MNP - စက်တင်ဘာ ၂၉
ပဲခူးတိုင်းဒေသကြီး၊ ပဲခူးခရိုင်၊ သနပ်ပင်မြို့နယ်အတွင်း လုံခြုံရေး၊ တရားဥပဒေစိုးမိုးရေး၊ ရပ်ရွာအေးချမ်းသာယာရေးနှင့်ဒေသဖွံ့ဖြိုးရေးလုပ်ငန်းများအတွက် မြို့နယ်အဆင့် ဌာနဆိုင်ရာများပါဝင်သော စစ်ကြောင်းကြီး(၅)ကြောင်းဖြင့် ယမန်နေ့က ရစ်ကံလေးကျေးရွာအုပ်စု၊ ကမာခနိမ်ကျေးရွာ၊ တောဘုတ်စုကျေးရွာနှင့် နေ့လည်(၁)နာရီအချိန်တွင် ကမာစဲကျေးရွာ၊ အနီးကိုက်ကျေးရွာ၊ လှာပကစ်ကျေးရွာများသို့ ဒေသဖွံ့ဖြိုးရေးလုပ်ငန်းများ ကွင်းဆင်းဆောင်ရွက်ခဲ့ကြသည်။
ထိုသို့ကွင်းဆင်းဆောင်ရွက်ရာတွင် စစ်ကြောင်း(၅)ကြောင်းမှ အဖွဲ့ခေါင်းဆောင်များ၊ ဌာနဆိုင်ရာတာဝန်ရှိသူများက လုံခြုံရေး၊ တရားဥပဒေစိုးမိုးရေး၊ ရပ်ရွာအေးချမ်းသာယာရေးနှင့် ဒေသဖွံ့ဖြိုးရေးဆောင်ရွက်နေမှုအခြေအနေများ၊ ကဏ္ဍအလိုက်ပြည်သူ့ဝန်ဆောင်မှုလုပ်ငန်းဆောင်ရွက်နေမှုများကို ဒေသခံပြည်သူ့များနှင့် တွေ့ဆုံ၍ ဖြည့်ဆည်းဆောင်ရွက်ခဲ့ကြောင်း သိရပါသည်။
အဆိုပါစစ်ကြောင်းကြီး(၅)ကြောင်းမှ တာဝန်ရှိသူတို့သည် ကျေးရွာအုပ်ချုပ်ရေးအဖွဲ့များအနေဖြင့် လုပ်ငန်းတာဝန်ထမ်းဆောင်ရာတွင် ဥပဒေ၊နည်းဥပဒေများနှင့်အညီ ဆောင်ရွက်ရန်၊ ကျေးရွာနေပြည်သူများ၏ အခွင့်အရေးများ ဆုံးရှုံးနစ်နာမှုမရှိစေရေးအတွက် အလေးထားဆောင်ရွက်သွားရန်၊ ကျေးရွာနေပြည်သူများအနေဖြင့် ကောလဟာလသတင်းအမှားများကို မယုံကြည်ကြပဲ သတင်းအမှန်များကို လေ့လာဖတ်ရှုကြရန်၊ ဒေသဖွံ့ဖြိုးရေး၊ လူမှုအကျိုးပြုလုပ်ငန်းများတွင် အင်တိုက်အားတိုက် ပါဝင်ဆောင်ရွက်ပေးကြရန် ချပြရှင်းလင်း တိုက်တွန်းပြောကြားခဲ့ပါသည်။ စာသင်ကျောင်းများ၌ ဆရာ/ ဆရာမများ၊ စာသင်ဆောင်လိုအပ်ချက်များ ညှိနှိုင်းဖြေရှင်းပေးခြင်း၊ ဒေသခံပြည်သူ(၄၈၀)ဦးအား ကိုဗစ်-၁၉ ရောဂါကွယ်ဆေး Booster Dose ထိုးနှံပေးခြင်း၊ ပန်းခင်းစီမံချက်(၂)အနေဖြင့် အိမ်ထောင်စုဇယားနှင့် နိုင်ငံသားစိစစ်ရေးကတ်ပြားများ ပြုလုပ်ပေးခြင်း၊ ခွေးရူးပြန်ရောဂါနှင့်ပတ်သက်၍ရှင်းလင်းခြင်း၊ ဆပ်ပြာပြုလုပ်နည်းသရုပ်ပြခြင်း၊ လယ်ယာမြေစီမံခန့်ခွဲရေး ပုံစံ(၇)နှင့်ပတ်သက်၍ ရှင်းလင်းခြင်းများကွင်းဆင်းဆောင်ရွက်ပေးခဲ့ပါသည်။ ထို့နောက် ရပ်မိရပ်ဖများ၊ ကျေးရွာနေပြည်သူများ၏ တင်ပြလာမှုများအပေါ် ပေါင်းစပ်ညှိုနှိုင်းဆောင်ရွက်ပေးခဲ့ပြီး ကျေးရွာအုပ်စုများရှိ ဘုန်းတော်ကြီးကျောင်းများသို့ ဆန်၊ ဆီနှင့် လှူဖွယ်ဝတ္ထုများ လှူဒါန်းခဲ့ကြောင်းသိရပါသည်။
သတင်း - လှမိုး
မြန်မာနေရှင်နယ်ပို့စ်
No comments:
Post a Comment