အမေရိကန်က အီရန်စစ်ပွဲမှာ သန်း ၃၀ ကျော်တန်တဲ့ ဒရုန်း ၅၀ နီးပါးလောက်ဆုံးရှုံး

ဩဂုတ် - ၁၄ ( သောကြာနေ့ ) 

အမေရိကန်စစ်တပ်ဟာ အီရန်နဲ့ ဖြစ်ပွားခဲ့တဲ့ စစ်ပွဲအတွင်း MQ-9 Reaper ဒရုန်း ၄၅ စင်းအထိ ဆုံးရှုံးခဲ့တယ် လို့ ဝါရှင်တန်ပို့စ် သတင်းစာက ဖော်ပြပါတယ်။ ဒါဟာ အမေရိကန်စစ်တပ်မှာ ရှိတဲ့ ကင်းထောက်ဒရုန်းတွေရဲ့ စုစုပေါင်းအရေအတွက်ရဲ့ လေးပုံတစ်ပုံလောက် ရှိပါတယ်။

ဒီဒရုန်းတွေ ဆုံးရှုံးသွားတာကြောင့် အမေရိကန်အခွန်ထမ်းပြည်သူတွေအတွက် ခန့်မှန်းခြေ ဒေါ်လာ ၁.၃ ဘီလီယံ လောက် ကုန်ကျခဲ့တယ် လို့ ဆိုပါတယ်။ ဒီဆုံးရှုံးမှုအရေအတွက်ကို သတင်းစာ က ကြာသပတေးနေ့မှာ ဖော်ပြခဲ့တာဖြစ်ပြီး အမည်မဖော်ပြထားတဲ့ အမေရိကန်အစိုးရအရာရှိ ၃ ဦး ကို ကိုးကားထားတာပါ။ နောက်ထပ် အမေရိကန်အရာရှိတစ်ဦးကတော့ ဆုံးရှုံးသွားတဲ့ ဒရုန်းအားလုံးဟာ ပစ်ချခံရတာတော့ မဟုတ်ဘူး လို့ သတင်းစာ ကို ပြောပါတယ်။ တချို့ဒရုန်းတွေကတော့ မြေပြင်မှာ ထိန်းချုပ်နေတဲ့ အော်ပရေတာ တွေနဲ့ ဆက်သွယ်မှု ပြတ်တောက်သွားပြီးနောက် ပျက်ကျသွားတာ ဖြစ်တယ်လို့ ဆိုပါတယ်။

MQ-1 Predator ဒရုန်းရဲ့ နောက်ဆက်ခံမော်ဒယ်ဖြစ်တဲ့ MQ-9 Reaper ဟာ အလယ်အလတ်အမြင့်မှာ အချိန်ကြာကြာ ပျံသန်းနိုင်တဲ့ (MALE) ဒရုန်း အမျိုးအစား ဖြစ်ပါတယ်။ ကင်းထောက်စောင့်ကြည့်ရေး မစ်ရှင်တွေ လုပ်နိုင်သလို Hellfire ဒုံးကျည်တွေ တပ်ဆင်ပြီး သတ်မှတ်ထားတဲ့ ပစ်မှတ်တွေကို တိုက်ခိုက်နိုင်ပါတယ်။ တစ်ကြိမ်ပျံသန်းရင် အများဆုံး နာရီ ၃၀ လောက်အထိ ပျံသန်းနိုင်ပါတယ်။

MQ-9 Reaper တစ်စင်းရဲ့ တန်ဖိုးက ဒေါ်လာ သန်း ၃၀ ကနေ သန်း ၅၀ ကြား လောက်ရှိပါတယ်။ ဖေဖော်ဝါရီ ၂၈ ရက်နေ့မှာ အမေရိကန်နဲ့ အစ္စရေးတို့က အီရန်ကို စစ်ဆင်ရေး စတင်ခဲ့တဲ့အချိန်မတိုင်ခင် အမေရိကန်စစ်တပ်မှာ MQ-9 Reaper စုစုပေါင်း ၁၈၅ စင်းလောက် ရှိခဲ့တယ်လို့ ဆိုပါတယ်။ အဲဒီထဲမှာ လေတပ်က ၁၆၅ စင်း နဲ့ မရိန်းတပ်ဖွဲ့က ၂၀ စင်း ကို အသီးသီး အသုံးပြုနေခဲ့တာပါ။

