MNP ၊ မတ် ၁၈
ရန်ကုန်တိုင်းဒေသကြီး သင်္ဃန်းကျွန်းခရိုင် တာမွေမြို့နယ်တွင် (၇၈)နှစ်မြောက် တပ်မတော်နေ့ကို ဂုဏ်ပြု ကြိုဆိုသောအားဖြင့် ယနေ့နံနက်ပိုင်းအချိန်က တာမွေမြို့နယ်ရှိ လေးထောင့်ကန်လမ်းတစ်လျှောက် ( အရှေ့မြင်းပြိုင် ကွင်းလမ်းမှ ဝေဇယန္တာလမ်းထိ ) နိုင်လွန်ကတ္တရာကွန်ကရိလမ်းဖွင့်ပွဲ အခမ်းအနားကို ကျင်းပပြုလုပ်ခဲ့ရာ ရန်ကုန်တိုင်း ဒေသကြီးအစိုးရအဖွဲ့ ဝန်ကြီးချုပ် ဦးစိုးသိန်း၊ ရန်ကုန်တိုင်းစစ်ဌာနချုပ် တိုင်းမှူးနှင့်အစိုးရအဖွဲ့ဝင်ဝန်ကြီးများ၊ ခရိုင်/ မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌနှင့် အဖွဲ့ဝင်များ၊ ရန်ကုန်မြို့တော်စည်ပင်သာယာရေးကော်မတီမှ တာဝန်ရှိသူများ နှင့် ဝန်ထမ်းများ၊ ဌာနဆိုင်ရာအသီးသီးမှ တာဝန်ရှိသူများနှင့် ဝန်ထမ်းများ၊ ရပ်ကွက်အုပ်ချုပ်ရေးမှူးများနှင့် ဒေသခံ ပြည်သူများ တက်ရောက်ခဲ့ကြသည်။
ရှေးဦးစွာ ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးစိုးသိန်း၊ ရန်ကုန်တိုင်းစစ်ဌာနချုပ် တိုင်းမှူးနှင့် အစိုးရအဖွဲ့ဝင်ဝန်ကြီးများ၊ ဌာနဆိုင်ရာ အကြီးအကဲများနှင့် ဧည့်သည်တော်များသည် သတ်မှတ်ထာသော နေရာ အသီးသီးတွင် ရောက်ရှိနေရာယူခဲ့ကြပြီး အဆိုပါ နိုင်လွန်ကတ္တရာကွန်ကရိလမ်းသစ်အား ဖဲကြိုးဖြတ် ဖွင့်လှစ်ပေး ခဲ့သည်။ ထို့နောက် ရန်ကုန်တိုင်းဒေသကြီးအစိုးရအဖွဲ့ ဝန်ကြီးချုပ် ဦးစိုးသိန်း၊ ရန်ကုန်တိုင်းစစ်ဌာနချုပ် တိုင်းမှူးနှင့် အစိုးရအဖွဲ့ဝင်ဝန်ကြီးများ၊ ဌာနဆိုင်ရာ အကြီးအကဲများနှင့် ဧည့်သည်တော်များသည် အဆိုပါ နိုင်လွန်ကတ္တရာကွန်ကရိ လမ်းသစ်ဖွင့်ပွဲ မုခ်ဦးဆိုင်းဘုတ်နှင့် အမှတ်တရ စုပေါင်းမှတ်တမ်းတင်ဓာတ်ပုံရိုက်ခဲ့ကြပြီး တာမွေမြို့နယ်ရှိ လေးထောင့် ကန်လမ်းတစ်လျှောက် ( အရှေ့မြင်းပြိုင်ကွင်းလမ်းမှ ဝေဇယန္တာလမ်းထိ ) နိုင်လွန်ကတ္တရာကွန်ကရိလမ်းသစ် အဆင့် မြှင့်တင် ဆောင်ရွက်ထားရှိမှုအား ဖြတ်သန်းကြည့်ရှုစစ်ဆေးခဲ့သည်။
အဆိုပါ လေးထောင့်ကန်လမ်းသည် အရှေ့မြင်းပြိုင်ကွင်းလမ်းမှ သံသုမာလမ်းထိ လမ်းအရှည် (၁၄၇၄၀)ပေ ရှိပြီး ၁၉၉၀-၁၉၉၁ ဘဏ္ဍာရေးနှစ်တွင် ကတ္တရာလမ်းအဖြစ် စတင်ဆောင်ရွက်ခဲ့သည်။ အဆိုပါလမ်းအား ၂၀၀၉-၂၀၁၀ ဘဏ္ဍာရေးနှစ်တွင် ဝေဇယန္တာရာလမ်းမှ ဇဝနလမ်းဆုံအထိ ၊ ၂၀၁၁- ၂၀၁၂ ဘဏ္ဍာရေးနှစ်တွင် ဇဝနလမ်းဆုံမှ ဦးဘဟန်လမ်းအထိ၊ ၂၀၁၈-၂၀၁၉ ဘဏ္ဍာရေးနှစ်တွင် ဦးဘဟန်လမ်းမှ သံသုမာလမ်းအထိ လမ်းအရှည် (၁၀၉၂၈) ပေနှင့် အကျယ်(၇၂)ပေအား ကွန်ကရိလမ်းအဖြစ် ရန်ကုန်မြို့တော်စည်ပင်သာယာရေးကော်မတီ အင်ဂျင်နီယာဌာန (လမ်းနှင့်တံတား)မှ ဘဏ္ဍာရေးနှစ်အလိုက် ဆောင်ရွက်ပေးခဲ့သည်။ ယခုအခါ (၇၈)နှစ်မြောက် တပ်မတော်နေ့ကို ဂုဏ်ပြုကြိုဆိုသောအားဖြင့် တာမွေမြို့နယ်ရှိ လေးထောင့်ကန်လမ်းတစ်လျှောက် ( အရှေ့မြင်းပြိုင်ကွင်းလမ်းမှ ဝေဇယန္တာလမ်းဆုံထိ) လမ်းအရှည် (၃၈၁၂)ပေကို ၂၀၂၂-၂၀၂၃ ဘဏ္ဍာရေးနှစ်တွင် နိုင်လွန်ကတ္တရာကွန်ကရိ ထပ်ပိုးလွှာ ခင်း၍ လမ်းအဆင့်မြှင့်တင်ဆောင်ရွက်နိုင်ခဲ့ခြင်းကြောင့် တိုင်းဒေသကြီးအတွင်း လမ်းပန်းဆက်သွယ်ရေး အဆင်ပြေ ချောမွေ့လာနိုင်ရုံသာမက ပြည်သူများ၏ လူမှုစီးပွားဘဝများလည်း ဖွံ့ဖြိုးတိုးတက်လာနိုင်တော့မည်ဖြစ်ကြောင်း သတင်းရရှိပါသည်။
နိုင်လင်းအောင်
https://t.me/MyanmarNationalPost
No comments:
Post a Comment