MNP ၊ စက်တင်ဘာ ၁၄
ရှမ်းပြည်နယ်(မြောက်ပိုင်း)၊ လားရှိုး-မူဆယ် ပြည်ထောင်စုလမ်းမကြီးပေါ် လားရှိုးမြို့အထွက် ၉ မိုင်လမ်းခွဲတွင် ယမန်နေ့ ညနေ ၅ နာရီ အချိန်ခန့်က ယာဉ်နှစ်စီးတိုက်မှုဖြစ်ပွားခဲ့ကြောင်း သိရသည်။
အဆိုပါ ယာဉ်နှစ်စီးတိုက်မှုကြောင့် အမျိုးသားတစ်ဦး ထိခိုက်ဒဏ်ရာရရှိခဲ့ပြီး ပရဟိတအဖွဲ့များမှ လားရှိုးပြည်သူ့ဆေးရုံကြီးသို့ ပို့ဆောင်ပေးခဲ့ရကြောင်း သိရသည်။
“လားရှိုးကနေ မူဆယ်ဘက်ထွက်တဲ့လမ်းမှာ ယာဉ်ငယ်နှစ်စီးတိုက်တာပါ။ နှစ်စီးစလုံး လမ်းဘေးက မြောင်းထဲထိုးကျသွားတယ်။ တခြားကြီးကြီးမားမား ဒဏ်ရာရသူတွေတော့မရှိပါဘူး။ အမျိုးသားတစ်ဦးပဲ ဒဏ်ရာရလို့ လားရှိုးဆေးရုံကြီးကို ပို့လိုက်ရတယ်။”ဟု လားရှိုးလူငယ်လူမှုကူညီရေးအသင်းမှ ကိုဝသုန်က ပြောသည်။
လားရှိုး-မူဆယ် ပြည်ထောင်စုကားလမ်းမကြီးပေါ်တွင် တရုတ်နယ်စပ်သို့ နေ့စဉ် သွားရောက်ကြသည့် ယာဉ်ကြီး၊ယာဉ်ငယ်များ အများအပြား ဖြတ်သန်းသွားလာလျက်ရှိပြီး ယာဉ်တိုက်မှုများလည်း မကြာခဏ ဖြစ်ပွားလေ့ရှိကြောင်း သိရသည်။
စိုင်းထွန်း
https://t.me/MyanmarNationalPost
No comments:
Post a Comment