ဂျာမနီမှာ ဆန္ဒပြသောင်းကျန်းသူ အများစုက ရွှေ့ပြောင်းတွေလို့ ဆို

နိုဝင်ဘာ - ၂ ( တနင်္လာနေ့ ) 

စနေနေ့ညက ဂျန်ဇက် (Gen Z) ဆန္ဒပြပွဲတွေအပြီး ဖရန့်ဖတ်မြို့မှာ ဆူပူအကြမ်းဖက်ခဲ့ကြတဲ့သူတွေဟာ အများစုက ပြည်ပကနေ ပြောင်းရွှေ့လာကြတဲ့ နောက်ခံရှိသူတွေ ဖြစ်တယ်လို့ ဟက်ဆယ်ပြည်နယ်ရဲ့ ပြည်ထဲရေးဝန်ကြီး ရိုမန် ပိုဆက် က ပြောပါတယ်။

အစောပိုင်းက ငြိမ်းချမ်းစွာ ဆန္ဒပြဖို့ လုပ်ထားပေမဲ့ အဲဒီလို ဆူပူအကြမ်းဖက်မှုတွေကြောင့် ဂျာမနီရဲ့ စီးပွားရေးမြို့တော်ထဲမှာ ဆိုင်တွေဖျက်ဆီးခံခဲ့ရပြီး ရဲတွေကိုလည်း ပုလင်းတွေ၊ ကျောက်ခဲတွေ၊ မီးလောင်ဗုံးတွေနဲ့ ပစ်ခတ်တိုက်ခိုက်ခံခဲ့ရပါတယ်။ အဲဒီနောက်မှာ လူ ၅၄ ယောက်ကို ဖမ်းဆီးခဲ့တယ်လို့ တာဝန်ရှိသူတွေက တနင်္ဂနွေနေ့မှာ ထုတ်ပြန်ပါတယ်။ ရဲအရာရှိ အယောက် ၁၀၀ ကျော် ဒဏ်ရာရခဲ့ပြီး စီးပွားရေးလုပ်ငန်း ၁၇ ခု ထိခိုက်ပျက်စီးခဲ့ကာ ၅ ခုကတော့ ဖောက်ထွင်းလုယက်ခံခဲ့ရပါတယ်။

တနင်္ဂနွေနေ့က ပြုလုပ်တဲ့ သတင်းစာရှင်းလင်းပွဲမှာ ဝန်ကြီး ပိုဆက်က အကြမ်းဖက်မှုတွေ ဒီလောက်ထိ ကြီးထွားလာတာကို တွေ့ရလို့ သူကိုယ်တိုင်တောင် "အံ့သြထိတ်လန့်မိတယ်" လို့ ပြောပါတယ်။ ရဲတပ်ဖွဲ့အနေနဲ့ ဆူပူသူ လူအုပ်ကြီး ၁,၀၀၀ ကနေ ၁,၅၀၀ ကြားလောက်ကို ရင်ဆိုင်ခဲ့ရတယ်လို့ ဆိုပါတယ်။ ဖမ်းဆီးခံရသူတွေရဲ့ အသက် ၁၃ နှစ်ကနေ ၂၉ နှစ်ကြားမှာ ရှိကြပြီး အများစုကတော့ ဂျာမန်နိုင်ငံသားတွေ ဖြစ်ကြပါတယ်။

"ဖရန့်ဖတ်မြို့မှာ လက်ဝဲစွန်းရောက်တွေနဲ့ အကြမ်းဖက်ဖို့ အသင့်ဖြစ်နေတဲ့ လူငယ်တွေ ပါဝင်တဲ့ ကြီးမားတဲ့ အကြမ်းဖက်လှိုင်းကြီးတစ်ခု ဖြစ်ပွားခဲ့တာပါ။ အဲဒီထဲက အများစုက ပြည်ပကနေ ပြောင်းရွှေ့လာတဲ့ နောက်ခံရှိသူတွေ ဖြစ်ကြပါတယ်" လို့ ဝန်ကြီးက ပြောပါတယ်။

"ဒီကျူးလွန်သူအုပ်စုဟာ ပြည်ပပြောင်းရွှေ့လာသူ နောက်ခံရှိသူတွေနဲ့ အဓိက ဖွဲ့စည်းထားတာ ဖြစ်ပါတယ်။ ဒါကိုလည်း ကျနော်တို့ ဖြေရှင်းရပါမယ်။ ဘယ်လို ဖုံးကွယ်တားမြစ်ချက်မျိုးမှ မရှိသင့်ပါဘူး" လို့ သူက ဆက်ပြောပါတယ်။

ဖက်ဒရယ်ပြည်ထဲရေးဝန်ကြီး အလက်ဇန်းဒါး ဒိုဘရင်ဒ် ကလည်း ပထမပိုင်းမှာ ငြိမ်းချမ်းစွာ ဆန္ဒပြနေတာတွေကို "အကြမ်းဖက်ဘယ်ဘက်စွန်းရောက်အုပ်စုတွေနဲ့ ရွှေ့ပြောင်းအခြေချအသိုင်းအဝိုင်းက ဆူပူသူတွေ" က ဝင်ရောက်လွှမ်းမိုးပြီး ဖျက်ဆီးခဲ့ကြတယ်လို့ Bild သတင်းစာကို ကိုးကားပြီး ပြောဆိုထားပါတယ်။

REF: RT

#News #Myanmar