MNP ၊ ဇူလိုင် ၁၈
(၇၆) နှစ်မြောက် အာဇာနည်နေ့အထိမ်းအမှတ် ကျောင်းသား/သူများအနေဖြင့် အာဇာနည်နေ့သမိုင်းကြောင်းများ၊ နေ့ထူးနေ့မြတ်များအကြောင်းကို သိရှိစေရန်ရည်ရွယ်၍ ရွှေဘိုခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန (Community Center) ခန်းမတွင် ယနေ့မွန်းလွဲပိုင်းအချိန်က စာစီစာကုံးပြိုင်ပွဲ၊ ဟောပြောပွဲနှင့်နံရံကပ်စာစောင်ပြပွဲများ ကျင်းပပြုလုပ်ခဲ့သည်။
ရှေးဦးစွာ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လက်ထောက်ညွှန်ကြားရေးမှူး ဒေါ်အေးမြမွန်က ပြိုင်ပွဲကျင်းပရခြင်း၏ရည်ရွယ်ချက်များ၊ ပြိုင်ပွဲစည်းမျဥ်းစည်းကမ်းများကိုပြောကြားခဲ့ပြီး ပြိုင်ပွဲကျင်းပခဲ့သည်။
ထို့နောက် ဦးစီးအရာရှိဒေါ်အေးမြင့်စန်းက အာဇာနည်နေ့ဖြစ်ပေါ်လာပုံ သမိုင်းကြောင်းနှင့် အာဇာနည် (၉)ဦးအကြောင်း၊ နေ့ထူးနေ့မြတ်များအကြောင်းကို ဆွေးနွေးဟောပြောခဲ့ပြီး နံရံကပ်စာစောင်များ ပြသထားရာ ကျောင်းသား/သူလေးများမှ မြန်မာ့လွတ်လပ်ရေးဗိသုကာကြီး ဗိုလ်ချုပ်အောင်ဆန်း၏ သမိုင်းဝင်မှတ်တမ်းဓါတ်ပုံများ၊ မိန့်ခွန်းကောက်နှုတ်ချက်များနှင့် အာဇာနည် (၉) ဦး၏ အတ္ထုပ္ပတ္တိ၊ ကဗျာများ၊ ဆောင်းပါးများကို စိတ်ပါဝင်စားစွာ လေ့လာကြည့်ရှုခဲ့ကြကြောင်း သိရသည်။
https://t.me/MyanmarNationalPost
No comments:
Post a Comment