ရုရှားဆီက ရေနံဝယ်တဲ့ နိုင်ငံတွေကို အခွန် ၁၀၀% ကောက်ဖို့ အမေရိကန်ကွန်ဂရက်က အတည်ပြု

ဇူလိုင် - ၁၆ ( ကြာသပတေးနေ့ ) 

ရုရှားဆီကနေ စွမ်းအင်ဝယ်ယူနေတဲ့သူတွေကို ပစ်မှတ်ထားပြီး အမေရိကန်က အခွန်တိုးကောက်ဖို့ လုပ်နေတာနဲ့ ပတ်သက်လို့ တရုတ်နိုင်ငံဘက်က သူတို့ရဲ့ ကုမ္ပဏီတွေကို အကာအကွယ်ပေးသွားမယ်လို့ ကတိပြုလိုက်ပါတယ်။ ဒါ့အပြင် အမေရိကန်ရဲ့ စီးပွားရေးအရ ဖိအားပေးတာတွေနဲ့ တစ်ဖက်သတ် ပိတ်ဆို့အရေးယူတာတွေဟာ နောက်ဆုံးမှာ သူတို့ကိုယ်တိုင်ပဲ ပြန်ထိခိုက်လိမ့်မယ်လို့လည်း သတိပေးလိုက်ပါသေးတယ်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ လင်ကျန့်က အမေရိကန်အထက်လွှတ်တော်မှာ တင်သွင်းထားတဲ့ ဥပဒေကြမ်းတစ်ခုအပေါ် အခုလို မနေ့က တုံ့ပြန်ပြောဆိုခဲ့တာပါ။ အဲဒီဥပဒေကြမ်းဟာ ရုရှားဆီကနေ ရေနံနဲ့ သဘာဝဓာတ်ငွေ့ အများဆုံးဝယ်နေတဲ့ (တရုတ်အပါအဝင်) နိုင်ငံတွေအပေါ် အခွန် ၁၀၀ ရာခိုင်နှုန်းအထိ တိုးကောက်ဖို့ ခွင့်ပြုထားတာ ဖြစ်ပါတယ်။

လင်ကျန့်က "တရုတ်နိုင်ငံအနေနဲ့ အပြည်ပြည်ဆိုင်ရာ ဥပဒေမှာလည်း အခြေခံမရှိ၊ ကုလသမဂ္ဂ လုံခြုံရေးကောင်စီရဲ့ ခွင့်ပြုချက်လည်းမပါတဲ့ တစ်ဖက်သတ် ပိတ်ဆို့အရေးယူမှုတွေကို ပြတ်ပြတ်သားသား ဆန့်ကျင်ပါတယ်။ တရုတ်စီးပွားရေးလုပ်ငန်းတွေနဲ့ နိုင်ငံသားတွေရဲ့ တရားဝင် ရပိုင်ခွင့်တွေ၊ အကျိုးစီးပွားတွေကို ကာကွယ်ဖို့အတွက် လိုအပ်တဲ့ အရေးယူဆောင်ရွက်မှုတွေကို ပြတ်ပြတ်သားသား လုပ်ဆောင်သွားမှာပါ" လို့ ပြောခဲ့ပါတယ်။

ဒါ့အပြင် "စံနှုန်းနှစ်မျိုးကျင့်သုံးတာ၊ အတင်းအကျပ် ဖိအားပေးတာတွေ လုပ်တာဟာ နောက်ဆုံးမှာတော့ သူတို့ကိုယ်သူတို့ ပြန်ပြီး အကျိုးယုတ်စေတာပဲ အဖတ်တင်လိမ့်မယ်" လို့လည်း သူက ဆက်ပြောခဲ့ပါတယ်။

ဒီပြင်ဆင်ထားတဲ့ ပိတ်ဆို့အရေးယူမှုဆိုင်ရာ ဥပဒေကြမ်းကို အင်္ဂါနေ့က အမေရိကန် အထက်လွှတ်တော်မှာ တင်သွင်းခဲ့တာဖြစ်ပြီး၊ ဒါဟာ ပြီးခဲ့တဲ့ စနေနေ့တုန်းက နှလုံးရောဂါအခံကြောင့် ကွယ်လွန်သွားခဲ့တဲ့ ရုရှားအပေါ် ပြတ်ပြတ်သားသား ဆန့်ကျင်လေ့ရှိသူ ဆီးနိတ်အမတ်ဟောင်း လင်ဆေးဂရေဟမ်  မူလက အဆိုပြုခဲ့တဲ့ ဥပဒေကြမ်းကို ထပ်ပြီး အဆင့်မြှင့်တင် ပြင်ဆင်ထားတာ ဖြစ်ပါတယ်။

တကယ်လို့ ဒီဥပဒေကြမ်းသာ အတည်ဖြစ်သွားမယ်ဆိုရင် ရုရှားဆီကနေ ရေနံနဲ့ သဘာဝဓာတ်ငွေ့ အများဆုံးဝယ်ယူနေတဲ့ နိုင်ငံကြီး ၅ နိုင်ငံကနေ သွင်းကုန်တွေအပေါ် အခွန် ၁၀၀ ရာခိုင်နှုန်းအထိ ကောက်ခံဖို့ အမေရိကန်သမ္မတ ဒေါ်နယ်ထရမ့်ကို လုပ်ပိုင်ခွင့်ပေးလိုက်သလို ဖြစ်သွားမှာပါ။ ဒီထဲမှာ တရုတ်နဲ့ အိန္ဒိယနိုင်ငံတို့ကတော့ ထိခိုက်မှုအရှိဆုံး ဖြစ်သွားနိုင်ပါတယ်။

ဒီလိုအဆိုပြုချက် ထွက်လာတာဟာ ဝါရှင်တန်နဲ့ ပေကျင်းတို့ကြား လနဲ့ချီ ကြာမြင့်ခဲ့တဲ့ အခွန်တိုးကောက်မှု တင်းမာမှုတွေကို လျှော့ချဖို့အတွက် ကုန်သွယ်ရေး မူဘောင်သဘောတူညီချက်တစ်ခု လက်မှတ်ရေးထိုးပြီး နှစ်လတောင် မပြည့်သေးခင်မှာပဲ ဖြစ်ပါတယ်။ အရင်တုန်းက ကုန်သွယ်ရေးစစ်ပွဲအတွင်းမှာ အမေရိကန်က တရုတ်သွင်းကုန်တွေအပေါ် အခွန် ၁၄၅ ရာခိုင်နှုန်းအထိ တိုးကောက်ခဲ့သလို၊ တရုတ်ဘက်ကလည်း အမေရိကန်ကုန်ပစ္စည်းတွေအပေါ် အခွန် ၁၂၅ ရာခိုင်နှုန်းအထိ တုံ့ပြန်ကောက်ခံခဲ့ဖူးပါတယ်။

REF: RT

#MNP #News