တရုတ်-ရုရှား စွမ်းအင်ပူးပေါင်းဆောင်ရွက်မှုက ကမ္ဘာ့ဈေးကွက်တည်ငြိမ်မှုအတွက် အထောက်အကူပြုကြောင်း တရုတ်နိုင်ငံ ဒုတိယဝန်ကြီးချုပ် ပြောကြား

ဗလာဒီဗော့စတော့၊ စက်တင်ဘာ ၅ 

ပြောင်းလဲနေသော နိုင်ငံတကာအခင်းအကျင်းနှင့် မကြာခဏဖြစ်ပွားနေသော ပထဝီနိုင်ငံရေးပဋိပက္ခများကြားတွင် တရုတ်နိုင်ငံနှင့် ရုရှားနိုင်ငံတို့သည် ရေနံနှင့် သဘာဝဓာတ်ငွေ့ပူးပေါင်းဆောင်ရွက်မှုကို စဉ်ဆက်မပြတ်တိုးချဲ့ခြင်းဖြင့် ကမ္ဘာ့စွမ်းအင်ဈေးကွက်တည်ငြိမ်မှုကို မြှင့်တင်ရေးအတွက် အရေးကြီးသောအခန်းကဏ္ဍမှ ပါဝင်လာခဲ့ကြောင်း တရုတ်နိုင်ငံ ဒုတိယဝန်ကြီးချုပ် တင်းရွှဲရှန်က စက်တင်ဘာ ၄ ရက်၌ ပြောကြားခဲ့သည်။

ရုရှားနိုင်ငံ ဗလာဒီဗော့စတော့မြို့တွင် ကျင်းပသော ၈ ကြိမ်မြောက် တရုတ်-ရုရှား စွမ်းအင်စီးပွားရေးဖိုရမ် ဖွင့်ပွဲအခမ်းအနားတွင် တင်းက အထက်ပါအတိုင်း မိန့်ခွန်းပြောကြားခဲ့ခြင်းဖြစ်သည်။

တရုတ်ကွန်မြူနစ်ပါတီ ဗဟိုကော်မတီ နိုင်ငံရေးဗျူရို အမြဲတမ်းကော်မတီဝင်လည်းဖြစ်သူ တင်းက နှစ်နိုင်ငံစွမ်းအင်ပူးပေါင်းဆောင်ရွက်မှု၏ အဆင့်မြင့်ဖွံ့ဖြိုးတိုးတက်မှုကို ချီးကျူးဂုဏ်ပြုခဲ့သည်။

တရုတ်-ရုရှား ဘက်စုံစွမ်းအင်မိတ်ဖက်ဆက်ဆံရေး ဖွံ့ဖြိုးတိုးတက်မှုတွင် နိုင်ငံ့ခေါင်းဆောင်များ၏ လမ်းညွှန်မှုက အကြီးမားဆုံးအားသာချက်ဖြစ်ကြောင်း ၎င်းက ပြောကြားခဲ့သည်။ လမ်းညွှန်ချက်ကို ဆက်လက်လိုက်နာရန်၊ နိုင်ငံရေးအပြန်အလှန်ယုံကြည်မှုကို နက်ရှိုင်းစေရန်၊ မဟာဗျူဟာမြောက်ဆက်သွယ်ရေးကို အားကောင်းစေရန်နှင့် လက်တွေ့ပူးပေါင်းဆောင်ရွက်မှုကို အဆက်မပြတ်တိုးချဲ့ရန် နှစ်ဖက်စလုံးကို ၎င်းက တိုက်တွန်းခဲ့သည်။

အပြန်အလှန်အကျိုးရှိမှုနှင့် အပြန်အလှန်အကျိုးဖြစ်ထွန်းသော ရလဒ်များသည် နှစ်နိုင်ငံအကြား စွမ်းအင်ပူးပေါင်းဆောင်ရွက်မှုအတွက် အခြေခံတွန်းအားဖြစ်ကြောင်း မှတ်ချက်ပြုပြောကြားလျက် တင်းက နှစ်ဖက်စလုံးသည် ၎င်းတို့၏ သက်ဆိုင်ရာအကျိုးစီးပွားများနှင့် ကိုက်ညီသော ပူးပေါင်းဆောင်ရွက်မှုပုံစံကို ဖော်ဆောင်ထားကြပြီး စွမ်းအင်အရင်းအမြစ်များနှင့် နည်းပညာဆန်းသစ်တီထွင်မှုတို့တွင် ပူးပေါင်းဆောင်ရွက်မှုက စီးပွားရေးဖွံ့ဖြိုးတိုးတက်မှုကို ထိရောက်စွာ မြှင့်တင်ပေး၍ နှစ်နိုင်ငံစလုံးရှိ ပြည်သူများ၏ဘဝများကို တိုးတက်ကောင်းမွန်လာစေခဲ့သည်ဟု ပြောကြားခဲ့သည်။

တရုတ်နိုင်ငံနှင့် ရုရှားနိုင်ငံအကြား စွမ်းအင်ပူးပေါင်းဆောင်ရွက်မှု၏ ထင်ရှားသောအင်္ဂါရပ်မှာ စိန်ခေါ်မှုများကို အတူတကွရင်ဆိုင်ဖြေရှင်းခြင်းဖြစ်ပြီး နှစ်နိုင်ငံစလုံးအနေဖြင့် ပူးပေါင်းဆောင်ရွက်မှုဆိုင်ရာ ယန္တရားနှင့် ပလက်ဖောင်းအမျိုးမျိုးကို အပြည့်အဝအသုံးချခြင်း၊ အန္တရာယ်များနှင့် စိန်ခေါ်မှုများကို သင့်လျော်စွာကိုင်တွယ်ဖြေရှင်းခြင်း၊ စွမ်းအင်စက်မှုလုပ်ငန်းနှင့် ထောက်ပံ့ရေးကွင်းဆက်များ၏ တည်ငြိမ်မှုနှင့် ချောမွေ့သောစီးဆင်းမှုကို သေချာစေခြင်းတို့ ဆက်လက်လုပ်ဆောင်သင့်သည်ဟုလည်း ၎င်းက ဖြည့်စွက်ပြောကြားခဲ့သည်။

တရုတ်နိုင်ငံနှင့် ရုရှားနိုင်ငံတို့အနေဖြင့် စစ်မှန်သော နိုင်ငံစုံပူးပေါင်းဆောင်ရွက်ရေးဝါဒကို ပူးတွဲကျင့်သုံး၍ တရားမျှတသော၊ သမာသမတ်ကျသော၊ ဟန်ချက်ညီသော၊ အားလုံးပါဝင်မှုရှိသောနှင့် ပွင့်လင်းသော စွမ်းအင်စီမံခန့်ခွဲမှုစနစ် တည်ဆောက်ခြင်းကို မြှင့်တင်သင့်သည်ဟုလည်း ၎င်းက ဆိုသည်။

အဆိုပါဖိုရမ်သို့ တရုတ်နိုင်ငံနှင့် ရုရှားနိုင်ငံတို့မှ အစိုးရအရာရှိများနှင့် ရေနံနှင့် သဘာဝဓာတ်ငွေ့ကုမ္ပဏီကိုယ်စားလှယ်များ အပါအဝင် လူဦးရေ ၄၀၀ ခန့် တက်ရောက်ခဲ့ကြကြောင်း သိရသည်။ 

Ref - (Xinhua)

#Myanmar #News