MNP ၊ ဧပြီ ၅
ရခိုင်ပြည်နယ် စစ်တွေခရိုင် ပေါက်တောမြို့ စည်ပင်သာယာနယ်နိမိတ်အတွင်းရှိ ယာဉ်ကြောကျပ် တည်းမှုများကို ဖြေရှင်နိုင်ရန် ယာဉ်အသုံးပြုသွားလာနေသူများ၊ လမ်းသွားလမ်းလာပြည်သူများ၊ စိတ်ချမ်းမြေ့စွာ သွားလာနိုင်စေရန် နှင့် လူပုဂ္ဂလိကမော်တော်ယာဉ်များ စနစ်တကျပြေးဆွဲနိုင်ရေးအတွက် မြို့နယ်တစ်လမ်း မောင်းစနစ်ထိန်းသိမ်းရေးကြီးကြပ်မှုကော်မတီ နှင့် ဌာနဆိုင်ရာများ ပူးပေါင်းပြီး ယနေ့ နံနက်ပိုင်းက ပေါက်တောမြို့ရှိ မြို့နယ်စည်ပင်သာယာရေးဈေးကြီးအဝင်လမ်း၊ ဗိုလ်ချင်းပျံလမ်း၊ ရွှေပန်းထိမ်လမ်း၊ ဗိုလ်ချင်းပျံလမ်းသွယ်၊ အဏ္ဏဝါသီရိလမ်း၊ ပြန်/ဆက်ရုံးကြားလမ်း နှင့် စောပြည့်ညိုလမ်းတို့ကို တစ်လမ်းမောင်း စနစ်အဖြစ် အသိပညာပေးလုပ်ငန်းများ ဆောင်ရွက်ကြသည်။
ထို့ပြင် ပြည်သူများကို အသိပညာပေးလုပ်ငန်းများအား သတ်မှတ်ကာလတစ်ခုအထိ ဆောင်ရွက်သွား မည်ဖြစ်ကြောင်း၊ ပညာပေးလုပ်ငန်းများ ဆောင်ရွက်ပြီးစီးပါက လိုက်နာမှုမရှိသူများအား ဒဏ်ကြေးငွေပေးဆောင် စေမည့်လုပ်ငန်းများဆောင်ရွက်သွားမည်ဖြစ်ကြောင်း၊အဆိုပါလမ်းများတွင် စည်းကမ်းမဲ့ယာဉ်များ မောင်နှင်းခြင်း ကြောင့် မလိုလားအပ်သည့် ပြဿနာများ မဖြစ်ပေါက်စေရေးအတွက် ထိန်းသိမ်းကြပ်မတ် ဆောင်ရွက်သွားမည်ဖြစ် ကြောင်း မြို့နယ်တစ်လမ်းမောင်း စနစ်ထိန်းသိမ်းရေးကြီးကြပ်မှုကော်မတီမှ သိရှိရသည်။
အဆိုပါ တစ်လမ်းမောင်းစနစ်အဖြစ် အသိပညာပေး လုပ်ငန်းများဆောင်ရွက်မှုကို အပတ်စဉ် တနင်္လာ၊ ဗုဒ္ဓဟူး၊ သောကြာနေ့ နံနက်ပိုင်းများတွင် ဆောင်ရွက်လျက်ရှိကြောင်း သိရသည်။
https://t.me/MyanmarNationalPost
No comments:
Post a Comment