ဂွမြို့နယ်အတွင်း မိုခါမုန်တိုင်းသင့်ကျေးရွာများတွင် တိရစ္ဆာန်ကူးစက်ရောဂါ ကာကွယ်ကုသရေးလုပ်ငန်းများအား ကွင်းဆင်းဆောင်ရွက်

MNP ၊ မေ  ၂၄

ရခိုင်ပြည်နယ်၊ ဂွမြို့နယ်တွင် မွေးမြူရေးနှင့် ကုသရေးဦးစီးဌာနက တိရစ္ဆာန်ကူးစက်ရောဂါ ကာကွယ်ဆေး ထိုးနှံခြင်းနှင့် ဆေးကုသရေးလုပ်ငန်းများကို မေလ(၂၃)ရက်နေ့ ၊ နေ့လယ်ပိုင်းတွင် မိုခါမုန်တိုင်းသင့်ကျေးရွာများဖြစ်သည့် ရွှေဦးကွင်းကျေးရွာနှင့် ဂျိုင်ကောက်ကျေးရွာများသို့ ကွင်းဆင်း၍ ဆောင်ရွက်ခဲ့ကြသည်။

ထိုသို့ကွင်းဆင်းဆောင်ရွက်ရာတွင် မြို့နယ် မွေးမြူရေးနှင့် ကုသရေးဦးစီးဌာနမှ ဦးစီးအရာရှိ ဒေါက်တာပိုင်စိုးဦးနှင့် ဝန်ထမ်းများ၊ ကျန်းမာရေးလုပ်သားများ ပါဝင်သောအဖွဲ့က မွေးမြူရေးတိရစ္ဆာန်များတွင် ရောဂါဖြစ်ပွား ကျရောက်ခြင်းမှ ကြိုတင် ကာကွယ်နိုင်ရေးအတွက် ရွှေဦးကွင်းကျေးရွာနှင့် ဂျိုင်ကောက်ကျေးရွာများရှိ ကျွဲ၊နွား (၃၈)ကောင်အား လည်ချောင်းကွဲရောဂါ ကာကွယ်ဆေး ထိုးနှံခြင်း၊ ဆိတ်(၄၂)ကောင်အား ပေါင်ပုပ်၊ လက်ပုပ်ရောဂါ ကာကွယ်ဆေးများ ထိုးနှံပေးခဲ့ကြပြီး ကျွဲ၊နွားများတွင် ဖြစ်ပေါ်တတ်သော ရောဂါများ၊ တိရစ္ဆာန်များအား စနစ်တကျ မွေးမြူနည်း၊ အာဟာရညီညွတ်မျှတစွာ ပါဝင်သော အစားအစာများကို လုံလောက်စွာ ကျွေးမွေးရန်နှင့် ကူးစက်ရောဂါ ကာကွယ်ထိန်းချုပ်နည်းဆိုင်ရာ အကြောင်းအရာများကို အသိပညာပေး ဆောင်ရွက်ခဲ့ကြ ကြောင်း သိရသည်။

ထို့အပြင် မွေးမြူရေးနှင့် ကုသရေးဦးစီးဌာန အနေဖြင့်မြို့နယ်အတွင်း ကျန်ရှိနေသေးသည့် မုန်တိုင်း  ဒဏ်သင့် ကျေးရွာများသို့လည်း တိရစ္ဆာန် ကာကွယ်ကုသမှုလုပ်ငန်းများကို ဆက်လက်ဆောင်ရွက်သွားမည်ဖြစ်ကြောင်း သိရသည်။

ရွှေရည်ဝင်းကျော်

 https://t.me/MyanmarNationalPost