MNP - ဩဂုတ် ၃၀
ပဲခူးတိုင်းဒေသကြီး၊ သာယာဝတီခရိုင်၊ မိုးညိုမြို့နယ်အတွင်းရှိ ပြည်သူများအား ကိုဗစ်-၁၉ ထပ်ဆောင်းကာကွယ်ဆေး စတုတ္ထအကြိမ်(2nd Booster Dose) ထပ်မံထိုးနှံပေးခြင်းနှင့် တတိယအကြိမ်(Booster Dose)ထိုးနှံခြင်းကို ယနေ့နံနက် ၉ နာရီက ရွှေဥဒေါင်းရပ်ကွက်၊ ဗိုလ်ချုပ်အောင်ဆန်းလမ်းမကြီးရှိ မြို့နယ်ကျန်းမာရေးဦးစီးဌာန၌ ဆက်လက်ထိုးနှံပေးလျက်ရှိကြောင်း သိရသည်။
ထိုသို့ထိုးနှံပေးရာတွင် ကိုဗစ်-၁၉ ကာကွယ်ဆေး ပထမအကြိမ်၊ ဒုတိယအကြိမ်နှင့်တတိယအကြိမ် စုစုပေါင်း(၃)ကြိမ်ထိုးနှံထားပြီး(၆)လအထက်ရှိသူများအား ကိုဗစ်-၁၉ ထပ်ဆောင်းကာကွယ်ဆေး စတုတ္ထအကြိမ်(2nd Booster Dose)ကို ဆက်လက်ထိုးနှံပေးလျက်ရှိသည်။ ထို့အတူ ကိုဗစ်-၁၉ ကာကွယ်ဆေး ပထမအကြိမ်နှင့် ဒုတိယအကြိမ်(၂)ကြိမ်ထိုးနှံထားပြီး(၆)လအထက်ရှိသူများအား တတိယအကြိမ်(Booster Dose)ထိုးနှံပေးခြင်း၊ ကာကွယ်ဆေးပထမအကြိမ်ထိုးနှံပြီးသူများအား ဒုတိယအကြိမ်ထိုးနှံပေးခြင်းနှင့် အသက်(၁၈)နှစ်ပြည့်ပြီး အကြောင်းအမျိုးမျိုးကြောင့် တစ်ကြိမ်တစ်ခါမှကာကွယ်ဆေးမထိုးနှံရသေးသူများကိုလည်း (ပထမအကြိမ်)ထိုးနှံပေးလျက်ရှိသည်။
အဆိုပါကိုဗစ်-၁၉ ကာကွယ်ဆေးထိုးနှံခြင်း လုပ်ငန်းများကို မြို့နယ်ဆရာဝန်ကြီးဒေါက်တာကျော်မိုးကြီးကြပ်၍ ကျန်းမာရေးဝန်ထမ်းများနှင့်အတူ မြို့နယ်ကြက်ခြေနီတပ်ဖွဲ့မှူးဦးမြင့်ဌေးနှင့်တပ်ဖွဲ့ဝင်များက ကိုဗစ်-၁၉ ကာကွယ်ရေးစည်းကမ်းချက်များနှင့်အညီ ကူညီဆောင်ရွက်ပေးလျက်ရှိကြောင်းသိရသည်။
သတင်း - ကိုမင်း
မြန်မာနေရှင်နယ်ပို့စ်
No comments:
Post a Comment