ကုလသမဂ္ဂ၊ မုသားအင်ပါယာ နှင့် မြန်မာပြည်အရေး

မြန်မာနိုင်ငံဟာ အနောက်အုပ်စုရဲ့ ဒုက္ခပေးခြင်းကို အစဉ်သဖြင့် ခံခဲ့ရတဲ့ တိုင်းပြည်ဖြစ်ပါတယ်။ မြန်မာနိုင်ငံရေးမှာက အနောက်အုပ်စုရဲ့ သြဇာခံ နိုင်ငံရေးလုပ်စားသူများအဖွဲ့က ပြည်သူတွေကို အတိခုက္ခရောက်အောင် ဖန်တီးတယ်။ ပြီးတဲ့အခါမှာ ပြည်သူများအပေါ် သူတို့ကျူးလွန်ခဲ့တဲ့ ပြစ်မှုတွေကို တပ်မတော်က ကျူးလွန်နေသယောင် သူတို့ရဲ့ ပြည်ဖျက်မီဒီယာအုပ်စုရဲ့ အားနဲ့ မဟုတ်မမှန် လုပ်ကြံသတင်းတွေ ဖော်ပြပြီး လိမ်ညာ ဝါဒဖြန့်တယ်။ အနောက်အုပ်စုက ဒီလိုဖြစ်ဖို့ ငွေကြေးအမြောက်အများ သုံးစွဲပြီး ခိုင်းစေထားတာ ဖြစ်တဲ့အတွက် သူတို့ရဲ့ သြဇာခံ နိုင်ငံရေးလုပ်စားသူတွေနဲ့ သူတို့ကပဲ ထောက်ပံ့ထားတဲ့ ပြည်ဖျက်မီဒီယာတွေရဲ့ လုပ်ကြံဖန်တီးရေးသားမှုတွေကို သိပင်သိငြားလည်း အမှားကြာ အမှန်ဖြစ်အောင် အင်အားအလုံးအရင်းနဲ့ ဝိုင်းဝန်းလိမ်ညာ ဝါဒဖြန့်တဲ့ အလုပ်ကို လုပ်နေကြခြင်းပဲ ဖြစ်ပါတယ်။

ဒီလို လုပ်ကြံဖန်တီး ဝါဒဖြန့်ရေးသားမှုတွေကို ကုလသမဂ္ဂလိုအဖွဲ့အစည်းကြီးက အထောက်အထားအဖြစ် အသုံးပြုပြီး မလိုလားအပ်တဲ့ ဆုံးဖြတ်ချက်တွေ ချမှတ်တယ်။ ဂုဏ်သိက္ခာကင်းမဲ့လွန်းတဲ့ လုပ်ရပ်တွေ လုပ်ဆောင်ခဲ့ကြတာလည်း အစဉ်အလာဖြစ်နေပါပြီ။

ရက်ပိုင်းအတွင်းက ကုလသမဂ္ဂရဲ့ လုံခြုံရေးကောင်စီမှာ တပ်မတော်ကို ပြစ်တင်ပြောဆိုတဲ့ အဆိုတစ်ရပ်ကို ဗြိတိန်(အင်္ဂလန်) က အဆိုတင်သွင်းပြီး မဲခွဲဆုံးဖြတ် အတည်ပြုခဲ့ကြပါတယ်။ ဗြိတိန်က တင်သွင်းခဲ့တဲ့အဆိုနဲ့ ပတ်သက်လို့ အမေရိကန်သံရုံးက ထပ်ဆင့်ထုတ်ပြန် ရေးသားဖော်ပြချက်ကို ကြည့်ပါ။

