အပြာရောင်ကာဗွန် ( သို့ ) ရာသီဥတုပြောင်းလဲမှုကို တိုက်ဖျက်ဖို့ လျှို့ဝှက်လက်နက်

ဇွန် - ၇ ( စနေနေ့ ) 

ကမ္ဘာကြီးသည် ရာသီဥတုပြောင်းလဲမှုကို ကိုင်တွယ်ဖြေရှင်းရန် အရေးတကြီး လိုအပ်နေချိန်တွင် ကာဗွန်စုပ်ယူမှုနဲ့ ပတ်သက်ပြီး  သမုဒ္ဒရာများ၏အခန်းကဏ္ဍက အရေးကြီးလာကြောင်း ပညာရှင်တွေက မီးမောင်းထိုးပြလာကြပါတယ်။ ၂၀၂၅ ကမ္ဘာ့ သမုဒ္ဒရာများနေ့ နဲ့ အမျိုးသား သမုဒ္ဒရာအကြောင်းထုတ်ဝေမှုနေ့ ဆောင်ပုဒ် ဖြစ်တဲ့ “လူသားတွေနဲ့ သဘာဝကြား ဟန်ချက်ညီ ယှဉ်တွဲနေထိုင်ရေး အတွက် အဏ္ဏဝါဂေဟစနစ်ကို ကာကွယ်ခြင်း” ခေါင်းစဉ်ဖြင့် ဇွန်လ ၈ ရက်နေ့တွင် ကျင်းပမည်ဖြစ်ပြီး ကမ္ဘာ့ကာဗွန်ထုတ်လွှတ်မှု ပိတ်သိမ်းရေးနဲ့ ရာသီဥတုပြောင်းလဲမှု လျော့ပါးရေးအတွက် သမုဒ္ဒရာများ၏ အရေးပါသော အခန်းကဏ္ဍကို မီးမောင်းထိုးပြမှာဖြစ်ပါတယ်။ 

ကမ္ဘာ့အကြီးဆုံး ကာဗွန်စုပ်ယူထားနိုင်သူအဖြစ် သမုဒ္ဒရာသည် လေထုထက် အဆ ၅၀ ပိုကာ ကာဗွန်ကို သိုလှောင်ထားပြီး ကုန်းနေဂေဟစနစ်များထက် အဆ ၂၀ ပိုများပါတယ်။ ၎င်းသည် ကမ္ဘာ့ နှစ်စဉ် ကာဗွန်ဒိုင်အောက်ဆိုဒ် ထုတ်လွှတ်မှု၏ သုံးပုံတစ်ပုံခန့်ကို စုပ်ယူထားပါတယ်။ ဒီရေတောများ၊ ပင်လယ်ကြမ်းခင်း မြက်ခင်းများနှင့် ဆားနွံများကဲ့သို့ ဂေဟစနစ်များအပေါ် မှီခိုနေရသည့် အဏ္ဏဝါကာဗွန် စုဆောင်းခြင်း သို့မဟုတ် "အပြာရောင်ကာဗွန်" သည် ကမ္ဘာ၏ ကာဗွန်ဟန်ချက်ကို ထိန်းသိမ်းရာတွင် အရေးပါသော အခန်းကဏ္ဍမှ ပါဝင်ပါတယ်။ 

ပစိဖိတ်ကျွန်းနိုင်ငံများသည် ၎င်းတို့၏ ကြီးမားသော သမုဒ္ဒရာအရင်းအမြစ်များနှင့်အတူ အပြာရောင်ကာဗွန် နယ်ပယ်တွင် မဟာဗျူဟာမြောက် အနေအထားကို ကိုင်စွဲထားပါတယ်။ သို့သော်လည်း ၎င်းတို့သည် ၎င်းတို့၏ ကုန်းမြေငယ်များနှင့် မြေနိမ့်ပိုင်း မြေမျက်နှာသွင်ပြင်များကြောင့် ပင်လယ်ရေမျက်နှာပြင် မြင့်တက်မှု နှင့် ပြင်းထန်သော ရာသီဥတုဖြစ်စဉ်များကဲ့သို့သော ရာသီဥတုပြောင်းလဲမှု၏ အကျိုးသက်ရောက်မှုများကို ခံစားနေကြရပါတယ်။ 

