စဉ့်ကူးမြို့နယ်အတွင်း အသက်(၅)နှစ်မှ (၁၂)နှစ်ကြား ကျောင်းသား၊ ကျောင်းသူများအား ကိုဗစ်-၁၉ ရောဂါ ကာကွယ်ဆေး ထပ်ဆောင်းထိုးနှံပေး

MNP  -   ဇန်နဝါရီ   ၉

မန္တလေးတိုင်းဒေသကြီး၊ စဉ့်ကူးမြို့နယ်တွင် ၂၀၂၂-၂၀၂၃ ပညာသင်နှစ်အတွက် အခြေခံပညာ ကျောင်းများ၌ တက်ရောက်ပညာသင်ကြားနေသော အသက် ၅ နှစ်မှ အသက် ၁၂ နှစ်ကြား ကျောင်းသား/ကျောင်းသူများမှ ကိုဗစ်-၁၉ ရောဂါကာကွယ်ဆေး အကြိမ်ပြည့်ထိုးနှံပြီးစီးမှု ၅ လပြည့်ပြီးသော ကျောင်းသား/ကျောင်းသူများအား ကိုဗစ်-၁၉ ရောဂါကာကွယ်ဆေး ထပ်ဆောင်း ထိုးနှံပေးခြင်းကို ယနေ့နံနက်ပိုင်းမှ စတင်ဆောင်ရွက်ပေးလျက်ရှိပြီး  စဉ့်ကူးမြို့နယ်အတွင်း ဆေးထိုးအဖွဲ့ (၆)ဖွဲ့မှ ဆေးထိုးစုရပ် (၄၁)နေရာ၌ နေ့အလိုက် ဆောင်ရွက်ပေးသွားမည် ဖြစ်သည်။

ထိုသို့ ကာကွယ်ဆေးထိုးနှံပေးရာတွင် စဉ့်ကူးမြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦး‌ထွန်းကျော်နိုင် နှင့် စီမံအုပ်ချုပ်ရေးအဖွဲ့ဝင်များ၊ မြို့နယ်ကျန်းမာရေးဦးစီးဌာနမှူး နှင့် မြို့နယ်ပညာရေးဌာန တို့က ကြီးကြပ်၍ ကျန်းမာရေးဝန်ထမ်းများ၊  ဆရာ၊ ဆရာမများ၊ ရပ်ကွက်/ ကျေးရွာ အုပ်ချုပ်ရေးမှူးများနှင့် စေတနာ့ဝန်ထမ်းများက ပူးပေါင်း၍ စနစ်တကျစာရင်းရေးသွင်းပေးပြီး ကာကွယ်ဆေးများ ထိုးနှံပေးခဲ့ကြသည်။

အဆိုပါ ကိုဗစ်-၁၉ ရောဂါကာကွယ်ဆေး ထပ်ဆောင်းထိုးနှံပေးခြင်းကို အသက် ၅ နှစ်မှ အသက် ၁၂ နှစ်ကြား အခြေခံပညာကျောင်းများမှ ကျောင်းသား/ ကျောင်းသူ (၈၄၀) ဦးနှင့် ဘုန်းတော်ကြီးသင် ပညာရေးကျောင်းများမှ ကျောင်းသား/ကျောင်းသူ (၁၆၀)ဦး၊ စုစုပေါင်း ကျောင်းသား/ကျောင်းသူ (၁၀၀၀) ဦးတို့အား ကိုဗစ်-၁၉ ရောဂါကာကွယ်ဆေး ထပ်ဆောင်း ထိုးနှံပေးနိုင်ခဲ့ပြီး ကာကွယ်ဆေးထိုးနှံရန် ကျန်ရှိသော ကျောင်းသား/ ကျောင်းသူများကိုလည်း သက်ဆိုင်ရာကျောင်းများအလိုက် ဆက်လက်ထိုးနှံပေးသွားမည်ဖြစ်ကြောင်း စဉ့်ကူးမြို့နယ် ကျန်းမာရေးဦးစီးဌာနမှ သိရသည်။ 

တင်ဇာလွင်

https://t.me/MyanmarNationalPost