MNP ၊ မတ် ၁၃
၂၀၂၃ ခုနှစ်၊ တက္ကသိုလ်ဝင်စာမေးပွဲစတုတ္ထနေ့အဖြစ် ဓာတုဗေဒဘာသာရပ်ကို ယနေ့မတ်လ (၁၃)ရက်နေ့တွင် ကယားပြည်နယ်အတွင်းရှိ လွိုင်ကော်၊ ဘောလခဲ၊ ဖားဆောင်း၊ မယ်စဲ့ မြို့နယ်အသီးသီးရှိ စာစစ်ဌာနများတွင် ဖြေဆိုလျက်ရှိသည်။
ကယားပြည်နယ်အတွင်းတွင် စာစစ်ဌာန ၄ ခုရှိပြီး ယနေ့ ဓာတုဗေဒဘာသာရပ်ဖြေဆိုသည့် ကျောင်းသား၊ ကျောင်းသူစာရင်းရှိ (၅၈၂)ဦးဖြစ်ပြီး ဖြေဆိုသူ(၅၄၅)ဦးနှင့် ပျက်ကွက်(၃၇)ဦးရှိကာ ဖြေဆိုသည့်ရာခိုင်နှုန်းမှာ(၉၃.၆၄) ရာခိုင်နှုန်းရှိကြောင်း ပြည်နယ်ပညာရေးမှူးရုံးမှ သိရှိရသည်။
ပြည်နယ်အတွင်းတွင် ကျောင်းသား၊ ကျောင်းသူများ အေးချမ်းစွာဖြင့် စာမေးပွဲဖြေဆိုနိုင်ရေးအတွက် ကယားပြည်နယ်အစိုးရအဖွဲ့၏ ကြီးကြပ်မှုဖြင့် ဌာနဆိုင်ရာများ၊ လုံခြုံရေးတပ်ဖွဲ့ဝင်များ၊ မီးသတ်တပ်ဖွဲ့ဝင်များ၊ ကြက်ခြေနီတပ်ဖွဲ့ဝင်များ၊ ရပ်ကွက်/ကျေးရွာအုပ်ချုပ်ရေးမှူးများ၊ ကျောင်းအကျိုးတော်ဆောင်များ၊ ရပ်မိရပ်ဖများက ဝိုင်းဝန်းဆောင်ရွက်ပေးလျက်ရှိပြီး ယနေ့တွင် ဓာတုဗေဒဘာသာရပ်ကိုဖြေဆိုကြပြီး (၁၄)ရက်နေ့တွင် ရူပဗေဒ၊ (၁၅)ရက်နေ့တွင် ဇီဝဗေဒနှင့်ဘောဂဗေဒ၊ (၁၆)ရက်နေ့တွင် ပထဝီဘာသာရပ်နှင့် (၁၇)ရက်နေ့တွင် သမိုင်းဘာသာရပ်များကို အသီးသီးဆက်လက် ဖြေဆိုသွားမည်ဖြစ်ကြောင်း သိရှိရသည်။
https://t.me/MyanmarNationalPost
No comments:
Post a Comment