အဲ့ဒိနောက်ခံအကြောင်းအရာကို ဆန့်ကျင်တဲ့အနေနဲ့ တရုတ်နိုင်ငံက ပစိဖိတ်ကျွန်းနိုင်ငံများနဲ့ အဏ္ဏဝါကာဗွန် စုပ်ယူမှုတွင် ပူးပေါင်းဆောင်ရွက်မှုကို အားကောင်းစေခဲ့ပါတယ်။ ဇွန် ၅ ရက်မှ ၇ ရက်အထိ ကျင်းပသည့် ရှန်ဟိုင်း နိုင်ငံတကာ ကာဗွန် ကင်းစင်ရေး ကုန်စည်ပြပွဲတွင် “ကာဗွန်-ကင်းစင်သော အနာဂတ်ဆီသို့” ဟူသော ဆောင်ပုဒ်ဖြင့် အပြာရောင် ကာဗွန် နယ်ပယ်တွင် သိသာထင်ရှားသော ပူးပေါင်းဆောင်ရွက်မှု ပရောဂျက်များနှင့် နည်းပညာဆိုင်ရာ အောင်မြင်မှုများကို ကြေညာခဲ့ပါတယ်။ 

ခရုခွံ နှင့် ရေညှိပင်ငယ်များ လို ရေနေစိုက်ပျိုးမွေးမြူရေး လုပ်ငန်းတွေက ကာဗွန် စုဆောင်းရေး ပရောဂျက်အတွက် အလွန်ပင် အထွတ်အထိပ် ရောက်နေပါတယ်။ သဘာဝအရင်းအမြစ်ဝန်ကြီးဌာန မှ ဒေါက်တာ ယန်ကျင်ပိုင် ရဲ့ အဆိုအရ တရုတ်နိုင်ငံ၏ ကမ်းရိုးတန်း ရှိ အပြာရောင် ကာဗွန်ဂေဟစနစ် သုံးခုရဲ့  နှစ်စဉ် ကာဗွန်စုပ်ထုတ်နိုင်စွမ်းမှာ ခန့်မှန်းခြေအားဖြင့် ကာဗွန်ဒိုင်အောက်ဆိုက်တန်ချိန် ၁သန်းကျော်မှ ၃သန်းကျော်အထိ ရှိတယ်လို့ သိရပါတယ်။ အထူးသဖြင့် ရေညှိပင် စိုက်ပျိုးခြင်း နဲ့ ကမာကောင်မွေးမြူခြင်း ကြီးစိုးသော ကမ္ဘာ့အကြီးဆုံး အဏ္ဏဝါစိုက်ပျိုးမွေးမြူရေး နိုင်ငံအနေဖြင့် တရုတ်နိုင်ငံရဲ့ ထုတ်လုပ်မှုက ၎င်း၏ စုစုပေါင်းထွက်ရှိမှုရဲ့ ၈၅ ရာခိုင်နှုန်းခန့်ဖြစ်ပါတယ်။ ၂၀၃၀ ခုနှစ်တွင် တရုတ်နိုင်ငံရှိ အဏ္ဏဝါစိုက်ပျိုးမွေးမြူရေး လုပ်ငန်းများသည် နှစ်စဉ်ကာဗွန်တန်ချိန် ၂.၃ သန်းခန့်ကို ဖယ်ရှားနိုင်မယ် လို့ ခန့်မှန်းရပြီး၂၀၅၀ ခုနှစ်တွင် တန်ချိန် ၄ သန်းကျော်အထိ ဖယ်ရှားနိုင်မယ်လို့ ခန့်မှန်းထားပါတယ်။ ရေညှိပင်တွေက  အလင်းမှီအစာစုဖွဲ့ခြင်းမှ တစ်ဆင့် ကာဗွန်ဒိုင်အောက်ဆိုဒ်ကို စုပ်ယူပြီး သမုဒ္ဒရာအတွင်း၌ ကာဗွန်ကို သိုလှောင်ထားတာပဲဖြစ်ပါတယ်။ 

