MNP - ဇွန် ၁၀
ကချင်ပြည်နယ် မိုးညှင်းခရိုင် ဖားကန့်မြို့နယ် စုပေါင်းရုံးဝင်းအတွင်းနှင့် ဥရုချောင်း၊ မှော်ဝမ်းချောင်းဆုံအနီး နေရာများတွင် ယနေ့နံနက် ၈နာရီခွဲက မိုးရာသီစုပေါင်းသစ်ပင်များ စိုက်ပျိုးခဲ့ကြောင်း သိရသည်။
အဆိုပါ မိုးရာသီစုပေါင်းသစ်ပင်စိုက်ပျိုးခြင်းကို မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးငြိမ်းမောင်မောင်နှင့် အဖွဲ့ဝင်များ၊ မြို့နယ်စည်ပင်သာယာရေးအဖွဲ့မှ ဝန်ထမ်းများ၊ မိခင်နှင့်ကလေးစောင့်ရှောက်ရေးအသင်းဝင်များ၊ အမျိုးသမီးရေးရာအဖွဲ့ဝင်များ၊ မြို့နယ် ပြန်/ဆက်ဦးစီးဌာနဝန်ထမ်းများ၊ သာသနာရေးဦးစီးဌာနဝန်ထမ်းများ၊ ရပ်ကွက်နေပြည်သူများနှင့် မြို့နယ်အဆင့် ဌာနဆိုင်ရာများ ပူးပေါင်းစိုက်ပျိုးခဲ့ကြပြီး ပျိုးပင်စုစုပေါင်း ၄၀၀ ကျော်အား စိုက်ပျိုးနိုင်ခဲ့ကြောင်း မြို့နယ်သစ်တောဦးစီးဌာနမှ သိရသည်။
ထိုသို့ စုပေါင်းစိုက်ပျိုးခဲ့သည့် ပျိုးပင်များမှာ ကျွန်း ၁၅၀ပင်၊ ပျဉ်းကတိုး ၁၅၀ပင်၊ မန်ဂျန်ရှား ၁၄၀ပင်၊ ချင်းဒညှင်း ၁၀ပင်နှင့် မအူ ၁၀ပင် ပျိုးပင် စုစုပေါင်း ၄၆၀ ပင်တို့ စိုက်ပျိုးခဲ့ကြောင်း သိရသည်။
သတင်း - မိုးသန္တာဦး
မြန်မာနေရှင်နယ်ပို့စ်
No comments:
Post a Comment