ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ် ဦးမျိုးဆွေဝင်း တိုင်းဒေသကြီးမီးသတ်ဦးစီးဌာနသို့ မီးငြှိမ်းသတ်ယာဉ်များနှင့် ရှာဖွေကယ်ဆယ်ရေးယာဉ်များ လွှဲပြောင်းပေးအပ်

ပဲခူး၊ ဇွန် ၁၄

တိုင်းဒေသကြီးအစိုးရအဖွဲ့ ခွင့်ပြုရန်ပုံငွေဖြင့် ဝယ်ယူခဲ့သည် မီးငြှိမ်းသတ်ယာဉ်များနှင့် ရှာဖွေကယ်ဆယ်ရေးယာဉ်များအား တိုင်းဒေသကြီးဝန်ကြီးချုပ် ဦးမျိုးဆွေဝင်းမှ တိုင်းဒေသကြီးမီးသတ်ဦးစီးဌာနသို့ လွှဲပြောင်းပေးအပ်ခြင်းအား ယမန်နေ့က တိုင်းဒေသကြီးအစိုးရအဖွဲ့ရုံး၌ ကျင်းပပြုလုပ်သည်။

ရှေးဦးစွာ တိုင်းဒေသကြီးဝန်ကြီးချုပ် ဦးမျိုးဆွေဝင်းသည် တိုင်းဒေသကြီးအစိုးရအဖွဲ့အစီအစဉ်ဖြင့် ဝယ်ယူခဲ့သည့် မီးငြိမ်းသတ်ယာဉ်၊ ရှာဖွေကယ်ဆယ်ရေးမီးသတ်ယာဉ်နှင့် မီးသတ်ဆက်စပ်ပစ္စည်များ လွှဲပြောင်းပေးအပ်ပွဲသို့ တက်ရောက်ခဲ့ရာ မီးသတ်ရေယာဉ်များနှင့်ပတ်သက်၍ အချက်အလက်များအား တိုင်းဒေသကြီး မီးသတ်ဦးစီးဌာနမှူးက လိုက်လံရှင်းလင်းတင်ပြခဲ့မှုပေါ် တိုင်းဒေသကြီး ဝန်ကြီးချုပ်က မီးသတ်ယာဉ်များ ဝယ်ယူဖြည့်တင်းပေးခြင်းသည် ပြည်သူလူထု၏ အသက်အိုးအိမ်စည်းစိမ်များ ပျက်စီးမှုမရှိစေရေး ဆောင်ရွက်ပေးရခြင်းဖြစ်ကြောင်း၊ မီးသတ်ယာဉ်များအား လိုအပ်သည့်ဒေသများသို့ ချက်ခြင်းခွဲဝေချထားပေးရန်နှင့် မီးသတ်ယာဉ်များ ခွဲဝေချထားပေးရာတွင် မြို့နယ်အလိုက် လူဦးရေ၊ အိမ်ခြေ၊ အိမ်ထောင်စုနှင့် မြို့တွင်းဝင်/ထွက်လမ်းကို အခြေခံပြီး မီးသတ်ယာဉ်အမျိုးအစားလိုက် ခွဲဝေချထားပေးရန်၊ မီးသတ်သမားများအား မီးသတ်ယာဉ်များနှင့် အကျွမ်းတဝင်ရှိစေရေး လေ့ကျင့်ခြင်း၊  စွမ်းရည်မြှင့်သင်တန်းများ ပို့ချပေးခြင်း၊ ဇာတ်တိုက်လေ့ကျင့်ခြင်းများ စဉ်ဆက်မပြတ် ကြိုးစားဆောင်ရွက်ရန်လိုအပ်ကြောင်းနှင့် နေ့စဉ်အချိန်ပြည့် ယာဉ်အသင့်၊ စက်အသင့်၊ လူအသင့်ဖြစ်ရန် ပြောကြားခဲ့သည်။

ယင်းနောက် ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ် ဦးမျိုးဆွေဝင်းက တိုင်းဒေသကြီးအစိုးရအဖွဲ့ ခွင့်ပြုရန်ပုံငွေဖြင့် ဝယ်ယူခဲ့သည့် 6x6 Fire Fighting Vehicle (Water 2800 Gal & Foam 900 Gal) မီးသတ်ယာဉ် (၁၀)စီး၊ (4x2) Fire Fighting & Rescue Vehicle (၂)စီး၊ အပေါ့စားမီးသတ်စက် (၃၀)လုံးနှင့် Chain Saw (၃၀)လုံးတို့အား တိုင်းဒေသကြီး မီးသတ်ဦးစီးဌာနမှူးထံ လွှဲပြောင်းပေးအပ်ခဲ့သည်။ ၎င်းနောက် မီးသတ်ယာဉ်များမှ သရုပ်ပြမီးငြှိမ်းသတ်ခြင်းအား ပြသခဲ့ရာ တိုင်းဒေသကြီးဝန်ကြီးချုပ်နှင့် အစိုးရအဖွဲ့ဝင် ဝန်ကြီးများက ကြည့်ရှုအားပေးခဲ့ကြသည်။

အဆိုပါ မီးငြှိမ်းသတ်ယာဉ် (၁၀)စီးအား ဒိုက်ဦး၊ ရေတာရှည်၊ ဖြူး၊ ပြည်၊ ပန်းတောင်း၊ သဲကုန်း၊ မင်းလှ၊ အုတ်ဖို၊ ကြို့ပင်ကောက်၊ လက်ပံတန်းမြို့နယ်များသို့ ဖြန့်ခွဲပေးသွားမည်ဖြစ်ကာ ရှာဖွေကယ်ဆယ်ရေး မီးသတ်ယာဉ် (၂)စီးအား ပဲခူးမြို့နယ်နှင့် သာယာဝတီခရိုင်သို့ ပေးပို့သွားမည်ဖြစ်ကြောင်း သတင်းရရှိသည်။

သက်ဖြိုးကြိုင် 

https://t.me/MyanmarNationalPost