MNP - ဧပြီ ၂၉
မလှိုင်မြို့နယ်တွင် အခြေခံမဲဆန္ဒရှင်စာရင်းများ ပြည့်စုံမှန်ကန်စေရေး မြေပြင်လူဦးရေ စာရင်းကောက်ယူခြင်းနှင့် တိုက်ဆိုင်စစ်ဆေးခြင်းလုပ်ငန်းများကို သတ်မှတ်ကာလထက် ဆောလျင်စွာ ရာနှုန်းပြည့် ပြီးစီးအောင်မြင်အောင် ကြိုးစားဆောင်ရွက်ခဲ့သော ရပ်ကွက်/ကျေးရွာ အုပ်စုအုပ်ချုပ်ရေးမှူးများနှင့် စာရေးဝန်ထမ်းတို့အား ဂုဏ်ပြုမှတ်တမ်းလွှာ ပေးအပ်ပွဲအခမ်းအနားကို ယနေ့နံနက်(၉)နာရီအချိန်က မြို့နယ်အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမတွင် ကျင်းပခဲ့ကြောင်း သိရသည်။
မလှိုင်မြို့နယ်တွင် ရပ်ကွက်(၄)ရပ်ကွက်၊ ကျေးရွာအုပ်စု(၅၂)အုပ်စု၊ ကျေးရွာပေါင်း(၂၄၇)ရွာ ဖြင့်ဖွဲ့စည်းထား ရှိပြီး မြေပြင်လူဦးရေစာရင်းကောက်ယူခြင်းလုပ်ငန်းများကို ၂၀၂၂ ခုနှစ်၊ မတ်လတွင် စာရင်းကောက်ယူပြီးစီးခဲ့ပြီးနောက် ဧပြီလ ပထမအပတ်တွင် စတင်၍ မြို့နယ်ရွေးကောက်ပွဲကော်မရှင် အဖွဲ့ခွဲမှ အိမ်ထောင်စုပုံစံ(၆၆/၆)ကို အခြေခံ၍ ပြုစုထားသော အခြေခံမဲဆန္ဒရှင်စာရင်းနှင့် တိုက်ဆိုင် စစ်ဆေးခြင်းလုပ်ငန်း ရာနှုန်းပြည့် ပြီးစီးခဲ့ပါသည်။ သတ်မှတ်ကာလထက် ဆောလျင်စွာ ရာနှုန်းပြည့် ပြီးစီးခဲ့သည့်အတွက် ရပ်ကွက်/ကျေးရွာအုပ်စုအုပ်ချုပ်ရေးမှူး (၅၆)ဦးနှင့် စာရေးဝန်ထမ်း (၅၆)ဦးတို့အား ဂုဏ်ပြုမှတ်တမ်းလွှာများကို မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ၊ မြို့နယ် အုပ်ချုပ်ရေးမှူး ဦးစိုးမင်းထက်၊ အဖွဲ့ဝင် ဗိုလ်မှူးဌေးသန်း၊ အတွင်းရေးမှူး ရဲမှူးထိန်လင်းမောင်၊ ဒုတိယမြို့နယ် အုပ်ချုပ်ရေးမှူး ဦးနေသွေးတို့မှ တစ်ဦးချင်းပေးအပ်ခဲ့ပါသည်။ ထို့နောက် စာရေးဝန်ထမ်းတို့အား တစ်ဦးလျှင် ဆန်(၄)ပြည်၊ ကြက်ဥ(၁၀)လုံး၊ အားဆေးမျိုစုံ(၁)ထုတ် ထောက်ပံ့ပေးခဲ့ကြောင်း သိရှိရသည်။
သတင်း - အောင်ဌေး
မြန်မာနေရှင်နယ်ပို့စ်
No comments:
Post a Comment