ရုရှားနိုင်ငံသားတွေကို ပြန်ပေးဆွဲ သတ်ဖြတ်ခဲ့တဲ့ သူတွေကို ထိုင်းရဲတွေ ဖမ်းဆီးနိုင်ခဲ့

ဩဂုတ် - ၂ ( တနင်္ဂနွေနေ့ ) 

ထိုင်းရဲတပ်ဖွဲ့က ရုရှားနိုင်ငံသား ၂ ဦးနဲ့ ထိုင်းမိသားစုဝင် ၃ ဦးကို ပြန်ပေးဆွဲပြီး သတ်ဖြတ်ခဲ့တဲ့ အမှုကြီးနဲ့ ပတ်သက်ပြီး သံသယရှိသူ ၄ ဦးကို ဖမ်းဆီးလိုက်ပါတယ်။

အသက် ၂၂ နှစ်အရွယ် ဒိုင်ယာနာ နာဇီမိုဗာ နဲ့ သူ့ရဲ့ အသက် ၁၇ နှစ်အရွယ် မောင်ဖြစ်သူ ရိုမန် တို့ဟာ ဒီတစ်ပတ်အစောပိုင်းမှာ ပတ္တယား အပန်းဖြေမြို့အနီးကနေ ပျောက်ဆုံးသွားခဲ့တာ ဖြစ်ပါတယ်။ မောင်နှမ နှစ်ယောက်ဟာ လွန်ခဲ့တဲ့ နှစ်အနည်းငယ်ကတည်းက မိခင်နဲ့အတူ ထိုင်းနိုင်ငံကို ပြောင်းရွှေ့နေထိုင်ခဲ့ကြပြီး ပတ္တယားမြို့ရဲ့ အရှေ့တောင်ဘက်မှာရှိတဲ့ ဟွိုင်ရိုင် ဒေသမှာ နေထိုင်ခဲ့ကြပါတယ်။

ရဲတပ်ဖွဲ့ရဲ့ ပြောကြားချက်အရ၊ ဇူလိုင် ၂၆ ရက် မိုးမလင်းခင်မှာ သူတို့နှစ်ယောက်ဟာ ငှားထားတဲ့ ဟွန်ဒါ ဆိုင်ကယ်နဲ့ အိမ်ကနေ ထွက်သွားခဲ့ပါတယ်။ အဲဒီနောက် မကြာခင်မှာပဲ ဒိုင်ယာနာ က "တစ်ယောက်ယောက်က သူတို့နောက်ကို လိုက်နေသလိုပဲ" ဆိုတဲ့ စာတိုတစ်စောင်ကို မိခင်ဆီ ပို့ခဲ့ပြီး၊ အဲဒီနောက်ပိုင်းမှာတော့ မောင်နှမနှစ်ယောက်နဲ့ အဆက်အသွယ် လုံးဝပြတ်တောက်သွားခဲ့ပါတယ်။

ဒေသခံသတင်းမီဒီယာတွေရဲ့ ဖော်ပြချက်အရ၊ CCTV မှတ်တမ်းမှာတော့ မောင်နှမနှစ်ယောက်ဟာ အိမ်နဲ့ မဝေးတဲ့နေရာမှာ အခြားဆိုင်ကယ်စီးလာတဲ့ အမျိုးသားတစ်ယောက်နဲ့ စကားပြောနေတာကို တွေ့ရပြီး၊ အဲဒီနောက်မှာတော့ ပျောက်ဆုံးသွားခဲ့ပါတယ်။ ဒီဖြစ်စဉ်ကြောင့် ရဲတပ်ဖွဲ့က ရှာဖွေရေးလုပ်ငန်းတွေ စတင်လုပ်ဆောင်ခဲ့ပြီး၊ သုံးရက်အကြာမှာတော့ သူတို့စီးသွားတဲ့ ဆိုင်ကယ်ကို စွန့်ပစ်ထားတဲ့ သင်္ချိုင်းအနီး သစ်တောထဲမှာ အပိုင်းပိုင်းဖြုတ်ထားပြီး မြေမြှုပ်ထားတဲ့အခြေအနေနဲ့ တွေ့ရှိခဲ့ပါတယ်။

ရဲတပ်ဖွဲ့ကတော့ အသက် ၄၃ နှစ်အရွယ် သာနာပေါင်ကိုသောင်  နဲ့ အသက် ၃၉ နှစ်အရွယ် သောင်ချိုင်စရီနေး  တို့ကို ဒီအမှုရဲ့ အဓိကသံသယရှိသူတွေအဖြစ် သတ်မှတ်ထားပါတယ်။ သူတို့နှစ်ယောက်ကို ငါးရက်ကြာ လိုက်လံရှာဖွေမှု ပြုလုပ်ပြီးနောက် ဇူလိုင် ၃၁ ရက်နေ့မှာ ထိုင်း-ကမ္ဘောဒီးယား နယ်စပ်အနီးမှာ ဖမ်းဆီးနိုင်ခဲ့ပါတယ်။

စစ်ဆေးမေးမြန်းမှုအတွင်းမှာတော့ သံသယရှိသူနှစ်ယောက်က မောင်နှမနှစ်ယောက်ကို သတ်ဖြတ်ခဲ့ကြောင်း ဝန်ခံထွက်ဆိုခဲ့ပါတယ်။ အဲဒီနောက် သူတို့က ရဲတပ်ဖွဲ့ကို ဟွိုင်ရိုင် ဒေသက သစ်တောတစ်ခုအတွင်းရှိ တိမ်တိမ်လေးတူးထားတဲ့ မြေမြှုပ်ရာနေရာဆီ ခေါ်ဆောင်သွားခဲ့ပါတယ်။ အဲဒီနေရာမှာ ရဲတပ်ဖွဲ့က ဒိုင်ယာနာ နဲ့ ရိုမန်  ဖြစ်တယ်လို့ ယူဆရတဲ့ အလောင်းနှစ်လောင်းကို ပြန်လည်တူးဖော်တွေ့ရှိခဲ့ပါတယ်။ လက်ရှိမှာတော့ မှုခင်းဆိုင်ရာ ဆေးဘက်ကျွမ်းကျင်စစ်ဆေးမှုကို ဆက်လက်လုပ်ဆောင်နေဆဲ ဖြစ်ပါတယ်။

REF: RT

#MNP #News