အမေရိကန်သံရုံးရဲ့ ထုတ်ပြန်ချက်မှာ - မြန်မာနိုင်ငံအရေးနှင့်ပတ်သတ်ပြီး ကုလသမဂ္ဂလုံခြုံရေးကောင်စီ၏ ဆုံးဖြတ်ချက် - ၂၆၆၉ ကို အမေရိကန်ပြည်ထောင်စုက ကြိုဆိုပါကြောင်း၊ ဤဆုံးဖြတ်ချက်သည် အကြပ်အတည်းကို ဖြေရှင်းရန်နှင့် မြန်မာစစ်အာဏာရှင်အဖွဲ့အစည်းက အရပ်သားပြည်သူများကို ဖိနှိပ်ချုပ်ခြယ်မှုနှင့် အကြမ်းဖက်မှုများတိုးမြှင့်ဆောင်ရွက်လာခြင်းကို အဆုံးသတ်ရန် လုံခြုံရေးကောင်စီ၏ အရေးပါသောခြေလှမ်းတစ်ခုဖြစ်ပါကြောင်း၊ ဤဆုံးဖြတ်ချက်သည် နိုင်ငံတစ်ဝှမ်းတွင် အကြမ်းဖက်မှုများအဆုံးသတ်ရန်၊ မတရားဖမ်းဆီးထိန်းသိမ်းထားသည့် အကျဉ်းသားများကို ပြန်လွှတ်ရန်၊ လူသားချင်းစာနာထောက်ထားမှုအကူအညီများကို အကန့်အသတ်အထိန်းအချုပ်မရှိ ခွင့်ပြုရန်၊ လူနည်းစုအသိုက်အဝန်းများကို ကာကွယ်စောင့်ရှောက်ရန်နှင့် မြန်မာပြည်သူများ၏ ဆန္ဒနှင့် ဒီမိုကရေစီလိုလားတောင့်တမှုကို လေးစားရန် စစ်အာဏာရှင်အဖွဲ့အစည်းကို  နိုင်ငံတကာအသိုက်အဝန်းက အလေးအနက်ပေးပို့သည့် သတင်းစကားဖြစ်ကြောင်း၊ ယခုဆုံးဖြတ်ချက်ကို မိမိတို့ ချီးကျူးသော်လည်း မြန်မာနိုင်ငံတွင်းမှ အကြပ်အတည်းအတွက် တရားမျှတသည့်ဖြေရှင်းမှုတစ်ခုပေါ်ပေါက်လာစေရန် လုံခြုံရေးကောင်စီက ဆက်လက်ဆောင်ရွက်နိုင်သည့်အရာများစွာ ကျန်ရှိနေပါသေးကြောင်း၊ လုံခြုံရေးကောင်စီအနေဖြင့် ယခုအခွင့်အရေးကိုအသုံးချပြီး ဒီမိုကရေစီလမ်းကြောင်းပေါ်ပြန်လည်ရောက်ရှိစေရန် အခြားနည်းလမ်းသစ်များရှာဖွေရေး၊ အာဏာရှင်အဖွဲ့အစည်း၏ လုပ်ရပ်များအတွက် တာဝန်ခံမှု တာဝန်ယူမှု ပိုမိုရှိလာစေရေး နှင့် ဘုံသဘောတူညီချက်(၅)ရပ်ကို ထိထိရောက်ရောက်အကောင်အထည်ဖော်ရန် အားထုတ်လျက်ရှိသည့် အာဆီယံအဖွဲ့အစည်းကို အားပေးထောက်ခံရေးတို့ကို ဆောင်ရွက်သင့်ပါကြောင်း၊ မြန်မာနိုင်ငံတွင် အကြမ်းဖက်မှုများအဆုံးသတ်ရန်နှင့် အကြပ်အတည်းမှ ငြိမ်းချမ်းစွာ ပြန်လည်သင့်မြတ်ရေးကို ရှာဖွေရန် အာဆီယံအပါအဝင် ကုလသမဂ္ဂနှင့် နိုင်ငံတကာမိတ်ဖက်များနှင့်အတူ မိမိတို့ ဆောင်ရွက်သွားရန် ဆက်လက် သံန္နိဋ္ဌာန်ချထားလျက်ပင် ရှိပါကြောင်း ဆိုပြီး မျက်နှာပြောင်တိုက် ရေးသားထုတ်ပြန်ထားတာကို တွေ့ကြရမှာပဲ ဖြစ်ပါတယ်။

မြန်မာနိုင်ငံဆိုင်ရာ အမေရိကန်သံရုံးရဲ့ ထုတ်ပြန်ချက်ဟာ မြန်မာနိုင်ငံအပေါ် ယုတ်မာကောက်ကျစ်သော ဗြိတိန်ရဲ့ အဆိုအပေါ် ထပ်ဆင့်ယုတ်မာကောက်ကျစ် ရိုင်းစိုင်းသော လုပ်ဆောင်ချက်တခုမျှသာ ဖြစ်ပါတယ်။ ရုရှားသမ္မတကြီး ဗလာဒီမာပူတင်ရဲ့ စကားနဲ့ ပြောမယ်ဆိုရင်တော့ အနောက်အုပ်စုဟာ မုသားအင်ပါယာကြီးပဲ ဖြစ်ပါတယ်။ ကမ္ဘာ့နိုင်ငံများရဲ့ အရေးကိုစ္စတွေမှာ သူတို့အလိုကျဖြစ်ဖို့ သူတို့ကြိုးကိုင်ခြယ်လှယ်နိုင်မယ့်သူတွေ အာဏာရစေဖို့ ဘာမဆို လုပ်ဆောင်ဖို့ ဝန်မလေးကြသူတွေပဲ ဖြစ်ပါတယ်။

