လူငယ်များကို ကာယ၊ ဉာဏ၊ စာရိတ္တ၊ မိတ္တ၊ ဘောဂ စသည့် ဗလငါးတန်နှင့် ပြည့်စုံသည့် လူတော်လူကောင်းများဖြစ်လာစေရန် လူငယ်ကဏ္ဍကို မြှင့်တင်ဆောင်ရွက်ပေးနေ

နေပြည်တော်၊ မေ ၇

လူငယ်ရေးရာဝန်ကြီးဌာန ပြည်ထောင်စုဝန်ကြီး ဒေါက်တာမောင်သင်းနှင့် ၂၀၂၅-၂၀၂၆ ပညာသင်နှစ် ဒွါဒသမတန်း လူရည်ချွန်စခန်းမှ လူရည်ချွန်မောင်မယ်များ တွေ့ဆုံပွဲကို ယမန်နေ့က နေပြည်တော် ဒက္ခိဏသီရိမြို့နယ်ရှိ Royal President Hotel ၌ ကျင်းပရာ လူငယ်ရေးရာဝန်ကြီးဌာန ဒုတိယဝန်ကြီး ဦးစစ်နိုင်၊ ညွှန်ကြားရေးမှူးချုပ်နှင့် တာဝန်ရှိသူများ၊ ပညာရေးဝန်ကြီးဌာနမှ တာဝန်ရှိ သူများ၊ ၂၀၂၅-၂၀၂၆ ပညာသင်နှစ် ဒွါဒသမတန်း နေပြည်တော် လူရည်ချွန်စခန်းမှ လူရည်ချွန် မောင်မယ်များနှင့် ကြီးကြပ်သူ ဆရာ ဆရာမများ တက်ရောက်ကြသည်။

ဦးစွာ ပြည်ထောင်စုဝန်ကြီး ဒေါက်တာမောင်သင်းက မြန်မာနိုင်ငံ၌ရှိသည့် အသက် (၁၅)နှစ်မှ (၃၅)နှစ်အထိ လူဦးရေသန်းပေါင်း ၁၆ သန်းကျော်သည် လူငယ်များဖြစ်ကြောင်း၊ နိုင်ငံတော်အစိုးရအနေဖြင့် နိုင်ငံ၏ ဖွံ့ဖြိုးတိုးတက်ရေးလုပ်ငန်းစဉ်များတွင် လူငယ်များအနေဖြင့် အဓိကစွမ်းအားစုအဖြစ် ပါဝင်နိုင်ရန် လူငယ်များကို ကာယ၊ ဉာဏ၊ စာရိတ္တ၊ မိတ္တ၊ ဘောဂ စသည့် ဗလငါးတန်နှင့် ပြည့်စုံသည့် လူတော်လူကောင်းများဖြစ်လာစေရန် လူငယ်ကဏ္ဍကို မြှင့်တင်ဆောင်ရွက်ပေးနေခြင်းဖြစ်ကြောင်း၊ ယခုအခမ်းအနားသို့ တက်ရောက်လာကြသူများသည် တိုင်းပြည်၏ ခွန်အားများဖြစ်ပြီး နိုင်ငံတော်တည်ဆောက်ရေးအတွက် အရေးကြီးသည့် လူ့စွမ်းအားအရင်းအမြစ်များဖြစ်၍ နိုင်ငံ၏အနာဂတ် ဖွံ့ဖြိုးတိုးတက်စေရန်၊ နိုင်ငံတကာနှင့် ရင်ပေါင် တန်းနိုင်စေရန် ပခုံးပြောင်းတာဝန်ထမ်းဆောင်ကြမည့် လူငယ်များ၏ စွမ်းဆောင်ရည်ပေါ်တွင် များစွာ မူတည်နေကြောင်း။

ယနေ့အခမ်းအနားသို့ တက်ရောက်လာကြသည့် လူရည်ချွန်မောင်မယ်များအနေဖြင့် မိမိတို့သက်ဆိုင် ရာစခန်းအသီးသီးသို့ ပြန်လည်ရောက်ရှိသည့်အခါ ဒေသန္တရဗဟုသုတများကို လေ့လာမှတ်သား၍ လူငယ်များအချင်းချင်း လေ့လာမှတ်သားခဲ့သည့် ဗဟုသုတများကို ဖလှယ်ကြပြီး စည်းလုံးညီညွတ်စွာ ဖြင့် နေထိုင်သွားကြရန်လိုကြောင်း၊ မိမိနေရပ်သို့ ပြန်ရောက်သည့်အခါ နိုင်ငံတော်အတွက် အကျိုးပြု လုပ်ငန်းများတွင် အုတ်တစ်ချပ် သဲတစ်ပွင့်ပမာ မိမိတို့တတ်စွမ်းသမျှ ပါဝင်ဆောင်ရွက်ပြီး နိုင်ငံ၏ အားထားရာ၊ နိုင်ငံ၏မျှော်လင့်ချက်၊ မြန်မာ့လူ့အဖွဲ့ အစည်း တိုးတက်စေရန်နှင့် နောင်မျိုးဆက်များက မှတ်တမ်းတင်နိုင်ပြီး နိုင်ငံအတွက်တန်ဖိုးရှိသည့် အနာဂတ်ခေါင်းဆောင်လူရည်ချွန်များ၊ လူတော် လူကောင်းများဖြစ်အောင် ဆက်လက်ကြိုးစားသွား ကြရန် တိုက်တွန်းမှာကြားသည်။

၂၀၂၅-၂၀၂၆ ပညာသင်နှစ်၌ Grade-9 ပြင်ဦးလွင်လူရည်ချွန်စခန်းတွင် လူရည်ချွန်မောင်မယ် ၉၆ ဦးနှင့် ကြီးကြပ်သူ ၁၈ ဦး၊ Grade-10 အင်းလေးလူရည်ချွန်စခန်းတွင် လူရည်ချွန်မောင်မယ် ၁၃၂ ဦးနှင့် ကြီးကြပ်သူ ၁၈ ဦး၊ Grade-11 ငွေဆောင်လူရည်ချွန်စခန်းတွင် လူရည်ချွန်မောင်မယ် ၁၃၃ ဦးနှင့် ကြီးကြပ်သူ ၁၈ ဦး၊ ဒွါဒသမတန်း နေပြည်တော်လူရည်ချွန်စခန်းတွင် လူရည်ချွန်မောင်မယ် ၉၉ ဦးနှင့် ကြီးကြပ်သူ ၁၈ ဦး၊ ချောင်းသာ လူရည်ချွန်စခန်းတွင် ပထမနှစ် လူရည်ချွန်မောင်မယ် ၁၄၈ ဦးနှင့် ကြီးကြပ် သူ ၁၈ ဦး၊ ဒုတိယနှစ် လူရည်ချွန်မောင်မယ် ၁၄၃ ဦးနှင့် ကြီးကြပ်သူ ၁၈ ဦးတို့ကို ဒေသန္တရဗဟုသုတများ လေ့လာမှတ်သားနိုင်စေရန်နှင့် နိုင်ငံ့တာဝန်များကို ပခုံးပြောင်းတာဝန်ထမ်းဆောင်ကြမည့် အနာဂတ်ခေါင်းဆောင် လူတော်လူကောင်းများ ဖြစ်လာစေရန်အတွက် နိုင်ငံတော်အစိုးရအနေဖြင့် လူရည်ချွန်စခန်း ငါးခုတွင် လေ့လာရေးအစီအစဉ်များကို စီစဉ်ဆောင်ရွက်ပေးထားကြောင်း သိရသည်။

#MNP #News