် လျက်ရှိရာ အရင်းမပျောက်မတည် လည်ပတ်ရန်ပုံငွေ မြစိမ်းရောင် စီမံကိန်းကို ၂၀၁၄-၂၀၁၅ ခု၊ ဘဏ္ဍာရေးနှစ်မှစတင် အကောင်အထည်ဖော် ဆောင်ရွက်လျက်ရှိရာ မိုင်တဲကျေးရွာတွင် သတ္တမအကြိမ် မြစိမ်းရောင်စီမံကိန်း ရန်ပုံငွေကျပ် ၅၃၅၃၅၀၀၀/-ကို ယနေ့ နံနက် ၉ နာရီ အချိန်က ငါးယှန်ကျေးရွာအုပ်စု၊ မိုင်တဲကျေးရွာမြစိမ်းရောင်စီမံကိန်း ကျေးရွာကော်မတီဥက္ကဋ္ဌ နေအိမ်တွင် ကိုဗစ်-၁၉ကာလ ကျန်းမာရေးဌာန၏ လမ်းညွှန်ချက်များနှင့်အညီ ချေးငွေထုတ်ချေး ပေးအပ်ခဲ့ကြောင်း သိရသည်။

''ချောင်းဦးမြို့နယ် ကျေးလက်ဒေသဖွံ့ဖြိုးတိုးတက်ရေး ဦးစီးဌာန အရင်းမပျောက်မတည် လည်ပတ်ရန်ပုံငွေ မြစိမ်းရောင်စီမံကိန်းကို ၂၀၁၄-၂၀၁၅ ခု၊ ဘဏ္ဍာရေးနှစ် မှစတင်၍ စီမံကိန်း ယူနစ်(၂၆)ယူနစ်ကို ကျေးရွာ(၂၉)ရွာတွင်အကောင်အထည်ဖော် ဆောင်ရွက်လျက်ရှိရာ ၎င်းကျေးရွာများ အနက်မှ မိုင်တဲကျေးရွာတွင် မြစိမ်းရောင်စီမံကိန်းကို ၂၀၁၅-၂၀၁၆ခု၊ ဘဏ္ဍာရေးနှစ်မှ စတင်အကောင်အထည်ဖော် ဆောင်ရွက်ခဲ့သည့် ကျေးရွာဖြစ်ပြီး သတ္တမအကြိမ်အဖြစ်  စိုက်ပျိုးရေးလုပ်ငန်း ၆၇ ဦးအားငွေကျပ် ၂၈၄၃၆၀၀၀/-၊ မွေးမြူရေး လုပ်ငန်း ၇၆ ဦးအား ငွေကျပ် ၂၅၀၉၉၀၀၀/- စုစုပေါင်း  အသင်းသား ၁၄၃ ဦးအား ငွေကျပ် ၅၃၅၃၅၀၀၀/-ကို ယနေ့ထုတ်ချေး ပေးခဲ့ပါကြောင်းနှင့် မြစိမ်းရောင်စီမံကိန်း ဆောင်ရွက် လျက်ရှိသည့် ကျေးရွာများအနက် မိုင်တဲ ကျေးရွာသည်မွေးမြူရေး လုပ်ငန်း အောင်မြင် ဖြစ်ထွန်းသည့် ကျေးရွာဖြစ်ပါကြောင်း ""မြို့နယ်ဦးစီးမှူး ဒေါ်ခိုင်စိုးစံ က ပြောကြားခဲ့ပါသည်။

"ကျနော်တို့ရွာအနေဖြင့် မြစိမ်းရောင်စီမံကိန်းကို ဆောင်ရွက်ခဲ့သည်မှာ သတ္တမအကြိမ်မြောက်အထိ အခက်အခဲ မရှိဆောင်ရွက်နိုင်ခဲ့သလို စီမံကိန်းပဉ္စမနှစ်မှာ အတိုးရငွေ ၉၅၀၀၀၀၀/- ပြည်သူထည့်ဝင် ငွေ ၄၃၆၀၀၀၀/-တို့ဖြင့် ဖွံ့ဖြိုးရေး လုပ်ငန်းအဖြစ် ကျေးရွာတွင်းလမ်း ကွန်ကရစ်ခင်းခြင်း (၉၅၀'-ဝ"×၁၂'-ဝ"×ဝ'-၆" ) လုပ်ငန်းကို ဆောင်ရွက် နိုင်ပါကြောင်းနှင့် မြစိမ်းရောင်စီမံကိန်း ဆက်လက် အောင်မြင်နိုင်ရေးအတွက် သက်ဆိုင်ရာဌာန နှင့်အတူ မိမိတို့ကျေးရွာကော်မတီ၊ ကျေးရွာသူ၊ ကျေးရွာသားများမှ ပူးပေါင်းဆောင်ရွက် သွားမည်ဖြစ်ပါကြောင်း" မိုင်တဲကျေးရွာ မြစိမ်းရောင် ကော်မတီဥက္ကဋ္ဌ ဦးစိုးမြင့်မှ ပြောကြားခဲ့သည်။

သတင်း - အိအိအောင်

https://t.me/MyanmarNationalPost

www.mnpnewsagency.com