ကုလသမဂ္ဂလုံခြုံရေးကောင်စီ၏ မြန်မာနိုင်ငံဆိုင်ရာ ဆုံးဖြတ်ချက်အဆိုအပေါ် မြန်မာနိုင်ငံ၏ ရပ်တည်ချက်ကို နိုင်ငံခြားရေးဝန်ကြီး ဌာနက ၂၃-၁၂-၂၀၂၂ ရက်နေ့က ထုတ်ပြန်ထားပါတယ်။ နိုင်ငံခြားရေး ဝန်ကြီးဌာနရဲ့ ထုတ်ပြန်ပြောဆိုချက်မှာတော့ -    ကုလသမဂ္ဂပဋိညာဉ်စာတမ်းတွင် နိုင်ငံတကာငြိမ်းချမ်းရေးနှင့် လုံခြုံရေးထိန်းသိမ်းရေးကို အဓိကတာဝန်ယူဆောင်ရွက်ရန် ကုလသမဂ္ဂအဖွဲ့ဝင်နိုင်ငံများက လုံခြုံရေးကောင်စီသို့ တာဝန်အပ်နှင်းထားကြောင်း၊  မြန်မာနိုင်ငံ၏အခြေအနေသည် နိုင်ငံ တကာငြိမ်းချမ်းရေးနှင့် လုံခြုံရေးအပေါ် ထိခိုက်သက်ရောက်မှုမရှိဘဲ ပြည်တွင်းရေးသာဖြစ်ကြောင်း၊ သို့ဖြစ်ရာ လုံခြုံရေးကောင်စီက ယခုကဲ့သို့ဆုံးဖြတ်ချက်အဆိုကို အတည်ပြုချမှတ်ခဲ့ခြင်းမှာ ကုလသမဂ္ဂ ပဋိညာဉ်စာတမ်းနှင့် ညီညွတ်ခြင်းမရှိကြောင်း၊  ဖော်ပြပါ ဆုံးဖြတ်ချက်အဆိုကို ဗြိတိန်နိုင်ငံက ဦးဆောင်တင်သွင်းခဲ့ခြင်းဖြစ်ပြီး၊ ကုလသမဂ္ဂ၏ အခြေခံမူနှင့် ရည်ရွယ်ချက်များနှင့် ဆန့်ကျင်လျက် မြန်မာနိုင်ငံ၏ ပြည်တွင်းရေးကို ဝင်ရောက်စွက်ဖက် သောအချက်များစွာ ပါဝင်ကြောင်းတွေ့ရှိရကြောင်း၊ ထို့အပြင် ဆုံးဖြတ်ချက်အဆိုတွင် လူ့အခွင့်အရေးဆိုင်ရာ ကိစ္စရပ်များကိုလည်းထည့်သွင်းဖော်ပြထားရာ၊ အထွေထွေညီလာခံ တတိယကော်မတီတွင်လည်းကောင်း၊ လူ့အခွင့်အရေးကောင်စီတွင်လည်းကောင်း အကြိမ်ကြိမ်ဆွေးနွေးပြီးသော ကိစ္စရပ်များဖြစ်သဖြင့် လုံခြုံရေးကောင်စီ၏ လုပ်ပိုင်ခွင့်အတွင်း ကျရောက်ခြင်းမရှိသော ကိစ္စရပ်များဖြစ်ကြောင်းလည်း တွေ့ရှိရကြောင်း၊ ဆုံးဖြတ်ချက်အဆိုတွင် အကြမ်းဖက်မှုများရပ်တန့်ရန်တောင်းဆိုထားကြောင်း တွေ့ရှိရကြောင်း၊ လုံခြုံရေးတပ်ဖွဲ့ဝင်များသည် တည်ဆဲဥပဒေများနှင့်အညီ ထိန်းသိမ်းဆောင်ရွက်လျက်ရှိပြီး အကြမ်းဖက် လုပ်ရပ်များကိုကျူးလွန်လျက်ရှိသော၊ တရားမဝင်အဖွဲ့အစည်းများအဖြစ် ကြေညာထားခြင်းခံရသည့် NUG နှင့် PDF တို့၏ လုပ်ရပ်များကိုသာ ရှုတ်ချတားဆီးရန်လိုအပ်ကြောင်း ဖော်ပြထားပါတယ်။

နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ -   မြန်မာနိုင်ငံသည် ၂၀၂၀ ပြည့်နှစ်အထွေထွေရွေးကောက်ပွဲ၌ မဲမသမာမှုဖြစ်စဉ်များကြောင့် အရေးပေါ်အခြေအနေကြေညာခဲ့ရပြီး၊ အရေးပေါ်ကာလဆိုင်ရာ ပြဌာန်းချက်များနှင့်အညီ ဆောင်ရွက် လျက်ရှိကြောင်း၊ ထို့အပြင် ၂ဝဝ၈ ခုနှစ်၊ ဖွဲ့စည်းပုံအခြေခံဥပဒေပါအချက်များနှင့်အညီ လွတ်လပ်၍ တရားမျှတသောပါတီစုံဒီမိုကရေစီ အထွေထွေရွေးကောက်ပွဲအား ပြန်လည်ကျင်းပလျက် အနိုင်ရသည့် ပါတီအား နိုင်ငံတော်တာဝန်လွှဲအပ်ပေးရေးအပါအဝင်ရှေ့လုပ်ငန်းစဉ်(၅)ရပ်ကို အကောင်အထည်ဖော် ဆောင်ရွက်လျက်ရှိကြောင်း၊ သို့ဖြစ်ရာ နိုင်ငံတကာအသိုက်အဝန်းအနေဖြင့် မြန်မာအစိုးရ၏ ဒီမိုကရေစီ ပြန်လည်ဖော်ဆောင်ရေးအတွက် အကောင်အထည်ဖော်ဆောင်ရွက်ချက်များကို အားပေးထောက်ခံရန် လိုအပ်ကြောင်း၊ အာဆီယံတူညီဆန္ဒ (၅)ချက်အကောင်အထည်ဖော်မှုကို ပူးပေါင်းဆောင်ရွက်ရာတွင် မြန်မာနိုင်ငံ၏ ပြည်တွင်းရေးကို ဝင်ရောက်မစွက်ဖက်ရန်၊ အချုပ်အခြာအာဏာတည်တံ့ခိုင်မြဲရေးကို လေးစားရန်နှင့် အာဆီယံပဋိညာဉ်စာတမ်းပါအချက်များအပေါ် အခြေခံလျက်ဆက်လက်ဆောင်ရွက်သွားမည်ဖြစ်ကြောင်း၊ အာဆီယံ၏အစီအစဉ်အရပေးအပ်မည့် လူသားချင်းစာနာထောက်ထားမှု အကူအညီများကိုလည်း ခွဲခြားမှုမရှိဘဲ အကူအညီလိုအပ်သူများထံ ပေးအပ်နိုင်ရေးအတွက် အထက်ပါရပ်တည်ချက်အတိုင်း ဆက်လက်ပူးပေါင်းဆောင်ရွက်သွားမည်ဖြစ်ကြောင်း တုန့်ပြန်ထားပါတယ်။

ကုလသမဂ္ဂမှာ မုသားအင်ပါယာကြီးရဲ့ ဖိအားပေးမှုကို သံတမန်နည်းလမ်းအရ တုန့်ပြန်ထားတဲ့ တုန့်ပြန်ချက်ဖြစ်ပါတယ်။ နိုင်ငံခြားရေးဝန်ကြီးဌာနရဲ့ ထုန်ပြန်ချက်မှာ အတိအလင်းဖော်ပြထားပြီးဖြစ်တဲ့ အကြမ်းဖက်လုပ်ရပ်တွေ ကြူးလွန်နေ CRPH, NUG, PDF ကဲ့သို့သော အကြမ်းဖက်အဖွဲ့တွေကိုသာ အကြမ်းဖက်လုပ်ရပ်တွေ မကြူးလွန်ကြဖို့၊ လူ့အခွင့်အရေးချိုးဖောက်မှုတွေကို ရပ်တန့်ကြဖို့ တိတိကျကျ တိုက်တွန်း ပြောဆိုရမှာ ဖြစ်ပါတယ်။

