MNP ၊ စက်တင်ဘာ ၂၆
ရှမ်းပြည်နယ်တောင်ပိုင်း၊ မိုင်းနောင်မြို့အခြေခံပညာအထက်တန်းကျောင်းတွင် လိုအပ်လျက်ရှိသော KGကျောင်းဆောင်သစ် ဆောက်လုပ်နိုင်ရေးအတွက် ညှိနှိုင်းအစည်းအဝေးကို ယနေ့နံနက်(၉)နာရီအချိန်က ပြုလုပ်ခဲ့ကြောင်းသိရှိရသည်။
ရှေးဦးစွာ မိုင်းနောင်မြို့ အခြေခံပညာအထက်တန်းကျောင်းအုပ်ဆရာကြီးဦးဇော်မြင့်သိန်းက KGကျောင်းဆောင်သစ် ဆောက်လုပ်နိုင်ရေးအတွက် စီစဉ်ဆောင်ရွက်ထားရှိသည့် အခြေအနေနှင့် အစီအစဉ်များ၊ အရည်အသွေးပြည့်မီသည့် ကျောင်းဆောင်သစ်အဆောက်အအုံဖြစ်စေရေး၊ ပညာသင်ယူမည့် သားငယ်၊သမီးငယ်များ အန္တရာယ်ကင်းဘေးရှင်းရေး၊ လေကောင်းလေသန့်ရရှိပြီး ကောင်းမွန်သော သဘာဝပတ်ဝန်းကျင်အတွင်း အဆင်ပြေသည့်မြေနေရာတွင် ဆောက်လုပ်နိုင်ရေးတို့ကို ဝိုင်းဝန်းအကြံပြုပေးကြပါရန် ရှင်းလင်းပြောကြားခဲ့ကြောင်း သိရှိရသည်။
အဆိုပါ ညှိနှိုင်းအစည်းအဝေးသို့ ကျောင်းအုပ်ဆရာကြီးနှင့်ဆရာ/ဆရာမများ၊ မိဘဆရာ အသင်းဝင်များ(၂၅)ဦး တက်ရောက်ကာ KGကျောင်းဆောင်သစ် ဆောက်လုပ်နိုင်ရေးအတွက် ကော်မတီဖွဲ့စည်းခြင်း၊ လုပ်ငန်းတာဝန်များခွဲဝေခြင်း၊ ပူးပေါင်းဆောင်ရွက်ရမည့် လုပ်ငန်းတာဝန်များအား အပြန်အလှန်ဆွေးနွေးညှိနှိုင်း၍ ကျောင်းဆောင်သစ်ဆောက်လုပ်မည့် မြေနေရာအား ကြည့်ရှုအတည်ပြုခဲ့ကြောင်း သိရှိရသည်။
မနန်း
https://t.me/MyanmarNationalPost
No comments:
Post a Comment