ကျိုက်လတ်၊ နိုဝင်ဘာ ၂၄
ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ် ရွေးကောက်ပွဲကော်မရှင်အဖွဲ့ခွဲ အဖွဲ့ဝင်များနှင့် တာဝန်ရှိသူများသည် ယနေ့နံနက်ပိုင်းက ရပ်ကွက်၊ ကျေးရွာအုပ်စု ကော်မရှင် အဖွဲ့ခွဲရုံးများတွင် ဒုတိယအကြိမ်မဲစာရင်း ကပ်ထားကြေညာမှုအား လိုက်လံစစ်ဆေးခဲ့ကြသည်။
အဆိုပါ ဒုတိယအကြိမ် မဲစာရင်းကပ်ထားသည့် နေရာများသို့ မြို့နယ်ရွေးကောက်ပွဲကော်မရှင်အဖွဲ့ခွဲ ဥက္ကဋ္ဌ ဦးကျော်သူရနှင့် အဖွဲ့ဝင်များက ရပ်ကွက်/ကျေးရွာ မဲဆန္ဒရှင်များ၏ မဲစာရင်းလာရောက် ကြည့်ရှုနေမှုများကို လိုက်လံကြည့်ရှုစစ်ဆေးပြီး ထုတ်ပြန်ထားသော မဲဆန္ဒရှင်စာရင်းများတွင် မပါဝင်သူများ ပုံစံ-၃ဖြင့် မဲစာရင်းတွင် ထည့်သွင်းပေးရန်တောင်းဆိုခြင်း၊ မဲစာရင်းတွင် မပါဝင်သင့်သူများ ပါဝင်နေပါက ပုံစံ-၄ဖြင့် ကန့်ကွက်ခြင်း၊ မဲစာရင်းတွင် မိမိအချက်အလက်များ လွှဲမှားနေပါက ပြင်ဆင်ပေးရန် ပုံစံ-၄(ဂ)ဖြင့် သက်ဆိုင်ရာ ရပ်ကွက်/ကျေးရွာ ကော်မရှင်အဖွဲ့ခွဲများတွင် မဲစာရင်းထုတ်ပြန် ကြေညာသည့် နိုဝင်ဘာလ(၂၁)ရက်နေ့မှ ဒီဇင်ဘာလ (၄)ရက်နေ့ထိ (၁၄)ရက်အတွင်း ပြင်ဆင်လျှောက်ထားနိုင်ကြောင်း သိရသည်။
ကျိုက်လတ်မြို့နယ်အတွင်းရှိ ရပ်ကွက်/ကျေးရွာများတွင် မဲရုံ(၂၀၇)ရုံ လျာထားသတ်မှတ်ထားရှိပြီး၊ ဒုတိယအကြိမ် မဲစာရင်းအရ မြို့နယ်အတွင်း ဆန္ဒမဲပေးပိုင်ခွင့်ရှိသူ ဦးရေ (၁၄၂၉၃၈) ဦးရှိကြောင်း မြို့နယ်ရွေးကောက်ပွဲကော်မရှင်အဖွဲ့ခွဲရုံး တာဝန်ရှိသူထံမှ သိရသည်။
လှိုင်မင်းအောင်
#News
No comments:
Post a Comment