MNP - ဇန်နဝါရီ ၂၄
ပြန်ကြားရေးဝန်ကြီးဌာန ပြန်ကြားရေးနှင့်ပြည်သူ့ဆက်ဆံရေးဦးစီးဌာန၏ (၃၂)နှစ်မြောက် နှစ်ပတ်လည်နေ့ အထိမ်းအမှတ်အဖြစ် ဆွမ်းဆက်ကပ်လှူဒါန်းခြင်းကို ယနေ့နံနက်ပိုင်းအချိန်က ရန်ကုန်မြို့ ဗဟန်းမြို့နယ် အာဇာနည်လမ်းရှိ ပြန်ကြားရေးဝန်ကြီးဌာနဓမ္မာရုံတွင် ကိုဗစ်-၁၉ရောဂါ ကြိုတင်ကာကွယ်ရေးလမ်းညွှန်ချက်များနှင့်အညီ ကျင်းပပြုလုပ်သည်။
ရှေးဦးစွာ တက်ရောက်လာကြသူများက ဘုရားအမှူးပြုသော ပင့်သံဃာတော် အရှင်သူမြတ် များအား သြကာသ ကန်တော့ကျိုးဖြင့် ရှိခိုးပူဇော်ကန်တော့ခဲ့ကြပြီး ပင့်သံဃာတော် အရှင်သူမြတ် များက အန္တရာယ်ကင်း ပရိတ်တရားတော်များအား ရွတ်ဖတ်ပူဇော်ခဲ့ကြသည်။
ဆက်လက်၍ တက်ရောက်လာကြသူများသည် ပင့်သံဃာတော်များ ဟောကြားတော်မူသည့် တရားတော်များကို နာယူခဲ့ကြပြီး နဝကမ္မဝတ္ထုတွေများကို ဆက်ကပ်လှူဒါန်းခဲ့ကြသည်။
ထို့နောက် တက်ရောက် လာကြသူများက ပင့်သံဃာတော် အရှင်သူမြတ်များအား နေ့ဆွမ်းဆက်ကပ်လှူဒါန်းခဲ့ကြပြီး လှူဒါန်းမှုအစုစုတို့အတွက် ရေစက်သွန်းချ အမျှပေးဝေခဲ့ကြသည်။
အခမ်းအနားသို့ ပြန်ကြားရေးဝန်ကြီးဌာနမှ တာဝန်ရှိသူများ၊ ပြန်ကြားရေးနှင့်ပြည်သူ့ဆက်ဆံ ရေးဦးစီးဌာနမှ အရာထမ်း/အမှုထမ်းများ၊ မြန်မာနိုင်ငံရုပ်ရှင်အစည်းအရုံး၊ မြန်မာနိုင်ငံ ဂီတအစည်း အရုံးနှင့် မြန်မာနိုင်ငံ သဘင်အစည်းအရုံးတို့မှ တာဝန်ရှိသူ အသီးသီးတို့ တက်ရောက်ခဲ့ကြကြောင်း သတင်းရရှိပါသည်။
နိုင်လင်းအောင်
https://t.me/MyanmarNationalPost
No comments:
Post a Comment