စစ်ပွဲစပြီး နာရီပိုင်းအတွင်းမှာပဲ MQ-9 Reaper တွေ ပစ်ချခံရတယ်ဆိုတဲ့ သတင်းတွေ အီရန်ဘက်က တယ်လီဂရမ် ချန်နယ်တွေမှာ စတင်ပျံ့နှံ့လာပါတယ်။ သိပ်မကြာခင်မှာပဲ ဗီဒီယိုမှတ်တမ်းတွေလည်း ထွက်ပေါ်လာပြီး အီရန်စစ်တပ်ကတော့ MQ-9 Reaper အများအပြားကို လေထဲပျံသန်းနေစဉ် ပစ်ချနိုင်ခဲ့တယ် လို့ ပြောဆိုခဲ့ပါတယ်။ ဒါ့အပြင် ပင်လယ်ကွေ့ဒေသတစ်ဝန်းမှာရှိတဲ့ အမေရိကန်စစ်စခန်းတွေက ဂိုဒေါင်တွေအတွင်း ရပ်ထားတဲ့ MQ-9 တချို့ကိုပါ ဖျက်ဆီးနိုင်ခဲ့တယ် လို့ အီရန်စစ်တပ်က ဆိုပါတယ်။

MQ-9 Reaperတွေ ကို အမေရိကန်လေတပ်က ၂၀၀၇ ခုနှစ်မှာ စတင်အသုံးပြုခဲ့တာ ဖြစ်ပါတယ်။ အီရတ်နဲ့ အာဖဂန်နစ္စတန် စစ်ပွဲတွေမှာ အကျယ်အဝန်းအသုံးပြုခဲ့သလို၊ အမေရိကန်က တရားဝင် စစ်ကြေညာခြင်းမရှိဘဲ စစ်ဆင်ရေးတွေ လုပ်ခဲ့တဲ့ ပါကစ္စတန်၊ ဆိုမာလီယာ၊ ယီမင်နဲ့ တခြားဒေသတွေမှာလည်း ကျယ်ကျယ်ပြန့်ပြန့် အသုံးပြုခဲ့ပါတယ်။ MQ-9 Reaper ဟာ သမ္မတဟောင်း ဘားရက် အိုဘားမားလက်ထက်က ဒရုန်းအသုံးပြုပြီး ပစ်မှတ်တွေကို လုပ်ကြံတိုက်ခိုက်တဲ့ အစီအစဉ် နဲ့ပါ တွဲဖက်ပြီး လူသိများလာခဲ့ပါတယ်။ အဲဒီကာလတစ်လျှောက် မှာတော့ ဒီဒရုန်းကို လေကြောင်းရန်ကာကွယ်ရေးစနစ်တွေက ထိထိရောက်ရောက် မတားဆီးနိုင်တဲ့ ဒရုန်း လို့ သဘောထားခဲ့ကြပါတယ်။

ဒါပေမယ့် ၂၀၁၇ ခုနှစ်မှာ အခြေအနေပြောင်းသွားခဲ့ပါတယ်။ ယီမင်နိုင်ငံမှာရှိတဲ့ ဟူသီတပ်ဖွဲ့တွေက ဆိုဗီယက်ခေတ် က ထုတ်လုပ်ထားတဲ့ လေယာဉ်ပစ်ဒုံးကျည်တစ်မျိုးနဲ့ MQ-9 Reaper တစ်စင်းကို ပစ်ချနိုင်ခဲ့ပါတယ်။ အဲဒီနောက်ပိုင်းမှာလည်း Reaper တွေ တစ်စင်းပြီးတစ်စင်း ဆုံးရှုံးလာခဲ့ပါတယ်။ နောက်ဆုံး အမေရိကန်နဲ့ အစ္စရေးတို့က ဖေဖော်ဝါရီလမှာ အီရန်ကို စတင်တိုက်ခိုက်တဲ့အချိန်ရောက်တဲ့အခါမှာတော့ MQ-9 Reaper ဟာ ခေတ်နောက်ကျနေပြီး လေကြောင်းရန်ကာကွယ်ရေးစွမ်းရည်ရှိတဲ့ စစ်တပ်မျိုးနဲ့ ရင်ဆိုင်ရင် ထိရောက်မှုမရှိတော့တဲ့ လက်နက်စနစ်တစ်ခု အဖြစ် သတ်မှတ်ခံနေရပြီလို့ ဆိုပါတယ်။

REF: RT

#News #Myanmar