MNP - ဇွန် ၅
ရှမ်းပြည်နယ်(တောင်ပိုင်း)၊ လွိုင်လင်ခရိုင်၊ မိုင်းရှူးမြို့နယ်တွင် လက်ထောက်မူလတန်းပြ ဆရာ/ဆရာမများလုပ်ငန်းခွင်အကြိုရက်တိုသင်တန်းကို၊ ယမန်နေ့နံနက်(၉)နာရီက အခြေခံပညာအထက်တန်းကျောင်းဆောင်တွင် ပြုလုပ်ခဲ့ကြောင်းသိရသည်။
ယခုဖွင့်လှစ်သည့်သင်တန်းတွင် တက်ရောက်ကြသည့် လက်ထောက်မူလတန်းပြ ဆရာ/ ဆရာမများမှာ ၂၀၂၂-၂၀၂၃ ပညာသင်နှစ်၊ ဇွန်လမှ စတင်ဖွင့်လှစ်မည့် အခြေခံပညာကျောင်းများရှိ လစ်လပ်နေရာများတွင် ဖြည့်ဆည်းခန့်ထားသွားမည်ဖြစ်ကြောင်း သိရပြီး၊ သင်တန်းတွင် မြို့နယ်ပညာရေးမှူးနှင့် အထက်တန်း၊ အလယ်တန်း၊ မူလတန်းကျောင်းအုပ်ဆရာ/ ဆရာမကြီးများက သင်တန်းနည်းပြများအဖြစ် ပို့ချသွားမည်ဖြစ်ပြီး ဘာသာရပ်များအနေဖြင့် ပညာရေးမူဝါဒများ၊ သင်ရိုးသစ် အကောင်ထည်ဖော်ဆောင်ရွက်ချက်၊ (၂၁)ရာစု ကျွမ်းကျင်မှုနှင့် သင်ကြားသင်ယူမှုဆိုင်ရာများ၊ နိုင်ငံဝန်ထမ်းဥပဒေနှင့် နည်းဥပဒေ၊ ဆရာကျင့်ဝတ်နှင့် ကိုယ်ကျင့်သိက္ခာအစရှိသည့် ဘာသာရပ်များကို သင်ကြားပို့ချသွားမည်ဖြစ်ကြောင်း သိရသည်။
အဆိုပါသင်တန်းသို့ သင်တန်းသူ/သား(၁၇)ဦးတက်ရောက်ကြပြီး၊ သင်တန်းကာလမှာ (၄.၆.၂၀၂၂) ရက်နေ့မှ (၁၀.၆.၂၀၂၂)ရက်နေ့ အထိ (၇)ရက်အတွင်း နေ့စဉ်နံနက်(၉) နာရီမှ ညနေ(၄)နာရီ အထိဖြစ်ကြောင်း သိရသည်။
သတင်း - သန်းလူ
မြန်မာနေရှင်နယ်ပို့စ်
No comments:
Post a Comment