MNP ၊ ဩဂုတ် ၂၄
ရန်ကုန်တိုင်းဒေသကြီး ကမာရွတ်ခရိုင် ဗဟန်းမြို့နယ်အတွင်း ရုပ်မြင်သံကြားနှင့်ဗီဒီယိုဥပဒေပါ ပြဌာန်းချက်များနှင့်အညီ လုပ်ငန်းလုပ်ကိုင်မှုများ ရှိ/မရှိ မြေပြင်ကွင်းဆင်းစစ်ဆေးသွားမည်ဖြစ်သည်။
ထိုကဲ့သို့ကွင်းဆင်းစစ်ဆေးခြင်းများမပြုမီ လုပ်ငန်းရှင်များ၏အခက်အခဲများအား သိရှိနိုင်ရန်အတွက် ယမန်နေ့မွန်းလွဲ (၂) နာရီအချိန်က ဗဟန်းမြို့နယ် အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် မြို့နယ်စီမံအုပ်ချုပ်ရေးအဖွဲ့နှင့် မြို့နယ်ဗီဒီယိုလုပ်ငန်းစိစစ်ကြီးကြပ်ရေးကော်မတီဝင်များက ကာရာအိုကေ လုပ်ငန်းရှင်များနှင့် တွေ့ဆုံဆွေးနွေးခဲ့ကြသည်။
ဗဟန်းမြို့နယ်အတွင်း ကာရာအိုကေလုပ်ငန်းလုပ်ကိုင်သူများအနေဖြင့် ထုတ်ပြန်ထားသည့် ရုပ်မြင်သံကြားနှင့်ဗီဒီယိုဥပဒေပါ ပြဌာန်းချက်များနှင့်အညီ လုပ်ငန်းလုပ်ကိုင်မှုရှိ/မရှိ ကြီးကြပ်စစ်ဆေးခြင်း၊ ကာရာအိုကေလုပ်ငန်းလိုင်စင်ပါ စက်အစုံအရေအတွက်နှင့် မြေပြင်အရေအတွက် ကိုက်ညီမှု ရှိ/မရှိ စစ်ဆေးခြင်း၊ လုပ်ကိုင်သည့် လုပ်ငန်းအတွက် ဥပဒေနှင့်အညီ လုပ်ငန်းလိုင်စင်ရယူထားခြင်း ရှိ/မရှိ၊ သက်တမ်းတိုးဆောင်ရွက်ရေးစိစစ် ကြီးကြပ်ခြင်း၊ ညမထွက်ရအမိန့်အား လိုက်နာဆောင်ရွက်စေရေးနှင့် နိုင်ငံတော်သို့ပေးသွင်းရမည့် အခွန်များပေးသွင်းစေရေးအတွက် ဆွေးနွေးခဲ့ကြပြီး ရှောင်တခင်စစ်ဆေးခြင်းများကိုလည်း မြေပြင်ကွင်းဆင်း ဆောင်ရွက်သွားကြမည်ဖြစ်ကြောင်း သိရသည်။
၂၀၂၃- ခုနှစ် ဇူလိုင်လ (၁၃) ရက်နေ့ ရုပ်မြင်သံကြားနှင့် ဗီဒီယိုဥပဒေ၊ ဗီဒီယိုလုပ်ငန်းဆိုင်ရာ နည်းဥပဒေများနှင့်အညီ ကျင်းပပြုလုပ်သော ရန်ကုန်တိုင်းဒေသကြီး အစိုးရအဖွဲ့ အစည်းအဝေး ဆုံးဖြတ်ချက်များအရ ဗဟန်းမြို့နယ် ဗီဒီယိုလုပ်ငန်းစိစစ်ကြီးကြပ်ရေးကော်မတီကို ကော်မတီဝင် (၇)ဦးဖြင့် ဖွဲ့စည်းဆောင်ရွက်ခဲ့ကြောင်း သိရသည်။
ကြည်ဇေသော်
https://t.me/MyanmarNationalPost
No comments:
Post a Comment