ကုလသမဂ္ဂမှာ အဆိုတင်သွင်းခဲ့တဲ့ ဗြိတိန် နဲ့ အခု မဟုတ်မမှန် လုပ်ကြံဖန်တီးရေးသားထုတ်ပြန်ထားတဲ့ အမေရိကန် တို့ဟာ NUG, PDF အကြမ်းဖက်သမားတွေရဲ့ နောက်မှာ အခိုင်အမာ ရပ်တည်နေတယ်ဆိုတာ တပ်မတော်က တိုင်းပြည်ရဲ့ အာဏာအရပ်ရပ်ကို လွှဲပြောင်းရယူထားရတဲ့ ကာလအတွင်း သူတို့ရဲ့ လုပ်ဆောင်ချက်တွေကို ကြည့်ခြင်းအားဖြင့် သိသာ ထင်ရှားပါတယ်။

အခုဆိုရင် မြန်မာနိုင်ငံအတွင်းမှာ CRPH, NUG တို့ရဲ့ သြဇာခံ PDF အကြမ်းဖက်အဖွဲ့ရဲ့ သတ်ဖြတ်မှုကြောင့် အပြစ်မဲ့ ရဟန်းရှင်လူပြည်သူပေါင်း ၄၀၀၀ ကျော် သေဆုံးခဲ့ရပြီးဖြစ်တယ်ဆိုတာ စာရင်းအတိအကျ ရှိသလို PDF နဲ့ ပူးပေါင်းအဖွဲ့တွေရဲ့ မိုင်းထောင်ဖောက်ခွဲ ဖျက်ဆီးမှုတွေကြောင့် နိုင်ငံတော်ပိုင် အဆောက်အဦ၊ လမ်း၊ တံတား၊ ဖုန်းတာဝါတိုင်၊ လျှပ်စစ်တာဝါတိုင်တွေ ပျက်စီးခဲ့ရတာလည်း စာရင်းများနဲ့တကွ အတိအကျ ရှိနေပါတယ်။ 

ဗြိတိန် နဲ့ အမေရိကန် ဟာ အပြစ်မဲ့ မြန်မာတိုင်းရင်းသား ရဟန်းရှင်လူပြည်သူများကို သတ်ဖြတ်ရာမှာ အဓိကတရားခံများ ဖြစ်တယ်ဆိုတာကို ပြဆိုနိုင်တဲ့အချက်တွေကတော့ NUG အကြမ်းဖက်အဖွဲ့က အကြမ်းဖက်ခေါင်းဆောင်တချို့ ဗြိတိန် နဲ့ အမေရိကန်မှာ တိမ်းရှောင် ခိုလှုံနေကြပါတယ်။ ဗြိတိန် နဲ့ အမေရိကန် မှာ အမေရိကန်မှာ ခိုလှုံနေကြတဲ့ အကြမ်းဖက်လှုံ့ဆော်သူများက ရန်ပုံငွေရှာဖွေပြီး မြန်မာနိုင်ငံအတွင်းမှာ အကြမ်းဖက်လုပ်ရပ်တွေ ကြူးလွန်နေကြတဲ့ PDF အဖွဲ့ကို ထောက်ပံ့ပေးနေကြခြင်းကြောင့် PDF နဲ့ ပူးပေါင်းအဖွဲ့များရဲ့ အကြမ်းဖက်လှုပ်ရှားမှုများ အရှိန်အဟုန် မပြတ် ဆောင်ရွက်နေခြင်းဖြစ်တာကို ထောက်ရှုခြင်းအားဖြင့် အပြစ်မဲ့ မြန်မာနိုင်ငံသားများကို ရက်စက်စွာ လုပ်ကြံသတ်ဖြတ်နိုင်ဖို့ အဓိက ကြိုးကိုင်သူများက ဗြိတိန် နဲ့ အမေရိကန်လို့ တိုက်ရိုက် စွပ်စွဲရခြင်းဖြစ်ပါတယ်။

