MNP - ဇန်နဝါရီ ၃၁
ပဲခူးတိုင်းဒေသကြီး၊ ပြည်ခရိုင်၊ ပန်းတောင်းမြို့နယ် ဒေါင်းမြတ်နား ကျေးရွာရှိ ဒေသခံတောင်သူအများစုသည် စိုက်ပျိုးရေးလုပ်ငန်းကို အဓိကထား လုပ်ကိုင်ကြပြီး ယခုနှစ် ဆောင်းရာသီ၌ ဒေသတွင်း စားသုံးဆီဖူလုံရန်နှင့် ပိုလျှံစွာ ဆီစားသုံးနိုင်ရေးအတွက် မြို့နယ်စိုက်ပျိုးရေးဦးစီးဌာနမှ ဆောင်းနေကြာ မျိုးကောင်းမျိုးသန့်များ၊ စိုက်ပျိုးရေးနည်းပညာ ပံ့ပိုးကူညီမှုများဖြင့် မျိုးစေ့ထုတ်နေကြာ စိုက်ခင်းများ စီးပွားဖြစ်စိုက်ပျိုးကြရာ အောင်မြင်ဖြစ်ထွန်းလျက်ရှိကြောင်း နေကြာစိုက်တောင်သူ ဦးလှရွှေထံမှ သိရသည်။
ယခုလို နေကြာစိုက်ခင်းများ အောင်မြင်စေရန် မြို့နယ်စိုက်ပျိုးရေးဦးစီးဌာနမှ တာဝန်ရှိသူများ၏ စနစ်တကျ စိုက်ပျိုးရေးနည်းပညာများ ကူညီပံ့ပိုးပေးပြီး သွင်းအားစုအနေဖြင့် ထယ်ရေးပြင်ချိန်မှစကာ တစ်ဧကလျှင် နွားချေးနှင့် မြေဆွေးကို နွားလှည်း ၅ စီးစာ၊ ယူးရီးယား တစ်ရာပေါင်၊ တီစူပါ ၅၀ ပေါင်နှင့် ပိုတက်ရှ် ၅၀ ပေါင် ထပ်မံထည့်သွင်းစိုက်ပျိုးပြီး စိုက်ပျိုးရာတွင်လည်း ဒေသနှင့်ကိုက်ညီမည့် ဖြစ်ထွန်းသည့် အပင်ပေါက်နှုန်း ၈၀ ရာခိုင်နှုန်းရှိသော နေကြာမျိုးစေ့ကို မြေအစိုဓာတ် လုံလောက်ချိန်တွင် အနက်တစ်လက်မခွဲမှ နှစ်လက်မအတွင်း စိုက်ပျိုးပြီး သတ်မှတ်အပင်အရေအတွက်ညီစေရန် တန်းကြား ၂ ပေ၊ အပင်ကြား ၉ လက်မဖြင့် တစ်တွင်းလျှင် မျိုးစေ့နှစ်စေ့နှုန်းဖြင့် စနစ်တကျ စိုက်ပျိုးခဲ့သဖြင့် ယခုကဲ့သို့ အပင်များမြင့်ထွားကာ အောင်မြင်ဖြစ်ထွန်းလျက်ရှိသဖြင့် မိမိတို့ဒေသအတွက် နေကြာဆီများ ပိုလျှံစွာ စားသုံးနိုင်မည်ဖြစ်ကြောင်း တောင်သူဦးလှရွှေ၏ ပြောပြချက်အရ သိရသည်။
သင်းသင်းအေး
https://t.me/MyanmarNationalPost
No comments:
Post a Comment