ဘိုကလေး ၊ နိုဝင်ဘာ ၆
ဧရာဝတီတိုင်းဒေသကြီး၊ ဖျာပုံခရိုင်၊ ဘိုကလေးမြို့နယ်လုံးဆိုင်ရာ နှစ်ကျိပ်ရှစ်ဆူဘုရားပွဲတော်အား နှစ်စဉ်အစဉ်အလာမပြတ် ကျင်းပခဲ့ရာ ယခုနှစ် (၃၉)ကြိမ်မြောက် နှစ်ကျိပ်ရှစ်ဆူဘုရားပွဲတော်အား နိုဝင်ဘာ (၃) ရက်၊ တန်ဆောင်မုန်းလဆန်း (၁၄) ရက်နေ့ ညနေ (၆) နာရီမှ စတင်ကျင်းပခဲ့ပြီး ဘုရားပွဲတော် တတိယနေ့အဖြစ် တန်ဆောင်မုန်းလပြည့်ကျေ ာ်(၁) ရက်နေ့ညတွင် စည်ကားသိုက်မြိုက်စွာဖြင့် ဆက်လက်ကျင်းပခဲ့သည်။
ဘုရားပွဲ တတိယနေ့ ကျင်းပရာတွင် ဌာနဆိုင်ရာများ ပါဝင်သည့် နှစ်ကျိပ်ရှစ်ဆူဘုရားပွဲတော်ကျင်းပရေးဦးစီးကော်မတီ၏ ဦးဆောင်မှုနှင့်အတူ ဘုရားပွဲ ကျင်းပရေးဗဟိုအဖွဲ့နှင့် မြို့ပေါ်ရပ်ကွက်(၁၀)ခု၊ ဘုရားချောင်းကျေးရွာ၊ ကွင်းဝိုင်းကျေးရွာနှင့် ကုလားကြီးချောင်းကျေးရွာ အစရှိသည့် ရပ်ကွက်/ကျေးရွာ (၁၄)ဖွဲ့မှ တစ်ဖွဲ့လျှင်(၂)ဆူနှုန်းဖြင့် နှစ်ကျိပ်ရှစ်ဆူမြတ်ဘုရားများအား ဥပသကာ ဂေါပကများမှ ပင့်ဆောင်ကာ မြို့လယ်ကျက်သရေဆောင် အောင်တော်မူဘုရားကြီးရှေ့ စုရပ်မှ မင်္ဂလာစည်တော်နှင့်အတူ ဒုတိယလမ်း၊ အမှတ်(၁)ရပ်ကွက်၊ အမှတ်(၂)ရပ်ကွက်၊ အမှတ်(၆)ရပ်ကွက်၊ အမှတ်(၇)ရပ်ကွက်အတွင်းသို့ဒေသစာရီ ကြွချီ အပူဇော်ခံ ခဲ့ကြသည်။
ကြွချီရာလမ်းတစ်လျှောက်တွင် ဘုရားဒါယိကာ ၊ ဒါယိကာမများမှ မြတ်ဘုရားများအား ပန်း၊ရေချမ်း၊ ဆီမီး၊ သစ်သီးနှင့် လှူဖွယ်ဝတ္ထုအစုစုတို့အား လှူဒါန်းခဲ့ကြသည့်အပြင် ဥပသကာ ဂေါပကများကိုလည်း အာဟာရဒါနများ ကျွေးမွေး လှူဒါန်းခဲ့ကြသည်။
မြို့နယ်လုံးဆိုင်ရာ နှစ်ကျိပ်ရှစ်ဆူ ဘုရားပွဲတော်အား တန်ဆောင်မုန်း လဆန်း(၁၄)ရက်နေ့မှ လပြည့်ကျော်(၃)ရက်နေ့ထိ (၅)ရက်တိုင်တိုင် ကျင်းပမည်ဖြစ်ပြီး ဘိုကလေးမြို့နယ်၏ နှစ်ကျိပ်ရှစ်ဆူ ဘုရားပွဲတော်ကို ထေရဝါဒဗုဒ္ဓသာသနာတော် အဓွန့်ရှည်တည်တံ့ခိုင်မြဲထွန်းကားရေး၊ အစဉ်အလာကောင်း တစ်ရပ်ဖြစ်သည့် မြို့နယ်ဘာသာရေး၊ သာသနာရေး လုပ်ငန်းတစ်ရပ်အဖြစ် ဗုဒ္ဓဘာသာဝင် သူတော်စဉ်များ ကြည်ညိုပူဇော်သဒ္ဓါတရားပွားများ၍ ကုသိုလ်တရားများ တိုးပွားစေရေး၊ မြို့နယ်အတွင်း ကပ်ကြီး(၃)ပါးနှင့် မီဘေး၊ရေဘေး၊ လေဘေးစသည့် သဘာဝဘေး အန္တရာယ်အသွယ်သွယ်တို့မှ ကင်းဝေးစေရေးနှင့် ဘာသာရေးတွင် စိတ်ပါဝင်စားသူပြည်သူများ ညီညွတ်စွာ ပူးပေါင်းပါဝင်လာစေရေးတို့ကို ရည်ရွယ်ဆောင်ရွက်ခြင်းဖြစ်ကြောင်း ကျင်းပရေး ကော်မတီထံမှ သိရသည်။
မိုးစက်(ဘိုကလေး)
https://t.me/MyanmarNationalPost
No comments:
Post a Comment