MNP - မတ် ၁၇
မန္တလေးတိုင်းဒေသကြီး၊ ပြင်ဦးလွင်မြို့ရှိ မဟာအံ့ထူးကံသာ ဆုတောင်းပြည့်ဘုရားကြီး၏ ဗုဒ္ဓပူဇနိယပွဲတော် (၂၁) ကြိမ်မြောက် အသံမစဲမဟာပဌာန်းရွတ်ဖတ်ပူဇော်ပွဲအောင်ပွဲနှင့်(၁၉)ကြိမ်မြောက် သံဃာ့ဒါနဆွမ်းတော်ကြီးလောင်းလှူပွဲကို ယနေ့ နံနက် ( ၇ )နာရီက မဟာအံ့ထူးကံသာ ဆုတောင်းပြည့်ဘုရားကြီး၌ ကျင်းပပြုလုပ်သည် ။
ရှေးဦးစွာ ဆရာတော်အရှင်သူမြတ်တို့မှ မဟာအံ့ထူးကံသာ ဆုတောင်းပြည့်ဘုရားကြီးအား အနေကဇာတင်ပြီး အခမ်းအနားကို နမောတဿသုံးကြိမ်ရွတ်ဆို ဘုရားကန်တော့၍ ဖွင့်လှစ်ကာ ရတနာမာန်အောင်ကျောင်းတိုက်ဆရာတော် ဘဒ္ဒန္တ ကဝိန္ဒ ထံမှ ကိုးပါးသီလ ခံယူဆောက်တည်ကြခြင်း၊ ဆရာတော်အရှင်သူမြတ်များထံမှ မေတ္တာသုတ်အစရှိသော ပရိတ်တရားတော်များ နာယူ ကြည်ညိုခြင်း၊ ရတနာမာန်အောင်ကျောင်းတိုက်ဆရာတော်ထံမှ ရေစက်ချအနုမောဒနာတရား နာယူကြည်ညိုကြပြီး ဆရာတော်သံဃာတော်အရှင်မြတ်တို့အား သင်္ကန်းစသော လှူဖွယ်ဝတ္ထုပစ္စည်းများ ဆက်ကပ်လှူဒါန်းခဲ့ကြ၍ အခမ်းအနားကို ဗုဒ္ဓသာသနံ စိရံတိဌတု ( ၃ ) ကြိမ်ရွတ်ဆို၍ ရုပ်သိမ်းခဲ့သည်။
ဆက်လက်ပြီး (၁၉) ကြိမ်မြောက် သံဃာ့ဒါနဆွမ်းတော်ကြီးလောင်းလှူပွဲကို ကျင်းပပြုလုပ်ရာ စေတနာရှင်အလှူရှင်များမှ ရဟန်း ၊ သံဃာ ၊ သီလရှင် ( ၄၁ ) ပါးတို့အား ဆွမ်းသပိတ်နှင့် လှူဖွယ်ပစ္စည်း ဒါဒဗ္ဗဝတ္ထုအစုစုတို့အား လောင်းလှူပူဇော်ခဲ့ကြကြောင်း သိရသည်။
မြန်မာနေရှင်နယ်ပို့စ်
No comments:
Post a Comment