အစိုးရတစ်ရပ်အပေါ် နိုင်ငံရေးအရ အကြပ်အတည်းဖြစ်အောင် ဖန်တီးခြင်းက မုသားအင်ပါယာကြီးရဲ့ မရိုးနိုင်တဲ့ လုပ်ဆောင်ချက်တွေ ဖြစ်လို့ မထူးဆန်းပါဘူး။ သို့ပေသော် အကြမ်းဖက်အဖွဲ့အစည်းများ ရှင်သန်လှုပ်ရှားနိုင်အောင် ကူညီပံ့ပိုးပေးနေခြင်းကတော့ မြန်မာနိုင်ငံသား အပြစ်မဲ့ ရဟန်းရှင်လူပြည်သူများအပေါ် လွန်စွာ ရက်စက်ယုတ်မာလွန်းတဲ့ လုပ်ဆောင်ချက်ဖြစ်လို့ ဗြိတိန် ၊ အမေရိကန် (မုသားအင်ပါယာ)ကြီး ရဲ့ ရပ်တည်ချက်တွေကို မြန်မာနိုင်ငံသား ပြည်သူတစ်ယောက်ချင်းစီအနေနဲ့ ဘယ်လိုမှ သည်းခံခွင့်လွှတ်နိုင်စရာ မရှိပါဘူး။

အမေရိကန် သံရုံးအနေဖြင့် အပြစ်မဲ့ မြန်မာနိုင်ငံသား ရဟန်းရှင်လူပြည်သူများအပေါ် ရက်စက်ယုတ်မာရိုင်းစိုင်းလွန်းတဲ့ လုပ်ရပ်တွေကို ရပ်တန်းက ရပ်ပါ။ CRPH, NUG တို့ကို ငွေကြေးနဲ့ မက်လုံးပေးပြီး တိုင်းဖျက် ပြည်ဖျက် သာသနာဖျက် လုပ်ရပ်တွေကို နောက်ကွယ်ကနေ ကြိုးကိုင်နေတာတွေ ရပ်တန်းက ရပ်ပါ။

မုသားအင်ပါယာကြီး ရဲ့ မရိုးနိုင်တဲ့ ယုတ်မာရိုင်းစိုင်းမှုတွေအပေါ် ခေတ်ကာလအရ ပြည်သူများကလည်း နားလည်သဘောပေါက်နေကြပြီ ဖြစ်ပါတယ်။ ယနေ့ မြန်မာနိုင်ငံအတွင်းမှာ အပြစ်မဲ့ ရဟန်းရှင်လူပြည်သူများအပေါ် ရက်စက်ယုတ်မာရိုင်းစိုင်းလွန်းတဲ့ အကြမ်းဖက်မှုတွေ၊ လူ့အခွင့်အရေးချိုးဖောက်တဲ့ လုပ်ရပ်တွေ လုပ်ဆောင်နေတာကတော့ဖြင့် တပ်မတော်မဟုတ်ဘဲ မုသားအင်ပါယာကြီးရဲ့ သြဇာခံ NLD ဦးဆောင်သူများ ဖွဲ့စည်းထားတဲ့ CRPH, NUG, PDF တို့ကသာ ကြူးလွန်နေခြင်းဖြစ်ကြောင်း ကိုယ်တွေ့ ခံစားနေရတဲ့ ပြည်သူတိုင်းက သိရှိနားလည်ထားပြီး ဖြစ်ပါတယ်။

ဗြိတိန်၊ အမေရိကန် အပါအဝင် မုသားအင်ပါယာကြီးရဲ့ အဖွဲ့ဝင်နိုင်ငံအားလုံးအနေနဲ့ မြန်မာနိုင်ငံမှာ ဒီမိုကရေစီ ရှင်သန်ထွန်းကားစေချင်တယ်၊ လူ့အခွင့်အရေးချိုးဖောက်မှုတွေ အဆုံးသတ်စေချင်တယ်ဆိုရင်ဖြင့် အကြမ်းဖက်အုပ်စုများအဖြစ် အတိအလင်း ကြေညာထားပြီးဖြစ်တဲ့ NUG, PDF တို့ကို နောက်ကွယ်က ကြိုးကိုင်ပြီး ငွေကြေး၊ လက်နက် ပံ့ပိုးပေးနေတဲ့ အကြမ်းဖက်အားပေး လုပ်ရပ်တွေကို အဆုံးသတ်လိုက်ပါလို့သာ လေးလေးနက်နက် တောင်းဆိုလိုက်ပါတယ်။

နောင်တော်လေး (ဘိုကလေး)

https://t.me/MyanmarNationalPost