ရန်ကုန် မတ် ၁၈
ရန်ကုန်တိုင်းဒေသကြီး၊ အင်းစိန်ခရိုင်၊ အင်းစိန်မြို့နယ်၌ ဇီဝဆိုင်ရာအချက်အလက်ကောက်ယူခြင်း၊ (Unique ID) ထုတ်ပေးခြင်းလုပ်ငန်းနှင့် သန်းခေါင်စာရင်း ကောက်ယူနိုင်ရေးအတွက် အဆောက်အဦး မှတ်တမ်းတင်ခြင်း လုပ်ငန်းများကို ယနေ့နံနက်ပိုင်းက အင်းစိန်မြို့နယ်အတွင်းရှိ ရပ်ကွက်များတွင် လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန ဝန်ထမ်းများမှ အဖွဲ့များခွဲ၍ နေ့စဉ်ဆောင်ရွက်လျက်ရှိသည်။
အင်းစိန်မြို့နယ်၌ ဇီဝဆိုင်ရာအချက်အလက်ကောက်ယူခြင်းနှင့်(Unique ID) ထုတ်ပေး ခြင်းလုပ်ငန်းများကို၂၀၂၃ခုနှစ်၊ဇွန်(၂၆)ရက်နေ့မှ စတင်ကာ အင်းစိန်မြို့နယ်၊ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန မြို့နယ်ဦးစီးမှူး ဦးညီညီစိုးနှင့် ဝန်ထမ်းများက ပြည်သူများကို နိုင်ငံသားစိစစ်ရေးကတ်ပြားများ ယူဆောင်လာစေပြီး ဇီဝဆိုင်ရာ အချက်အလက်စိစစ်ကောက်ယူကာ (Database) တွင် သိမ်းဆည်း၍ မတူညီဂဏန်း (၁၀)လုံးပါဝင်သည့် (Unique ID) နံပါတ်ကတ်ပြားများကို ရုံးပိတ်ရက်မှလွဲ၍ နေ့စဉ်ဆောင်ရွက်ပေးလျက်ရှိသည်။
အလားတူ အင်းစိန်မြို့နယ်၌ သန်းခေါင်စာရင်းကောက်ယူနိုင်ရေးအတွက် ကြိုတင်ပြင်ဆင်ခြင်းလုပ်ငန်းဖြစ်သည့် အဆောက်အဦးစာရင်းတင်ခြင်း (ဆ-၀၂) ကောက်ယူခြင်းလုပ်ငန်းကို အင်းစိန် မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးစိုးမင်းထွဋ်၊ အဖွဲ့ဝင်(၁)ဗိုလ်မှူးသုခလှိုင်၊အဖွဲ့ဝင်(၃)ဦးညီညီ စိုး၊အတွင်းရေးမှူး ရဲမှူးသန့်ဇင်၊ မြို့နယ်လဝကမှ ဝန်ထမ်းများ၊ မြို့နယ်အထွေထွေအုပ်ချုပ်ရေးဦးစီး ဌာနမှဝန်ထမ်းများ၊ ရပ်ကွက်အုပ်ချုပ်ရေးအဖွဲ့များနှင့် တာဝန်ရှိသူများက ပူးပေါင်း၍ ဆောင်ရွက်လျက်ရှိရာ အင်းစိန်ခရိုင် ခရိုင်လဝကဦးစီးမှူး ဒုတိယညွှန်ကြားရေမှူး ဦးမင်းဆွေမှ အနီးကပ်ကြီးကြပ် ဆောင်ရွက်လျက်ရှိကြောင်း သိရသည်။
ဇွဲထက်ကို
https://t.me/MyanmarNationalPost
No comments:
Post a Comment