MNP - ဖေဖော်ဝါရီ ၁၉
ဂန့်ဂေါခရိုင်၊ ကိုဗစ်-၁၉ ထိန်းချုပ်ရေးနှင့်အရေးပေါ်တုံ့ပြန်ရေးကော်မတီနှင့် မြို့မိမြို့ဖများ၊ ပရဟိတ အသင်းများနှင့်တွေ့ဆုံ၍ ကိုဗစ်-၁၉ ရောဂါကြိုတင်ကာကွယ်ရေးနှင့် ထိန်းချုပ်ကုသနိုင်ရေး လုပ်ငန်း ညှိနှိုင်းအစည်းအဝေးကို ယမန်နေ့နံနက် ၁၀ နာရီက ဂန့်ဂေါခရိုင်၊ အထွေထွေ အုပ်ချုပ်ရေး ဦးစီးဌာန၊ အစည်းအဝေးခန်းမ၌ ပြုလုပ်ခဲ့ကြောင်း သိရသည်။
ရှေးဦးစွာ ခရိုင်ကိုဗစ်-၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီဥက္ကဋ္ဌ ခရိုင်အုပ်ချုပ်ရေးမှူး ဦးဇော်လွင်ဦးက ရှင်းလင်းပြောကြားရာ ကိုဗစ်-၁၉ရောဂါ စတုတ္ထလှိုင်း မျိုးကွဲ ဖြစ်သည့် Omicron ရောဂါပိုးကူးစက်ပြန့်ပွားမှုအခြေအနေများ၊ ခရိုင်အတွင်း ရောဂါကာကွယ် ထိန်းချုပ်ရေးလုပ်ငန်းများ တင်းတင်းကြပ်ကြပ် ပြန်လည်ဆောင်ရွက်ရန် လိုအပ်နေမှုအခြေအနေများ၊ ခရိုင်ဆေးရုံကြီးတွင်ရှိသည့် အောက်စီဂျင်အိုးများ မပျက်လပ်စေရေး၊ တိုင်းဒေသကြီး ကိုဗစ်-၁၉ရောဂါ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီမှ ရောဂါကာကွယ်ထိန်းချုပ်ရေးအတွက် ဆောင်ရွက်သွားရမည့် လုပ်ငန်း လမ်းညွှန်ချက်များအား ရှင်းလင်းပြောကြားသည်။ ဆက်လက်၍ အောက်ဆီဂျင်စက်ရုံ တည်ဆောက်ရေးကော်မတီအဖွဲ့ဝင် ဦးသန်းဝင်းက အောက်ဆီဂျင်စက်ရုံ လည်ပတ်နေမှုအခြေအနေ များနှင့် ပတ်သက်၍ ဆွေးနွေးပြောကြားခဲ့ကြောင်း သိရသည်။
ထို့နောက် တင်ပြချက်များအပေါ် ခရိုင်ကိုဗစ်-၁၉ ထိန်းချုပ်ရေးနှင့်အရေးပေါ်တုံ့ပြန်ရေး ကော်မတီဥက္ကဋ္ဌ ခရိုင်အုပ်ချုပ်ရေးမှူး ဦးဇော်လွင်ဦးက ပေါင်းစပ်ညှိနှိုင်းပေးပြီး နိဂုံးချုပ်အမှာစကား ပြောကြားခဲ့ကြောင်း သိရှိရသည်။
သတင်း - ထင်အောင်နိုင်
မြန်မာနေရှင်နယ်ပိ့စ်
No comments:
Post a Comment