အတာသင်္ကြန်ပွဲတော် တရုတ် - မြန်မာ အတူနွှဲပျော်

MNP ၊ ဧပြီ ၁၀

ယူနန်ပြည်နယ် စစ်ဆောင်ပနား၊ တယ်ဟုန်၊ လင်ချန်း၊ ဖူအယ် စသည့် ပြည်နယ်ခွဲ (မြို့) များသည် တစ်နှစ်တစ်ကြိမ်ကျင်းပသော အတာသင်္ကြန်ပွဲတော် လှုပ်ရှားမှုများကို ကျင်းပရန် ရက်များဆက်တိုက် ပြင်ဆင်နေကြပြီး များပြားစုံလင်လှသော ဂုဏ်ပြုအခမ်းအနားများနှင့် လက်တွေ့ခံစားမှုအစီအစဉ်များ ကျင်းပရန် စီစဉ်ထားကာ လူသောင်းချီပါဝင်ဆင်နွှဲကြသော ပျော်ပွဲရွှင်ပွဲကြီးကို ထပ်မံစတင်တော့မည် ဖြစ်ကြောင်း မြန်မာနိုင်ငံဆိုင်ရာ တရုတ်သံရုံးက ထုတ်ပြန်ထားသည်။

စစ်ဆောင်ပနား ကျင်ဟုံမြို့သည် ဧပြီလ ၁၃ ရက်နေ့ မွန်းလွဲပိုင်းမှ ညပိုင်းအထိ တိုင်ပြက္ခဒိန် ၁၃၈၅ ခုနှစ် နှစ်သစ်ကူးပွဲတော် (သင်္ကြန်ပွဲတော်) ဂုဏ်ပြုအခမ်းအနားနှင့် ရိုးရာနဂါးလှေလှော်ပြိုင်ပွဲ၊ တိုင်းရင်းသား ထူးခြားလက္ခဏာများပါဝင်သော သဲပုံပွဲ၊ ကြက်တိုက်ပွဲ ဖျော်ဖြေပွဲများ၊ လူသောင်းနှင့်ချီ၍ မီးပုံးပျံလွှတ်ခြင်း စသည့်အစီအစဉ်များကို ကျင်းပမည်ဖြစ်ကြောင်း သိရသည်။

တယ်ဟုန် တိုင်တိုင်းရင်းသား ဂျိန်းဖောတိုင်းရင်းသား ကိုယ်ပိုင်အုပ်ချုပ်ခွင့်ရပြည်နယ်ခွဲတွင် မန်စီ မီးရောင်စုံလင် ဂီတပွဲ၊ တိုင်းရင်းသားအစားအစာနှင့် အထူးထွက်ကုန်များ ပြပွဲ၊ “အရုဏ်ဦးမြို့” ဂီတပွဲတော်၊ အမျိုးသားစည်းလုံးညီညွတ်ရေး micro film ပွဲဦးထွက်ပြသခြင်းအခမ်းအနား၊ စီမံကိန်းလက်မှတ်ရေးထိုးပွဲအခမ်းအနားနှင့် ရင်းနှီးမြှုပ်နှံမှုမြှင့်တင်ပွဲ၊ တရုတ်-မြန်မာ နယ်စပ်ပြည်သူများ ပျော်ရွှင်ဖွယ်ရာ ဂီတပွဲတော် စသည့် ထူးခြားသော လှုပ်ရှားမှု ၁၀ ခုကျော်ကို ကျင်းပမည်ဖြစ်ကြောင်း ထုတ်ပြန်ထားသည်။

လင်ချန်းမြို့တွင် သင်္ကြန်ပွဲတော် ဆက်စပ်လှုပ်ရှားမှု ဖွင့်ပွဲအခမ်းအနား ကျင်းပ၍ တစ်မြို့လုံးတွင် စားသောက်ဖွယ်ရာများ ကူးသန်းရောင်းဝယ်ရေး၊ ရိုးရာဓလေ့ထုံးတမ်းများ၊ ကျေးလက်ခရီးသွားလာရေး စသည့် တွဲဖက်လှုပ်ရှားမှုများကို ကျင်းပမည်ဖြစ်ကြောင်း၊ ဖူအယ်မြို့ မုံလျန် တိုင်တိုင်းရင်းသား၊ လားဟူတိုင်းရင်းသား၊ ဝတိုင်းရင်းသား ကိုယ်ပိုင်အုပ်ချုပ်ခွင့်ရခရိုင်တွင် သင်္ကြန်ပွဲတော် ဖွင့်ပွဲအခမ်းအနားနှင့် တိုင်တိုင်းရင်းသားပြည်သူများ နှစ်သစ်ကူးအခမ်းအနားကို ကျင်းပမည်ဖြစ်ကြောင်း သိရသည်။

ကူမင်းရှိ ယူနန်တိုင်းရင်းသားကျေးရွာတွင် ခရီးသွားဧည့်သည်များအတွက် ရေပေါ်ရှိုးပွဲ၊ ရေပက် ဆုမွန်ကောင်းတောင်းပေးခြင်း၊ အဆိုအက၊ ရေကစားရင်း ချန်ပီယံလုခြင်း စသည့် မူလအနှစ်သာရမပျက်သော ရိုးရာဓလေ့ လက်တွေ့ခံစားမှုများကို ဆောင်ကြဉ်းပေးမည်ဖြစ်ကြောင်း မြန်မာနိုင်ငံဆိုင်ရာ သံရုံး၏ ထုတ်ပြန်ချက်အရ သိရသည်။

#MyanmarNationalPost