မလှိုင်မြို့နယ်၌ အလယ်တန်းအဆင့်နှင့်မူလတန်းအဆင့် စွမ်းရည်မြှင့်သင်တန်းများ ဖွင့်လှစ်

မလှိုင်  မတ် ၂၅

မန္တလေးတိုင်းဒေသကြီး၊ မလှိုင်မြို့နယ်ပညာရေးဌာနမှ ကြီးမှူး၍ စွမ်းရည်မြှင့်သင်တန်းများကို ယနေ့နံနက်(၉)နာရီအချိန်မှ စတင်၍ ဖွင့်လှစ်သင်ကြားလျက်ရှိရာ အလယ်တန်းအဆင့် စွမ်းရည်မြှင့်သင်တန်းကို မြို့သစ်(အ.ထ.က)ကျောင်း၌လည်းကောင်း၊ မူလတန်းအဆင့် စွမ်းရည်မြှင့်သင်တန်းကို မလှိုင်(အ.ထ.က)၌ လည်းကောင်း သင်ကြားပို့ချလျက်ရှိကြောင်း သိရသည်။

ရှေးဦးစွာ အလယ်တန်းအဆင့် စွမ်းရည်မြှင့်သင်တန်း မစတင်မီ သင်တန်းသား/သူ ဆရာ/မများနှင့် တွေ့ဆုံ၍  ဒုတိယမြို့နယ်ပညာရေးမှူး ဦးတင်မောင်မြင့်က စွမ်းရည်မြှင့်သင်တန်းများ ဖွင့်လှစ်ရခြင်း၏ ရည်ရွယ်ချက်နှင့်သင်တန်းစည်းမျဉ်းစည်းကမ်းများအကြောင်းကို ရှင်းလင်းပြောကြားခဲ့သည်။ ထို့နောက် စွမ်းရည်မြှင့်သင်တန်းကို ဆက်လက်၍ ဖွင့်လှစ်ပို့ချခဲ့ရာ အခြေခံပညာအထက်တန်းကျောင်း၊ အထက်တန်း ကျောင်းခွဲ၊  အလယ်တန်းကျောင်း၊ အလယ်တန်းကျောင်းခွဲများမှ (Grade 6 မှ Grade 9)အထိ အလယ်တန်းအဆင့်သင် ဆရာ၊ဆရာမ (၃၂၈) ဦး  တက်ရောက်ခဲ့ပြီး သင်တန်းနည်းပြဆရာ (၂၂)ဦးတို့က မြန်မာစာ၊ အင်္ဂလိပ်စာ၊ သင်္ချာ၊ ပထဝီဝင်၊ သိပ္ပံ၊ သမိုင်း ဘာသာရပ်များကို ပို့ချ သင်ကြားသွားမည်ဖြစ်သည်။ သင်တန်းကာလမှာ (၂၅-၃-၂၀၂၄ ရက်နေ့မှ ၃၀-၃-၂၀၂၄)ရက်နေ့အထိ (၅)ရက် ကြာပို့ချသွားမည်ဖြစ် ကြောင်း သိရသည်။

အလားတူ မူလတန်းအဆင့် စွမ်းရည်မြှင့်သင်တန်းကို ယနေ့နံနက်(၉)နာရီအချိန်မှစတင်၍ မလှိုင် (အ.ထ.က) ကျောင်းတွင် ဖွင့်လှစ်ပို့ချခဲ့ရာ မြို့နယ်အတွင်းမှ အခြေခံပညာကျောင်းများရှိ KG တန်းမှ Grade 5  အထိနှင့် ကိုယ်ပိုင်ကျောင်းတစ်ကျောင်းမှ မူလတန်းအဆင့်သင် ဆရာ/မ (၉၉၆)ဦးတက်ရောက်ခဲ့ပြီး နည်းပြ(၅၈)ဦးတို့မှ သက်ဆိုင်ရာဘာသာရပ်များကို သင်တန်းပို့ချသွားမည်ဖြစ်ပြီး သင်တန်းကာလမှာ အလယ်တန်းအဆင့်နှင့်အတူ (၂၅-၃-၂၀၂၄ ရက်နေ့မှ ၃၀-၃-၂၀၂၄)ရက်နေ့အထိ (၅)ရက် ပို့ချသွားမည်ဖြစ်သည်။ အလယ်တန်းအဆင့် စွမ်းရည်မြှင့်သင်တန်းကို ဒုတိယမြို့နယ်ပညာရေးမှူး ဦးတင်မောင်မြင့်မှ လည်းကောင်း၊  မူလတန်းအဆင့် စွမ်းရည်မြှင့်သင်တန်းကို ဒုတိယ မြို့နယ်ပညာရေးမှူး ဦးရဲမြင့်မှလည်းကောင်း၊ သင်တန်းရုံးအဖွဲ့များနှင့်အတူ အနီးကပ်ကြီးကြပ် ဆောင်ရွက်လျက်ရှိကြောင်း သိရသည်။

အောင်ဌေး(မလှိုင်)

https://t.me/MyanmarNationalPost