MNP - ဇွန် ၄
မကွေးတိုင်းဒေသကြီး၊ နတ်မောက်မြို့နယ်တွင် ၂၀၂၂-၂၀၂၃ ပညာသင်နှစ် လက်ထောက်မူလတန်းပြ ရက်တိုမွမ်းမံသင်တန်းဖွင့်ပွဲကို ယနေ့နံနက်(၉)နာရီခွဲ အချိန်က အမှတ်(၁)အခြေခံပညာ အထက်တန်းကျောင်းခန်းမတွင် ဖွင့်လှစ်ခဲ့သည်။
ရှေးဦးစွာ မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်အုပ်ချုပ်ရေးမှူး ဦးသန့်စင်က အဖွင့်အမှာ စကားပြောကြားခဲ့ပြီး၊ မြို့နယ်ပညာရေးမှူး ဦးကျော်စိုးဝင်းက ပြောကြားရာတွင် သင်တန်းသား/သူများ အနေဖြင့် ဆရာ/မ စိတ်ဓာတ်များထားရှိရန်၊ သင်တန်းစည်းကမ်းများလိုက်နာကြရန်၊ သင်တန်းတွင် ပို့ချသည့်ဘာသာရပ်များစိတ်ပါ ဝင်စားစွာလိုက်နာရန်တို့ကို ပြောကြားခဲ့သည်။အဆိုပါသင်တန်းသို့ သင်တန်းသား/သူ (၈၃)ဦးတက်ရောက်ခဲ့ပြီး၊ သင်တန်းကာလမှာ ဇွန်လ (၄) ရက်နေ့မှ (၁၀)ရက်နေ့အထိ ရက်သတ္တပတ် တစ်ပတ်ကြာ သင်ကြားပေးသွားမည်ဖြစ်ပြီး၊ သင်ကြားပေးသည့်ဘာသာရပ်များမှာ ပညာဘာသာရပ်၊ စီမံဘာသာရပ်၊ ဘဏ္ဍာဘာသာရပ်၊ ကာယပညာဘာသာရပ်၊ နိုင်ငံ့ဝန်ထမ်းဥပဒေ၊ နည်းဥပဒေများ၊ ကြီးကြပ်အကဲဖြတ် ဘာသာရပ်စသည့်တို့ကိုသင်ကြားပေးသွားမည်ဖြစ်သည်။
အဆိုပါ လက်ထောက်မူလတန်းပြရက်တိုမွမ်းမံသင်တန်းဖွင့်ပွဲသို့ မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌနှင့် အဖွဲ့ဝင်များ၊ မြို့နယ်ပညာရေးမှူးနှင့် ဌာနဆိုင်ရာအကြီးအကဲများ၊ ဆရာ/မများနှင့် သင်တန်းသား/ သူများ တက် ရောက်ခဲ့ကြကြောင်းသိရသည်။
သတင်း - လှဝင်း
မြန်မာနေရှင်နယ်ပိုု့စ်
No comments:
Post a Comment