ဗြိတိန်စစ်တပ်က ဆန္ဒပြသူတွေကို ထိန်းသိမ်း အရေးယူမှာ မဟုတ်ဟုဆို

ဗြိတိန်စစ်တပ်သည် ဗြိတိန်နိုင်ငံတစ်ဝှမ်းတွင် ပျံ့နှံ့ဖြစ်ပွားနေသော အဓိကရုဏ်းများကို ကိုင်တွယ်ဖြေရှင်းရာတွင် ပါဝင်မည်မဟုတ်ကြောင်း ကာကွယ်ရေးဝန်ကြီး John Healey က ပြောကြားပြီး ရဲတပ်ဖွဲ့က ထိန်းသိမ်းရန် အခွင့်အာဏာရှိသည်ဟု အခိုင်အမာပြောဆိုခဲ့သည်။

Rotherham တွင် ဆန္ဒပြသူများသည် ဟိုတယ်တွင် ခိုလှုံခွင့်တောင်းသူများကို မီးတင်ရှို့ခဲ့သည်။

ပြီးခဲ့သော တနင်္လာနေ့မှစတင်ကာ ရဝမ်ဒါနွယ်ဖွား ဗြိတိန်ဆယ်ကျော်သက်တစ်ဦးမှ ကလေးသုံးဦးကို ဓားဖြင့်ထိုးသတ်ခဲ့ရာမှ လက်ယာယိမ်းဆန္ဒပြမှုများ၊ လူဝင်မှုကြီးကြပ်ရေးနှင့် အစ္စလာမ်ဆန့်ကျင်ရေး အဓိကရုဏ်းများကြောင့် ဗြိတိန်မြို့နှင့် မြို့ပေါင်း ဒါဇင်နှင့်ချီပြီး ပြင်းထန်စွာ လှုပ်ခတ်လာခဲ့သည်။

အဓိကရုဏ်းများကို ကိုင်တွယ်ဖြေရှင်းရန် စစ်တပ်ကို ခေါ်ဆောင်လာရဖွယ် ရှိ/မရှိ မေးမြန်းရာတွင် Healey က “မဟုတ်ဘူး… အဲဒါကို ရဲတွေက အရင်တုံ့ပြန်ဖို့ တာဝန်ရှိပြီး လောလောဆယ် သူတို့မှာ လုပ်နိုင်တဲ့ နည်းလမ်းတွေ ရှိပါတယ်” ဟု ဖြေကြားခဲ့သည်။

“သူတို့က လူတွေ ဘေးကင်းကြောင်း သေချာစေမှာပါ” ဟု Healey က ဆက်ပြောသည်။

ပြုပြင်ပြောင်းလဲရေး ယူကေခေါင်းဆောင် Nigel Farage သည် X (ယခင် Twitter) တွင် တနင်္လာနေ့တွင် တင်ထားသော ကြေညာချက်တွင် ရဲအရာရှိများအပေါ် အကြမ်းဖက်မှုကို ရှုတ်ချခဲ့ပြီး သီတင်းပတ်ကုန်ရက်က မငြိမ်မသက်မှုများကြောင့် ထိတ်လန့်ခဲ့ရပြီး ရေရှည်ပြဿနာများ ဆက်လက်ကျန်ရှိနေသေးကြောင်း ပြောကြားခဲ့ပြီးနောက် ယခုကဲ့သို့ မှတ်ချက်ပြုခဲ့ခြင်းဖြစ်သည်။ ပါလီမန်ကို ပြန်လည်ခေါ်ယူရန်လည်း ၎င်းက တိုက်တွန်းခဲ့ပြီး အစိုးရအနေဖြင့် တပ်မတော်ကို တပ်ဖြန့်ရန် စဉ်းစားသင့်သည်ဟု ပြောကြားခဲ့သည်။

လီဗာပူးလ်၊ ဘရစ်စတို၊ မန်ချက်စတာ၊ Hull၊ Belfast၊ Stoke နှင့် ယူကေတစ်ဝှမ်းရှိ အခြားမြို့ကြီးများတွင် သီတင်းပတ်များအတွင်း အဓိကရုဏ်းများ ဖြစ်ပွားခဲ့ပြီးနောက် အနည်းဆုံး လူ ၄၀၀ ထက်မနည်း ဖမ်းဆီးခံခဲ့ရကြောင်း မီဒီယာများက ဖော်ပြသည်။

ဝန်ကြီးချုပ်၏ ပြောရေးဆိုခွင့်ရှိသူက အဓိကရုဏ်းများကို ချေမှုန်းရန်အတွက် စစ်တပ်အကူအညီပေးရန် တောင်းဆိုခဲ့ခြင်း မရှိကြောင်း ဂါးဒီးယန်းသို့ ပြောကြားခဲ့သည်။

“ရဲတွေက လူမှုအသိုင်းအဝိုင်းကို ကာကွယ်ဖို့နဲ့ လူတွေကို ဘေးကင်းအောင် ထိန်းသိမ်းဖို့ သူတို့လိုအပ်တဲ့ စွမ်းအားနဲ့ အရင်းအမြစ်တွေ ရှိနေတယ်ဆိုတာ ရှင်းပါတယ်” ဟု ပြောရေးဆိုခွင့်ရှိသူက ပြောကြားခဲ့သည်။ “စစ်ဘက်ဆိုင်ရာ အကူအညီတွေ တောင်းခံတာမျိုးတော့ မရှိပါဘူး၊ ကျွန်တော် သိပါတယ်။”

Ref - RT

#MyanmarNationalPost