MNP ၊ မေ ၁၈
မကွေးတိုင်းဒေသကြီး၊ ချောက်ခရိုင်၊ချောက်မြို့နယ် မြန်မာ့လယ်ယာဖွံ့ဖြိုးရေးဘဏ်ခွဲမှ တောင်သူများအတွက်၂၀၂၃ခုနှစ်၊ မိုးရာသီစိုက်ပျိုးစရိတ်ထုတ်ချေးငွေများကို ယမန်နေ့နံနက် ၁၀ နာရီ အချိန်က စတင်၍ မြန်မာ့လယ်ယာဖွံ့ဖြိုးရေးဘဏ်ခွဲတွင် ထုတ်ချေးပေးလျက်ရှိရာ ယခုနှစ် မိုးရာသီစိုက်ပျိုးစရိတ်ချေးငွေ ကျပ်သန်းပေါင်း (၃၉၀၀)သန်းခန့် ထုတ်ချေးပေးရန် လျာထားကြောင်း သိရသည်။
စိုက်ပျိုးစရိတ်ချေးငွေများကို စက်တင်ဘာလကုန်အထိ ထုတ်ချေးပေးသွားမည်ဖြစ်ပြီး စပါးတစ်ဧက ငွေကျပ် ၁၅၀၀၀၀ နှုန်းဖြင့်လည်းကောင်း၊ အခြားသီးနှံမြေပဲ၊ နှမ်း၊ ပဲစိမ်းငုံ၊ တစ်ဧကလျှင် ငွေကျပ် ၁၀၀၀၀၀ နှုန်းဖြင့်လည်းကောင်း ထုတ်ချေးပေးလျက်ရှိရာ တောင်သူတစ်ဦးကို စိုက်ပျိုးမြေဧက ၁၀ ဧကအထိထုတ်ချေးနိုင်ကြောင်း၊ အတိုးနှုန်းအနေဖြင့် ငွေကျပ် ၁၀၀ ကို တစ်နှစ်လုံးအတွက် ၅ ရာခိုင်နှုန်း ပေးသွင်းရမည်ဖြစ်ပြီး သီးနှံပေါ်ချိန် ပြန်ဆပ်သည့်အခါ တိုးရင်းပေါင်းကာ ပြန်လည်ပေးဆပ်ရမည်ဖြစ်သည်။
စိုက်ပျိုးစရိတ်ချေးငွေထုတ်ချေးမှုအနေဖြင့် ချောက်မြို့နယ်အတွင်း ဝသဲစမ်းအုပ်စုတို့မှ တောင်သူဦးရေ (၂၂၀)ဦး၊ ဧကပေါင်း (၁၄၀၄)ဧကအတွက် ထုတ်ချေးငွေကျပ်သိန်း (၁၄၀၄)သိန်းအား ထုတ်ချေးပေးပြီးဖြစ်ကြောင်းနှင့် ချောက်မြို့နယ်တွင်ကျေးရွာအုပ်စု(၄၉)စုတွင် ကျေးရွာအုပ်စု (၁)အုပ်စုအား မိုးရာသီစိုက်ပျိုးငွေများ ထုတ်ချေးပေးပြီးဖြစ်ကြောင်း၊ ယခုနှစ် မိုးရာသီစိုက်ပျိုးစရိတ်ချေးငွေ စပါး(၅၀)ဧက၊ အခြားသီးနှံ (၃၅၉၂၅) ဧက၊ စုစုပေါင်း (၃၅၉၇၅)ဧက၊ တောင်သူပေါင်း (၆၀၀၀)ဦးအတွက် ငွေကျပ်သန်းပေါင်း (၃၉၀၀) လျာထားလျက်ရှိကြောင်း မြို့နယ်မြန်မာ့လယ်ယာဖွံ့ဖြိုးရေးဘဏ်ခွဲ မန်နေဂျာထံမှ သိရသည်။
ကျော်မိုး
https://t.me/MyanmarNationalPost
No comments:
Post a Comment