MNP - စက်တင်ဘာ ၂၈
ပဲခူးတိုင်းဒေသကြီး(အနောက်ပိုင်း)စိုက်ပျိုးရေးဦးစီးဌာန ဒုတိယတိုင်းဒေသကြီးဦးစီးမှူးဦးစန်းလွင်၊ ပေါက်ခေါင်းမြို့နယ်ဦးစီးမှူးဦးမင်းမင်းထွန်းနှင့် ဝန်ထမ်းအဖွဲ့ဝင်များသည် ယမန်နေ့က ပေါက်ခေါင်းမြို့နယ်ရှိ နေကြာမျိုးစေ့ထုတ်စိုက်ခင်းနှင့် ပတီစိမ်းမျိုးစေ့ထုတ်စိုက်ခင်း အောင်မြင်ဖြစ်ထွန်းနေမှုအခြေအနေများကို ကွင်းဆင်းကြည့်ရှုစစ်ဆေးခဲ့ကြောင်း သိရသည်။
ထိုသို့ကြည့်ရှုစစ်ဆေးရာတွင် အင်ငါးခွကျေးရွာ တောင်သူဦးတင်ဌေး၏ ယာမြေ၌ နေကြာမျိုးစေ့ထုတ်(၅)ဧကစိုက်ခင်းနှင့် ပဲတီစိမ်းရေဆင်း(၁၄)မျိုးစေ့ထုတ်(၅)ဧက စိုက်ပျိုးအောင်မြင်ဖြစ်ထွန်းမှုများကို ကွင်းဆင်းကြည့်ရှုခဲ့သည်။ ဆက်လက်၍ ဒုတိယတိုင်းဒေသကြီးဦးစီးမှူးသည် ပေါက်ခေါင်းမြို့နယ်စိုက်ပျိုးရေးဦးစီးဌာနရုံးအစည်းအဝေးခန်းမတွင် ဝန်ထမ်းများနှင့်တွေ့ဆုံ၍ မြို့နယ်အတွင်း မိုးစပါး၊ နေကြာ၊ ပဲမျိုးစုံနှင့်သုံးသီးစားစိုက်ပျိုးမည့် အစီအစဉ်များကို ဆွေးနွေးပြောကြားပြီး လိုအပ်သည်များကို လမ်းညွှန်မှာကြားခဲ့ကြောင်းသိရသည်။ ပေါက်ခေါင်းမြို့နယ်တွင် ယခုနှစ်မိုးရာသီ၌ နေကြာအပါအဝင်အခြားဆီထွက်သီးနှံစုံ(၅၃၄၅၂)ဧကစိုက်ပျိုးထားရှိကြောင်း မြို့နယ်စိုက်ပျိုးရေးဦးစီးဌာနမှ သိရသည်။
သတင်း - သန်းထွန်းအောင်
မြန်မာနေရှင်နယ်ပို့စ်
No comments:
Post a Comment