ပါကစ္စတန်နိုင်ငံ အနောက်ပိုင်းတွင် ပေါက်ကွဲမှုကြောင့် လူ ၃ ဦးသေဆုံး၊ ၂၄ ဦး ဒဏ်ရာရ

အစ္စလာမ်မာဘတ်၊ မတ် ၃ 

ပါကစ္စတန်နိုင်ငံ အနောက်တောင်ပိုင်း Quetta မြို့တွင် မတ် ၂ ရက်က ပေါက်ကွဲမှုဖြစ်ပွါးပြီး အနည်းဆုံး လူ ၃ ဦးသေဆုံးပြီး အခြားသူ ၂၄ ဦး ဒဏ်ရာရရှိခဲ့ကြောင်း တာဝန်ရှိသူတစ်ဦးက ပြောကြားခဲ့သည်။

ပါကစ္စတန်နိုင်ငံ အနောက်တောင်ပိုင်း Balochistan ပြည်နယ်၊ ကျန်းမာရေးဦးစီးဌာန၊ မီဒီယာညှိနှိုင်းရေးမှူး Waseem Baig က ရဲအရာရှိတစ်ဦး အပါအဝင် လူ ၃ ဦးသေဆုံးခဲ့ကြောင်း ထုတ်ပြန်ချက်၌ ပြောကြားထားသည်။

ပေါက်ကွဲမှုမှာ ယင်းမြို့၊ Fatima Jinnah လမ်းမရှိ လူစည်ကားသောဈေးတစ်ခု၌ ရဲကားတစ်စီးအနီး ဖြစ်ပွားခဲ့ခြင်း ဖြစ်ကြောင်း ဒေသခံရဲတပ်ဖွဲ့က မီဒီယာသို့ ပြောကြားခဲ့သည်။

ရဲတပ်ဖွဲ့၊ လုံခြုံရေးတပ်ဖွဲ့များနှင့် ကယ်ဆယ်ရေးအဖွဲ့များက အခင်းဖြစ်ပွားနေရာသို့ ချက်ချင်းရောက်ရှိသွားခဲ့ပြီး သေဆုံးသူများနှင့် ဒဏ်ရာရသူများအား ဆေးရုံသို့ ပို့ဆောင်ခဲ့ကြောင်း သိရသည်။

ဒဏ်ရာရသူများအနက် ၅ ဦးမှာ ပြင်းထန်သဖြင့် သေဆုံးသူအရေအတွက်မှာ ထပ်မံတိုးလာနိုင်ဖွယ်ရှိကြောင်း ရဲတပ်ဖွဲ့က ဖြည့်စွက်ပြောကြားခဲ့သည်။

ပေါက်ကွဲမှုကြောင့် ဒုရဲမှူးတစ်ဦး သေဆုံးခဲ့ပြီး အခြား ရဲဝန်ထမ်းနှစ်ဦးမှာလည်း ဒဏ်ရာပြင်းထန်စွာ ရရှိထားကြောင်း ဒေသတွင်းသတင်းများအရ သိရသည်။

ရဲတပ်ဖွဲ့ ဗုံးဖယ်ရှားရေးအဖွဲ့ကလည်း ပေါက်ကွဲမှုဖြစ်ပွားရသည့် အကြောင်းရင်းကို သိရှိရန် စုံစမ်းစစ်ဆေးလျက် ရှိကြောင်း သိရသည်။

ပေါက်ကွဲမှုဖြစ်ပွားပြီးနောက် ဈေးဆိုင်တစ်ဆိုင် မီးလောင်သွားခဲ့ရာ ယင်းဆိုင်အနီး ရပ်နားထားသော မော်တော်ယာဉ်များလည်း ပျက်စီးသွားခဲ့ကြောင်း ဒေသတွင်း သတင်းများက ဆိုသည်။

အဆိုပါ နေရာအား ရဲတပ်ဖွဲ့နှင့် လုံခြုံရေးတပ်ဖွဲ့များက ပိတ်ထားခဲ့ပြီး ရှာဖွေရေးလုပ်ငန်း ဆောင်ရွက်ခဲ့ကြောင်း သိရသည်။

ယင်းပေါက်ကွဲမှုနှင့် ပတ်သတ်၍ မည်သည့်အဖွဲ့ သို့မဟုတ် မည်သူ၏ လက်ချက်ဖြစ်ကြောင်း မသိရသေးပေ။ 

Ref : (ဆင်ဟွာ)

https://t.me/MyanmarNationalPost