MNP ၊ မတ် ၁၆
မန္တလေးတိုင်းဒေသကြီး သာစည်မြို့နယ်တွင် ကျောင်းသား/သူများ နွေရာသီကျောင်းပိတ်ရက် အားလပ်ချိန်များ၌ အချိန်ကိုအကျိုးရှိစွာအသုံးပြုနိုင်ရန် ရည်ရွယ်၍ မြို့နယ်အားကစားနှင့်ကာယပညာ ဦးစီးဌာနကကြီးကြပ်ပြီးနွေရာသီ အားကစားသင်တန်းများ ဖွင့်လှစ်သင်ကြားပေးလျက်ရှိရာ မတ်လဒုတိယပတ်က ဘောလုံး၊ ဘော်လီဘောနှင့် မြန်မာ့ရိုးရာ ခြင်းလုံးကစားနည်းသင်တန်းများ ဆက်လက်ဖွင့်လှစ်သင်ကြားပေးလျက်ရှိကြောင်း သိရသည်။
နွေရာသီအားကစားသင်တန်းများကို ကရာတေး၊ မြန်မာ့သိုင်း၊ မြန်မာ့ရိုးရာခြင်းလုံးကစားနည်း၊ ဘော်လီဘော၊ ဘောလုံးနှင့် Fitness Dance အားကစားနည်း ၆ မျိုး ဖွင့်လှစ်သွားမည်ဖြစ်ရာ ကရာတေးသင်တန်းကို မတ် ၁ ရက်က စတင်ဖွင့်လှစ်ပေးပြီး ကျန်ရှိနေသော မြန်မာ့သိုင်းနှင့် Fitness Dance သင်တန်းများကိုဖွင့်လှစ်ပေးရန် ဆောင်ရွက်လျက်ရှိကြောင်း မြို့နယ်အားကစားနှင့် ကာယပညာ ဦးစီးဌာနမှ နည်းစနစ်မှူးဦးဟိန်းဇာထွန်းထံက သိရသည်။
အဆိုပါ ဖွင့်လှစ်ပြီးသော သင်တန်းများကို ကျွမ်းကျင်နည်းပြများက အခြေခံမှစတင်၍ သတ်မှတ်နေရာများတွင် သင်ကြားပေးလျက်ရှိပြီး တက်ရောက်လိုသူများ အနေဖြင့် မြို့နယ်အားကစားနှင့်ကာယပညာဦးစီးဌာနသို့ လာရောက်စာရင်းပေးသွင်းနိုင်ကြောင်းသိရသည်။
https://t.me/MyanmarNationalPost
No comments:
Post a Comment