တရုတ် ပစိဖိတ် ကုန်သွယ်ရေး ရင်းနှီးမြုပ်နှံမှု ၏ ကုန်သွယ်ရေးကော်မရှင်နာ မိုနာမာတို က အဆိုပါ ပူးပေါင်း ဆောင်ရွက်မှု ပရောဂျက်များရဲ့ အရေးပါမှုကို အလေးပေးပြောကြားခဲ့ပါတယ်။ "အဏ္ဏဝါကာဗွန် စုပ်ယူမှုတွင် တရုတ်နှင့်ပူးပေါင်းခြင်းက ပစိဖိတ်ကျွန်းနိုင်ငံများအတွက် အလွန်အရေးကြီးကြောင်းနဲ့ ရာသီဥတုပြောင်းလဲမှု ဆိုင်ရာ စိန်ခေါ်မှုများကို ဖြေရှင်းပေးရုံသာမက ဒေသတွင်း ရေရှည်တည်တံ့သော ဖွံ့ဖြိုးတိုးတက်မှုကိုလည်း မြှင့်တင်ပေးနိုင်ကြောင်း ပြောသွားပါတယ်။ 

ပရောဂျက်ကို အကောင်အထည်ဖော်ခြင်းအပြင် တရုတ်နိုင်ငံသည် အဏ္ဏဝါကာဗွန်စုပ်ခွက်များအတွက် ဈေးကွက်ဦးတည်သည့် လမ်းကြောင်းများကို ရှာဖွေလျက်ရှိပါတယ်။ ကာဗွန်ကုန်သွယ်မှုသည် အလားအလာ ရှိသော စီးပွားရေးပုံစံတစ်ခုအဖြစ် ပေါ်ထွက်လာနိုင်ပါတယ်။ အပြာရောင် ကာဗွန်ဖွံ့ဖြိုးတိုးတက်ရေး ပရောဂျက်ကို အပြာရောင်ကာဗွန်အရင်းအမြစ်များဖော်ထုတ်ခြင်း၊ အပြာရောင်ကာဗွန်နည်းစနစ် ဖွံ့ဖြိုးတိုးတက်မှု၊ အပြာရောင်ကာဗွန်စောင့်ကြည့်ရေးနှင့် စာရင်းပြုစုခြင်း၊ အပြာရောင်ကာဗွန်အတည်ပြုခြင်းနှင့် အပြာရောင်ကာဗွန်ရောင်းဝယ်ရေးတို့ကို အဓိကအစိတ်အပိုင်းငါးခုအဖြစ် အမျိုးအစားခွဲခြားနိုင်ပြီး လုပ်ကိုင်နိုင်ပါတယ်။ 

"နည်းပညာဆိုင်ရာ ဆန်းသစ်တီထွင်မှု၊ မူဝါဒ ပံ့ပိုးမှုနှင့် ရပ်ရွာလူထု ပူးပေါင်းပါဝင်မှုတို့ကို ပေါင်းစပ်ခြင်းဖြင့် သဘာဝပတ်ဝန်းကျင်နှင့် စီးပွားရေး နှစ်ခုစလုံးအတွက် win-win အခြေအနေကို ဖန်တီးနိုင်ပါတယ်” လို့ ၎င်းကဆိုပါတယ်။  သမုဒ္ဒရာ၏ စီးပွားရေးတန်ဖိုးသည်လည်း မြင့်တက်လာနေပါတယ်။ စီးပွားရေး ပူးပေါင်း ဆောင်ရွက်မှုနှင့် ဖွံ့ဖြိုးတိုးတက်ရေးအဖွဲ့ (OECD) က ၂၀၃၀ ခုနှစ်တွင် သမုဒ္ဒရာ၏ စီးပွားရေးတန်ဖိုးသည် ကမ္ဘာ့ပဉ္စမမြောက် အကြီးဆုံး စီးပွားရေးနှင့် ညီမျှသော ဒေါ်လာ ၃ ထရီလီယံ ကျော်လွန်မယ်လို့ ခန့်မှန်းထားပါတယ်။ 

REF: CGTN

https://t.me/MyanmarNationalPost