ကရင်ပြည်နယ်အတွင်း ယာဉ်မောင်းသူ၏ပေါ့ဆမှုနှင့် လမ်းစည်းကမ်း၊ ယာဉ်စည်းကမ်းမလိုက်နာမှုတို့ကြောင့် ယာဉ်မတော်တဆမှုများအဓိကဖြစ်ပွား

ဘားအံ  ၊နိုဝင်ဘာ ၂၆

ကရင်ပြည်နယ်အတွင်း ယာဉ်တိုက်မှုများနှင့်သေဆုံးထိခိုက်မှုများတွင် လူကြောင့်ဖြစ်သည့် ယာဉ်မောင်းသူ၏ပေါ့ ဆမှုနှင့် လမ်းစည်းကမ်း၊ ယာဉ်စည်းကမ်းမလိုက်နာမှုတို့သည် အဓိကအကြောင်းအရင်းဖြစ်ကြောင်း နိုဝင်ဘာလ ၂၆ ရက် နံနက် ၁၀ နာရီက ပြည်နယ်အစိုးရအဖွဲ့ရုံး အစည်းအဝေးခန်းမ(၂)၌ ကျင်းပသည့် ကရင်ပြည်နယ်အစိုးရအဖွဲ့ ယာဉ်အန္တရာယ်၊ လမ်းအန္တရာယ်ကင်းရှင်းရေးကောင်စီ၏(၆/၂၀၂၅)ကြိမ်မြောက် လုပ်ငန်းညှိနှိုင်းအစည်းအဝေးမှ သိရသည်။

ကရင်ပြည်နယ်ယာဉ်အန္တရာယ်၊ လမ်းအန္တရာယ်ကင်းရှင်းရေးကောင်စီဥက္ကဋ္ဌ ပြည်နယ်ဝန်ကြီးချုပ် ဦးစောမြင့်ဦးက ကျောင်းသား၊ ကျောင်းသူ၊ လူငယ်များနှင့် ဒေသခံပြည်သူများ ယာဉ်စည်းကမ်း၊လမ်းစည်းကမ်းကို အလွယ်တကူသိရှိနားလည်စေရန် ပညာပေးအစီအစဉ်များ ပိုမိုဖြန့်ကျက်ဆောင်ရွက်စေလိုပြီး စည်းကမ်းပျက်ယာဉ်စစ်ဆေးအရေးယူမှုများ ပိုမိုထိရောက်မှုရှိစေရေး သက်ဆိုင်ရာဆပ်ကော်မတီများနှင့် ဌာနဆိုင်ရာအဖွဲ့အစည်းများက ပူးပေါင်းဆောင်ရွက်ပေးကြ စေလိုကြောင်း ယင်းအစည်းအဝေးတွင် တိုက်တွန်းပြောကြားသည်။

ထို့နောက် ယာဉ်အန္တရာယ်၊ လမ်းအန္တရာယ်ကင်းရှင်းရေးကောင်စီအဖွဲ့ဝင်များက ယခင်အပတ်အစည်းအဝေး ဆုံးဖြတ်ချက်များအပေါ် လိုက်နာဆောင်ရွက်ပြီးစီးမှုအခြေအနေများကို ရှင်းလင်းတင်ပြကြပြီး ကောင်စီအတွင်းရေးမှူး ကုန်းလမ်းပို့ဆောင်ရေးညွှန်ကြားမှုဦးစီးဌာန ပြည်နယ်ဦးစီးမှူးဦးအောင်ဇေဝင်းက ကရင်ပြည်နယ်ယာဉ်အန္တရာယ်၊ လမ်းအန္တရာယ်ကင်းရှင်းရေးကောင်စီ၏ လုပ်ငန်းအကောင်အထည်ဖော်ဆောင်ရွက်ချက်များကို ဆွေးနွေးတင်ပြကာ တွဲဖက်အတွင်းရေးမှူး အမှတ်(၁၀)ယာဉ်ထိန်းရဲဒုတပ်ဖွဲ့ခွဲမှူးရဲမှူးဟန်မွှေးက ယခုနှစ်အတွင်း ယာဉ်မတော်တဆဖြစ်ပွားမှု၊ ကာလတူနှိုင်းယှဉ်ချက်၊ ဖြစ်ပွားရသည့် အကြောင်းအရင်း(၄)မျိုး၊ စည်းကမ်းပျက်မော်တော်ယာဉ်/ဆိုင်ကယ်ဖမ်းဆီးမှု၊ အသိ ပညာပေးလုပ်ငန်းဆောင်ရွက်မှုအခြေအနေများကို ဆွေးနွေးတင်ပြသည်။

ယင်းနောက် ကောင်စီအဖွဲ့ဝင် ဝန်ကြီးများက ယာဉ်၊လမ်းအန္တရာယ်ကင်းရှင်းရေးဆိုင်ရာ ဆောင်ရွက်ရမည့်အစီအမံများကို ဆွေးနွေးတင်ပြပြီး စီမံခန့်ခွဲရေးဆပ်ကော်မတီ၊ ပညာပေးရေးနှင့်စစ်ဆေးအရေးယူရေးဆပ်ကော်မတီ၊ သုတေသနပြုရေးနှင့်ကျန်းမာရေးဆပ်ကော်မတီ၊ ဘဏ္ဍာရေးဆပ်ကော်မတီတို့က ယာဉ်အန္တရာယ်၊ လမ်းအန္တရာယ်ကင်းရှင်းရေးဆိုင်ရာများကို ဆွေးနွေးတင်ပြကြကာ ခရိုင်အဆင့်ယာဉ်အန္တရာယ်၊ လမ်းအန္တရာယ်ကင်းရှင်းရေးအဖွဲ့များက သက်ဆိုင်ရာခရိုင်များအလိုက် ဆွေးနွေးတင်ပြကြသည်။

ထို့နောက် အစည်းအဝေးသို့တက်ရောက်လာသူများက ယာဉ်အန္တရာယ်၊ လမ်းအန္တရာယ်ကင်းရှင်းရေး ဝိုင်းဝန်းအကြံပြုဆွေးနွေးတင်ပြကြပြီး တင်ပြဆွေးနွေးမှုများအပေါ် ပြည်နယ်ဝန်ကြီးချုပ်က ပေါင်းစပ်ညှိနှိုင်းဖြည့်ဆည်းဆောင်ရွက်ပေးကာ နိဂုံးချုပ်အမှာစကားပြောကြားခဲ့ကြောင်း သတင်းရရှိသည်။

စောမျိုးမင်းသိန်း

https://t.me/MyanmarNationalPost